Read tshiluba Dutelonone 18 Bible Online

Dutelonone 18 - tshiluba bible

Dutelonone 18

¹Bakuidi ba mu Bena Lewi, ne tshisamba tshionso tshia Lewi kabena ne buhianyi munkatshi mua Bena Isalele; bobo nebadie munyinyi wa milambu ya Yehowa idibo bosha ha kahia bu buhianyi bua Yehowa.

²Bobo kabena ne buhianyi munkatshi mua bana babo; Yehowa udi buhianyi buabo, bu muakabambileye.

³Bintu ebi bidi tshituha tshia bakuidi kudi bantu badi bafila milambu ya kuosha, nansha ngombe nansha mukoko: bobo nebahe bakuidi diboko ne matama abidi ne tshiadi.

⁴Nenubahe kabidi bintu binudi nuhuola diambedi, ne tshia nvinyo muhia-muhia, ne tshia manyi enu, ne miosa ya mikoko.

⁵Bualu bua Yehowa wakasungula Bena Lewi munkatshi mua bisamba bienu bionso, bua kunuenzela mudimu mu dina dia Yehowa, ne yeye ne bana bandi balume tshiendelele.

⁶Biumuka Muena Lewi ku umue wa misoko ya mu Isalele, muakadiye ushikama, bua kubuela ne mutshima wandi wonso mu muaba udi Yehowa Usungula,

⁷hashishe yeye neanuenzele mudimu mu dina dia Yehowa, Nzambi wandi; bu mudi bana babo, Bena Lewi, batu bimana ku mesu kua Yehowa, benza.

⁸Bobo nebadie, muntu tshituha tshiandi muntu tshituha tshiandi ku mutu kua buhianyi bua batatuʼabo buakahanabo.

⁹Hanuabuela mu buloba budi Yehowa, Nzambi wenu, unuha, kanuyidi bua kulonda ku nyima kua malu a bundu a bisamba abi.

¹⁰Muntu kikadi munkatshi muenu udi utambisha muanʼandi mulume anyi muanʼandi mukashi mu kahia, nansha mutempi wa mbuku, nansha muena dijimbu nansha muena bilengulengu, nansha muena buloshi,

¹¹nansha musesuishi wa bantu ne miloû yandi, nansha mutendeledi wa bakishi, nansha muena muhongo, nansha muena lubuku lua muzangu.

¹²Muntu yonso utu wenza malu au udi bu tshintu tshibi ku mesu kua Yehowa; bualu bua malu au mabi Yehowa, Nzambi wenu, udi Wihata bantu ku mesu kuenu.

¹³Nuenu nuikale balamate kudi Yehowa, Nzambi wenu.

¹⁴Bualu bua bisamba ebi binudi nuihata nunku bakadi bunvue mei a bena dijimbu ne a batempi ba mbuku; kadi Yehowa, Nzambi wenu, kena witabusha bua nuenu nuenze nunku.

¹⁵Yehowa, Nzambi wenu, neanubishile muprofete munkatshi mua bana benu bu meme, nenunvue dî diandi:

¹⁶bu munuakalomba Yehowa, Nzambi wenu, mu Holeba mu dituku dituakasambakena nʼenu ne, Katunvu dî dia Yehowa, Nzambi wetu, kabidi, katutangidi kahia aka kanene kabidi, bua katufu.

¹⁷Yehowa wakangambila ne, Bobo bakamba dî dimpe.

¹⁸Meme nembabishile muprofete munkatshi mua bana babo bu wewe; meme nenteke mei anyi onso mukana muandi, ne yeye neabambile mei onso anamuambila.

¹⁹Muntu yonso udi uhidia kunvua mei anyi adiye wamba mu dina dianyi, meme nenkose tshilumbu tshiandi.

²⁰Muprofete udi udiambila mei mu dina dianyi ne dikamakama andi tshiyi mumuambile anyi udi wamba mei mu dina dia nzambi mukuabo, muprofete au neafue biandi.

²¹Binuamba mu mitshima yenu ne, Nemmanye dî didi Yehowa kayi mutuambile munyi?

²²Hamba Muprofete malu mu dina dia Yehowa ne malu au kaena menjibue, au mmalu adi Yehowa kayi mumuambile; muprofete au wakatuambila, kanumutshinyi.