Read tshiluba Dutelonone 26 Bible Online

Dutelonone 26 - tshiluba bible

Dutelonone 26

¹Hanuabuela mu buloba budi Yehowa, Nzambi wenu, unuha bua nuenu kubuhiana, hanuabunyenga ne hanuashikamamu,

²hashishe nenuangate bintu bionso bidi biboba diambedi mu buloba budi Yehowa, Nzambi wenu, unuha, nubiteke mu tshisaka, nulue nʼabi mu muaba udi Yehowa, Nzambi wenu, usungula, bua kujadikamu dina diandi.

³Nulue kudi muakuidi wa mu matuku au, numuambile ne, Ndi nkuambila lelu ku mesu kua Yehowa, Nzambi webe, ne, Nakubuela mu buloba buakaiaya Yehowa batatu betu, bua kutuhabu.

⁴Muakuidi neangate tshisaka mu bianza bienu, neatshiteke hanshi ku mpala kua tshioshelu tshia Yehowa, Nzambi wenu.

⁵Nenuambe ku mesu kua Yehowa, Nzambi wenu, ne, Tatu wetu wakadi Muena Sulia, wakadi wamba kufua; ne yeye wakaya mu Ejipitu, wakashikamamu bantu banya-banya; yeye wakalua tshisamba tshinene tshia bukole ne bantu ba bungi.

⁶Bena Ejipitu bakatuenzela bibi, bakatukengesha, bakatuenzesha mudimu mukole;

⁷ne tuetu tuakadi la kudi Yehowa, Nzambi wa bankambua betu, ne Yehowa wakulua dî dietu, wakatangila makenga etu ne mudimu wetu ne majitu etu.

⁸Yehowa wakatuhatula mu Ejipitu ne tshianza tshikole ne diboko diandi diolola ne malu makole ne bimanyinu ne malu a dikema;

⁹wakalua nʼetu mu muaba eu, wakatuha buloba ebu, buloba budi bûle tente ne mabele ne buitshi.

¹⁰Katataka, Yehowa, tuakulua ne bintu biakaboba diambedi mu buloba buwakutuha. Nenuteke bintu ebi hanshi ku mpala kua Yehowa, Nzambi wenu, nenutendelele ku mpala kua Yehowa, Nzambi wenu;

¹¹nenusanke mu malu mimpe onso akanuha Yehowa, Nzambi wenu, ne nuenu ne ba mu nsubu yenu, ne Muena Lewi ne benyi badi munkatshi muenu.

¹²Hanuashikisha kufila tshia dikumi tshia bintu bienu bionso mu tshidimu tshisatu tshidibo bafila tshia dikumi tshia bintu, nenubale Bena Lewi ne benyi ne bana ba nshiya ne bakashi ba mu lufuila; nunku bobo nebadie mu misoko yenu, nebukute.

¹³Nenuambe ku mesu kua Yehowa, Nzambi wenu, ne, Tuakumusha bintu bia tshijila mu nsubu yetu, tuakabiha Bena Lewi ne benyi ne bana ba nshiya ne bakashi ba mu lufuila, bu mukenji uwakutuelela, katuakashiha mikenji yebe, katuakuhua mikenji muoyo.

¹⁴Katuakudia bintu ebi mu madilu etu, katuakabilenga hatuakadi banyanguke, katuakabifila kudi bakadi mu madilu: tuakutumikila dî dia Yehowa, Nzambi wetu; tuakuenza malu onso akatuambileye.

¹⁵Utangile hanshi mu muaba webe wa tshijila mu diulu, uvudishile bantu bebe ba Isalele disanka, ne buloba buwakutuha, bu muwakalaya bankambua betu, buloba budi bûle tente ne mabele ne buitshi.

¹⁶Yehowa, Nzambi wenu, udi unuelela mukenji lelu bua nuenu nuenze mikenji ei ne mei au; nunku nubienze ne mitshima yenu yonso ne mioyo yenu yonso.

¹⁷Nuenu nuakuitabusha Yehowa bu Nzambi wenu lelu, nuakuamba ne, Tuetu netuende mu nshila yandi, netutumikile mei andi ne mikenji yandi ne mikandu yandi, netunvue dî diandi;

¹⁸ne Yehowa wakanuitabusha bu bantu ba buhianyi buandi bu muakanulayeye, bua nuenu nutumikile mikenji yandi yonso,

¹⁹ne kunubandisha ku mutu kua bisamba bionso biakafukeye mu butumbi ne mu dina ne mu buneme; bua nuenu nuikale bantu ba tshijila kudi Yehowa, Nzambi wenu, bu muakuambeye.