Read tshiluba Luka 7 Bible Online

Luka 7 - tshiluba bible

Luka 7

¹Hakashikisheye kuambila bantu mei andi onso mu matshu abo, wakabuela mu Kapênuma.

²Muntu wa kapitene kakuabo ka masalayi lukama wakadi munanga kudi nfumu wandi, lufu luakadi lumutonde.

³Hakunvueye lumu lua Yesu, wakatuma bakulu ba Bena Yuda kudiye, bua kumusengelela bua kulua kuhandisheye muntu wandi.

⁴Hakaluabo kudi Yesu, bakamutendekena bikole, bakamba ne, Yeye udi ne buimpe bua wewe kumuenzela bualu ebu,

⁵yeye udi munange tshisamba tshietu, wakatulukila nsunagoga wetu.

⁶Yesu wakaya nʼabo. Hakadiye ha buihi ne nsubu, kapitene kakatuma balunda baku kudiye bua kumuambila ne, Mukelenge, kuditatshishi, meme tshiena muntu mukumbane bua wewe kubuela mu nsubu muanyi;

⁷bua bualu ebu mbunakelela meshi ne, Tshiena bianyi muakane bua meme kumueneka kûdi; kadi wambe anu dî diebe, muntu wanyi neasangale.

⁸Meme kabidi ndi ku nyima kua bakuabo, ndi ne masalayi ku nyima kuanyi; adi ngambila disalayi edi ne, Ya, diodio diaya; ndi ngambila dikuabo ne, Lua, diodio dialua; ndi ngambila muntu wanyi ne, Enza bualu ebu, yeye wenza.

⁹Hakunvua Yesu mei â, wakakema, wakatshinguluka, wakambila tshisumbu tshia bantu tshiakadi tshimulonda ne, Ndi nuambila ne, Munkatshi mua Bena Isalele mene mene tshiena musanganemu ditabusha dinene nunku.

¹⁰Bakadi batumibua bakahingana ku nsubu, bakasangana muntu wa kapitene mumane kusanguluka.

¹¹Hakahita tshituha tshihi, yeye wakaya mu musoko, dina diau Naina; bayidi bandi bakaya nʼandi ne tshisumbu tshinene tshia bantu.

¹²Hakafikeye ha buihi ne tshibuelelu tshia mu musoko, hakadi baluhuka ne muntu mufue, wakadi biandi muana umuehele mulela kudi mamu wandi, mamu wandi wakadi wa mu lufuila; bantu ba bungi ba mu musoko bakadi nʼandi.

¹³Hakamutangila Mukelenge, yeye wakamufua luse, wakamuambila ne, Kudidi.

¹⁴Wakalua ha buihi, wakalenga tshituadilu tshia tshitalu tshianza; batuadi batshi bakimana. Yesu wakamba ne, Nsongalume, ndi nkuambila ne, Bika.

¹⁵Wakadi mufue wakabika, wakashikama, wakabanga kuakula, Yesu wakamufila kudi mamu wandi.

¹⁶Buowa buakabakuata buonso buabo; bakatumbisha Nzambi bamba ne, Muprofete munene wakumueneka munkatshi muetu, Nzambi wakulua kutangila bantu bandi.

¹⁷Lumu luandi elu luakamuangalaka mu luseke luonso lua Yudaya ne ku matshika onso.

¹⁸Bayidi ba Yone bakamuambila malu â onso.

¹⁹Yone wakabikila bayidi bandi bakuabo babidi, wakabatuma kudi Mukelenge bua kumukonka ne, Wewe nyeye ulualua, anyi tutekemene mukuabo?

²⁰Hakaluabo kudiye, bakamuambila ne, Yone Mubatiji wakututuma bua kukukonka ne, Wewe nyeye ulualua, anyi tutekemene mukuabo?

²¹Ha diba adi mene Yesu wakadi wondaha bantu ba bungi mabedi abo ne masama abo makole, wakadi ubumushila nyuma mibi; wakadi utabasha mesu a ba bungi bakadi bafofo.

²²Yeye wakabakudimuna di ne, Yai bienu, nuambile Yone malu anuakumona ne anuakunvua ne, Bafofo badi batabala, balema badi benda, bena nsudi badi balengeshibue, bena mahaha badi bunvue, bafue badi babishibue ku lufu, badi bambila bahele lumu luimpe lua Nzambi.

²³Muntu yonso udi kai ulenduka bua bualu buanyi udi ne disanka.

²⁴Hakahingana bena mukenshi ba Yone, Yesu wakabanga kuambila bantu bualu bua Yone ne, Nuakuyila mu tshihela bua kutangila tshinyi? Bua kutangila disele didibo banyungisha kudi luhehele, anyi?

²⁵Nuakuyila bua kutangila tshinyi? Bua kutangila muntu muluate bilulu binefuke, anyi? Bantu badi ne bilulu bilengele, badi mu buneme buabo, batu bikala mu nsubu ya banfumu.

²⁶Kadi nuakuyila bua kutangila tshinyi? Muprofete, anyi? E, ndi nuambila ne, Yeye udi mutambe muprofete.

²⁷Eu nyeye wakafundabo ne, Monai, ndi ntuma mukenshi wanyi ku mpala kuebe, Yeye nealongolole nshila webe ku mpala kuebe.

²⁸Ndi nuambila ne, Munkatshi mua bakalelabo kudi bakashi kamuakadi mukuabo mutambe Yone; kadi udi mutambe bonso bukese mu bukelenge bua mu diulu udi mumutambe yeye.

²⁹Hakunvua bantu bonso malu au, ne basangishi ba mulambu kabidi, bakabingisha Nzambi, bakadi bamane kubatijibua ne dibatiza dia Yone.

³⁰Kadi Bafalese ne bamanyi ba mikenshi bakahidia lungenyi lua Nzambi, bakadi kabai babatijibue kudiye.

³¹Nenfuanyikishe bantu ba tshikondo etshi bu tshinyi? Badi bu tshinyi?

³²Badi bu bana bakese badi bashikama mu tshisalu, badi babikilangana, badi bamba ne, Tuakunuelela nshiba, kanuena baje; tuakujinga, kanuena badile.

³³Bualu bua Yone Mubatiji wakulua kai udia bidia kai unua maluvu; nudi nuamba ne, Yeye udi ne demon munda.

³⁴Muana wa muntu wakulua udia bidia ne unua maluvu; nudi nuamba ne, Yeye udi muena mudi, udi mukuatshiki wa maluvu, udi mulunda wa basangishi ba mulambu ne wa bantu babi.

³⁵Bana bonso ba lungenyi badi balujadika.

³⁶Mufalese mukuabo wakasua Yesu adie ngandi bidia. Yeye wakabuela mu nsubu wa Mufalese, wakashikama ku mesa.

³⁷Mu musoko muakadi mukashi mubi; hakamanyeye ne, Yesu udi ushikama ku mesa mu nsubu wa Mufalese, wakalua ne mulondo wa alabasta, mu mulondo muakadi mananashi;

³⁸hakadiye muimane ku makasa a Yesu ku nyima kuandi udila, wakabanga kubolesha makasa andi ne binsonshi biandi, wakâkuhula ne nsuki yandi, wakatua mishiku ku makasa a Yesu, wakaela mananashi.

³⁹Hakamona Mufalese wakamubikila bua kudia bualu abu, wakamba munda munda ne, Bu muntu eu muikale muprofete, yeye wakadi kumanya mudi mukashi eu wakumulenga bianza ne, Udi mubi.

⁴⁰Yesu wakamuandamuna ne, Simona, ndi ne dî dia kukuambila. Yeye wakamba ne, Muyishi, ambaku.

⁴¹Musombeshanganyi wakadiku, wakadi ne bena mabanza andi babidi; mukuabo wakadi ne dibanza dia ndenalio[1] nkama itanu, mukuabo wakadi ne dibanza dia ndenalio makumi atanu.

⁴²Hakahangabo bintu bia kumufuta, yeye wakabalekelela mabanza bubidi buabo. Bubidi buabo watamba kumusua nganyi?

⁴³Simona wakamuandamuna ne, Ndi ngela meshi ne, Muena dibanza dinene wakalekeleleye. Yesu wakamuambila ne, Wakujingulula bimpe.

⁴⁴Hakatshingulukeye kudi mukashi, wakambila Simona ne, Udi utangila mukashi eu? Nakubuela mu nsubu webe kuakumpa mai a makasa anyi, kadi yeye wakubolesha makasa anyi ne binsonshi biandi, wakuakuhula ne nsuki yandi.

⁴⁵Wewe kuakutuangana nʼanyi mishiku, kadi hanakubuela tô ne katataka yeye kena ulekela kutua mishiku yandi ku makasa anyi.

⁴⁶Wewe kuakungela manyi ha mutu, kadi yeye wakangela mananashi ha makasa anyi.

⁴⁷Bua bualu ebu ndi nkuambila ne, Mibi yandi idi ya bungi, yakujimishibua; bualu bua yeye wakadi ne dinanga dia bungi; walekelelabo malu makese udi ne dinanga dikese.

⁴⁸Yeye wakambila mukashi ne, Mibi yebe yakujimishibua.

⁴⁹Bakadi bashikame nʼandi ku mesa bakabanga kukonkangana ne, Eu udi ujimishilangana mibi nganyi?

⁵⁰Yeye wakambila mukashi ne, Ditabusha diebe diakukusungila, ya biebe talalâ.