Read tshiluba Dutelonone 1 Bible Online

Dutelonone 1 - tshiluba bible

Dutelonone 1

¹Â mmei akambila Mose Bena Isalele dishiya dia Yadene mu tshihela mu Alabâ tshitangilangane ne Sufa, hankatshi ha Palana ne Tofele ne Labana ne Heselota ne Dizababa.

²Ku Holeba wa mu nshila wa ku mukuna wa Sei tô ne ku Kadeshe-bânea, nduendu lua matuku dikumi ne dimue.

³Mu tshidimu tshia makumi anai ne mu ngondo wa dikumi ne umue ne dituku dia kumudilu dia ngondo eu, Mose wakamanyisha Bena Isalele bua malu onso akamuambila Yehowa mu mikenji yakabeleleye;

⁴hakashiheye Sihona, mukelenge wa Bena Amole, wakadi ushikama mu Heshebona, ne Oga, mukelenge wa Bashana, wakadi ushikama mu Ashetalota ku Edelei.

⁵Dishiya dia Yadene mu buloba bua Moaba, Mose wakabanga kubamanyisha bua mikenji ne,

⁶Yehowa Nzambi wetu wakatuambila mu Holeba ne, Nuakumana kushikama musangu mule mu mukuna eu:

⁷bishai luendu luenu, yai bienu ku mikuna ya Bena Amole, ne ku miaba yonso idi hehi nʼabo mu Alabâ ne mu mikuna ne mu bibanda, ne mu luseke lua ku Sude, ne hehi ne muelelu wa mai manene, mu buloba bua Bena Kanâna ne mu Lebanona tô ne ku musulu munene dina diau Pelata.

⁸Monai, nakuteka buloba ebu buonso ku mpala kuenu: nubuelemu, nuhiane buloba buakalaya Yehowa batatuʼetu Abalahama ne Isaka ne Yakoba, bua kubahabu ne tunkanunuina tuabo tudi tubalonda ku nyima.

⁹Nakanuambila ku tshikondo atshi ne, Tshiena mua kunutuala nkayanyi:

¹⁰Yehowa, Nzambi wenu, wakunukumbasha ba bungi, ne monai, lelu nudi bu bungi bua mitoto ya mulu.

¹¹Yehowa, Nzambi wa batatuʼetu, anukumbashe tô ne hanuahita bungi buenu bua katataka misangu tshinunu, anusankishe bu muakunulayeye!

¹²Meme nkayanyi ndi mua kutuala malu enu ne bujitu buenu ne kutanda kuenu munyi?

¹³Nuangate balume ba lungenyi lule, banudi bamanye, bungi bua bisamba bienu, nembateke ku mutu kuenu.

¹⁴Nuenu nuakangambila ne, Bualu buwakuamba budi buimpe bua tuetu tuenze.

¹⁵Nunku nakasungula balume ba lungenyi lule, banuakamanya, nakabateka ku mutu kuenu, tuhita tua binunu binunu, ne tuhita tua nkama nkama, ne tuhita tua makumi atanu makumi atanu, ne tuhita tua dikumi dikumi, ne miloho bungi bua bisamba bienu.

¹⁶Meme nakadimusha balumbuluishi benu tshikondo atshi ne, Unvuai bilumbu bia bana benu, nulumbulule bilumbu bia muntu ne muanʼabo mulume ne muenyi udi nʼandi biakane.

¹⁷Kanuikadi ne kansungusungu hanualumbulula bilumbu; nunvue dî dia muntu mukese ne dia muntu munene muomumue; kanutshinyi mpala wa muntu; bualu bua kulumbulula kua bilumbu kudi kua Nzambi: tshilumbu tshidi tshihita bukole, nulue nʼatshi kundi, meme nentshiunvue.

¹⁸Mu tshikondo atshi nakanuambila malu onso anudi ne bualu bua kuenza.

¹⁹Tuakabika ku Holeba, tuakenda tô mu tshihela atshi tshinene tshibi tshinuakatangila, ku nshila wa ku mikuna ya Bena Amole, bu muakatuambila Yehowa, Nzambi wetu; tuakalua ku Kadeshe-bânea.

²⁰Meme nakanuambila ne, Nuakulua ku mikuna ya Bena Amole, buloba budi Yehowa mutuhe.

²¹Tangilai, Yehowa, Nzambi wenu, wakateka buloba ku mpala kuenu: yai bienu, nubuhiane, bu muakanuambila Yehowa, Nzambi wa batatuʼenu; kanutshinyi, kanuikadi ne buowa.

²²Nuenu nuakalua kundi, buonso buenu muakamba ne, Tutume bantu ku mpala kuetu, bua hobo batentekele buloba, bahingane, batumanyishe bua nshila utudi tuyamu, ne misoko itudi tubuelamu.

²³Bualu ebu buakusankisha bimpe, nakasungula balume dikumi ne babidi, muntu ku tshisamba muntu ku tshisamba.

²⁴Bobo bakaya ku mikuna, bakalua mu tshibanda tshia Eshekola, bakatentekela buloba.

²⁵Bakangata bintu biakadiunda mu buloba mu bianza biabo, bakalua nʼabi kutudi, bakatuambila ne, Buloba budi Yehowa mutuhe budi buimpe.

²⁶Kadi nuenu nuakahidia bua kuyamu, nuakahidia mukenji wa Yehowa, Nzambi wenu.

²⁷Nuakatontolola mu ntenta yenu, nuakamba ne, Bualu bua Yehowa wakadi nʼetu tshiji, yeye wakatuhatula mu buloba bua Ejipitu, bua kutufila mu bianza bia Bena Amole, bua bobo batushihe.

²⁸Netubuelemu munyi? Bana betu bakatekesha mitshima yetu, bakamba ne, Bantu aba badi batuhita hunene ne bule; misoko yabo idi minene, ne mpangu yai ya mabue idi miye mulu mule; bualu bukuabo, tuakatangilamu bana balume ba Bena Anaka.

²⁹Hashishe nakanuambila ne, Kanuikadi ne buowa, kanubatshinyi.

³⁰Yehowa, Nzambi wenu, udi uya ku mpala kuenu, yeye neanuluile nvita yenu, bu muakenzeye ku mesu kuenu mu Ejipitu,

³¹ne mu tshihela, nuakatangila ne Yehowa, Nzambi wenu, wakanutuala mu maboko, bu mudi tatu utuala muanʼandi mulume, mu nshila yonso inuakaya tô ne hanuakalua ku muaba eu.

³²Kadi mu bualu ebu buonso kanuakatumikila Yehowa, Nzambi wenu,

³³wakaya ku mpala kuenu mu nshila bua kunukebela muaba wa kushimika ntenta yenu, mu difutu dikenka kahia butuku, ne mu dî tulu dia diledi munya, bua kunulombola mu nshila unuakadi ne bualu bua kuenda.

³⁴Yehowa wakunvua mei enu, wakadi nʼenu tshiji, wakaditshiha ne,

³⁵Nansha muntu umue wa mu tshikondo etshi tshibi neatangile buloba ebu buimpe, bunakalaya batatuʼenu bua kunuhabu,

³⁶anu Kaleba, muana mulume wa Yefune, neabutangile; nemmuhe buloba buakadiateye muinshi mua makasa andi, ne kudi bana bandi, bualu bua yeye wakalonda Yehowa bulelela.

³⁷Yehowa wakadi nʼanyi tshiji bualu buenu, wakamba ne, Wewe kuena ubuelamu:

³⁸Yoshua, muana mulume wa Nuna, utu wimana ku mpala kuebe, yeye neabuelemu: ukoleshe mutshima wandi, bualu bua yeye neahianyishe Bena Isalele buloba.

³⁹Kadi bana benu bakese banuakamba ne, Nebafue, badi kabayi banze kumanya malu mimpe ne malu mabi, bobo nebabuelemu, nebahiane buloba.

⁴⁰Kadi nuenu, nunyunguluke, yai bienu mu tshihela mu nshila wa ku Dishiba Dikunze.

⁴¹Hashishe nuenu nuakangambila ne, Tuakuenzela Yehowa bibi, netuye, netuluangane, bu muakatuambila Yehowa, Nzambi wetu. Muntu ne muntu wakangata bintu biandi bia nvita; nuakamba kuya ku mikuna.

⁴²Yehowa wakangambila ne, Ubambile ne, Kanuyi, kanuluanganyi; bualu bua meme tshiena munkatshi muenu; kanuhonyi ku mpala kua bantu badi nʼenu lukuna.

⁴³Nakanuambila nunku, kanuakangunvuila; kadi nuakadi ne budisu, nuakahidia dî dia Yehowa, nuakadiyila ku mikuna.

⁴⁴Bena Amole bakadi bashikama ku mikuna bakaluhuka kunudi, bakanuihata bu mbulubulu, bakanunyemesha mu Sei tô ne ku Hôma.

⁴⁵Nuenu nuakahingana, nuakadila ku mpala kua Yehowa; kadi Yehowa kakunvua dî dienu, kakateleja matshu andi kunudi.

⁴⁶Nunku nuakashikama mu Kadesha matuku a bungi, nudi bamanye bungi bua matuku anuakashalamu.