Read tshiluba Dutelonone 29 Bible Online

Dutelonone 29 - tshiluba bible

Dutelonone 29

¹Â mmei a tshihungidi akambila Yehowa Mose bua kuhanga ne Bena Isalele mu buloba bua Moaba, ku mutu kua tshihungidi tshiakahungeye nʼabo mu Holeba.

²Mose wakabikila Bena Isalele bonso, wakabambila ne, Nuenu nuakatangila malu onso akenzela Yehowa Palo mu buloba bua Ejipitu ku mesu kuenu, ne bantu bandi bonso ne buloba buonso;

³mateta makole anuakatangila ne mesu, ne bimanyinu ne malu a kukema.

⁴Kadi Yehowa kena muanze kunuha mitshima ya kumanya nʼai ne mesu a kutangila nʼau ne matshu a kunvua nʼau tô ne ku dituku edi.

⁵Nakanulombola mu tshihela tô bidimu makumi anai: bilulu bienu kabiakasunsuka hamʼbidi henu, ne bisabata kabiakasunsuka ku makasa enu.

⁶Kanuakadia mampa, kanua-kanua nvinyo anyi maluvu makole, bua nuenu numanye ne, Meme ndi Yehowa, Nzambi wenu.

⁷Hanuakalua ku muaba eu, Sihona, mukelenge wa mu Heshebona, ne Oga, mukelenge wa mu Bashana, bakaluhuka bua kuluangana nʼetu, ne tuetu tuakabahita;

⁸bakanyenga buloba buabo, tuakabuha Bena Lubena ne Bena Gada ne tshituha tshia tshisamba tshia Manashe bu buhianyi buabo.

⁹Nunku nuenu nutumikile mei a tshihungidi etshi, nuê-nze, bua nuenu nuikale ne dikasa dimpe mu malu onso anudi nuenza.

¹⁰Buonso buenu nudi nuimana ku mpala kua Yehowa, Nzambi wenu, lelu; ne ba ku mutu kuenu, bisamba bienu, bakulu benu, tuhita tuenu, ne balume bonso ba mu Isalele,

¹¹ne bana benu bakese ne bakashi benu, ne benyi badi munkatshi muenu, ne batatu ba nkunyi ne basunyi ba mai;

¹²bua nuenu nubuele mu tshihungidi tshidi Yehowa, Nzambi wenu, muhunge nʼenu ne mu kuditshiha kudi Yehowa, Nzambi wenu, muditshihe nʼenu lelu,

¹³bua yeye anuitabushe lelu bu bantu bandi, ne bua yeye kuikala Nzambi wenu, bu muakanuambileye, ne bu muakalayeye bankambua benu, Abalahama ne Isaka ne Yakoba.

¹⁴Tshiena muhunge nʼenu nuenu nkayenu tshihungidi etshi ne kuditshiha eku,

¹⁵kadi ne muntu yonso udi muimane ku mpala kua Yehowa, Nzambi wetu, lelu, ne muntu yonso udi kayi muimane nʼetu lelu.

¹⁶Bualu bua nudi bamanye bu mutuakashikama mu buloba bua Ejipitu, ne mutuakahita munkatshi mua bisamba biakadi mu nshila;

¹⁷ne nuenu nuakatangila malu mabi abo ne mpingu yabo ya mitshi ne ya mabue ne ya tshiamu tshia argent ne tshia or yakadi munkatshi muabo;

¹⁸bua muntu kikadi munkatshi muenu, nansha mulume nansha mukashi nansha diku dia bantu nansha tshisamba, udi akudimuna mutshima wandi kudi Yehowa, Nzambi wenu, bua kukuatshila nzambi ya bisamba abi mudimu; ne bua muji udi ukuama mamuma a mulungu ne a bululu kawikadi munkatshi muenu.

¹⁹Kadi bikala muntu udi unvua mei a mulau eu udiamba mu mutshima wandi ne, Meme nengikale ne ditalala nansha binalonda tshitshu tshia mu mutshima wanyi, bua kutenteka dikuatshika ha mutu ha nyota,

²⁰Yehowa kena umubuikidila bubi buandi, kadi tshiji tshia Yehowa ne mukau wandi nebimueneke kudi muntu eu ne milau yonso idi mifunda mu mukanda eu neyimukuate, ne Yehowa nenjimishe dina diandi muinshi mua diulu.

²¹Yehowa neamutahulule munkatshi mua bisamba bionso bia Bena Isalele bua kamuenzela bibi, bu mudi milau yonso ya tshihungidi etshi mifunda mu mukanda eu wa mikenji.

²²Mu tshihungu tshia bantu tshidi tshitua, bana benu badi banulonda ku nyima ne benyi badi bafuma ku buloba bukuabo, hatangilabo makenga akalua ku buloba abu ne masama onso adi Yehowa mubatumine

²³ne buloba buonso budi bu butue ne luehu ne bintu bioshibue, kabena bakunamu tshintu, kabena bahuolamu tshintu; ne mashinde kaena amenamu: buloba budi buikala bu kubutuka kua misoko ya Sodoma ne Amola ne Adema ne Seboima yakashiha Yehowa mu tshiji tshiandi tshikole;

²⁴bantu aba bonso nebambe ne, Bualu kai Yehowa wakuenzela buloba ebu nunku? Yeye wakadi ne tshiji tshikole nunku munyi?

²⁵Hashishe bantu nebambe ne, Bualu bua bobo bakahidia tshihungidi tshia Yehowa, Nzambi wa batatu babo, tshiakahungeye nʼabo hakaluhukeye nʼabo mu buloba bua Ejipitu;

²⁶ne bobo bakaya bua kukuatshila nzambi mikuabo mudimu, ne bua kuyitendelela; nzambi yakadibo kabayi bamanye, idi Yehowa kayi mubahe:

²⁷nunku tshiji tshia Yehowa tshiakamueneka mu buloba ebu, bua kushikisha milau yonso idi mifunda mu mukanda eu;

²⁸ne Yehowa wakabumusha mu buloba abu ne difika dia munda ne tshiji tshikole, wakaya nʼabo mu buloba bukuabo; bualu ebu budi nunku lelu.

²⁹Malu atshidi masokoka adi malu a Yehowa, Nzambi wetu: kadi malu adi masokolola adi malu etu ne a bana betu tshiendelele, bua tuetu tuenze mei onso a mikenji ei.