Read tshiluba Dutelonone 3 Bible Online

Dutelonone 3 - tshiluba bible

Dutelonone 3

¹Tuakanyunguluka, tuakaya mu nshila wa ku Bashana: ne Oga, mukelenge wa Bashana, wakalua ne bantu bandi bonso bua kuluangana nʼetu ku Edelei.

²Yehowa wakangambila ne, Kumutshinyi nansha; bualu bua nakumufila ne bantu bandi bonso ne buloba buandi mu tshianza tshiebe; wewe neumuenzele yeye bu mu wakenzela Sihona, mukelenge wa Bena Amole, wakadi ushikama mu Heshebona.

³Nunku Yehowa, Nzambi wetu, wakafua Oga, mukelenge wa Bashana, ne bantu bandi bonso mu tshianza tshietu kabidi; tuakabashiha, nansha muntu umue wakashala.

⁴Tuakanyenga misoko yandi yonso ku tshikondo atshi, katuakashiya musoko umue; tuakanyenga misoko makumi asambombo, ne luseke tuonso lua Âgoba, bukelenge bua Oga mu Bashana.

⁵Misoko ei yonso yakadi ne mpangu mile ne bibi bikanda ne biamu; tuakanyenga misoko mikuabo ya bungi yakadi kayiyi ne mpangu.

⁶Tuakabajimisba, bu munuakenzela Sihona, mukelenge wa Heshebona; tuakahaula misoko yonso yakadi ne bantu, ne bakashi ne bana bakese.

⁷Kadi tuakadiangatshila bimuna ne bintu bionso bia mu misoko.

⁸Tuakanyenga buloba mu bianza bia bakelenge babidi bakadi dishiya dia Yadene, ku tshibanda tshia Ânona tô ne ku mukuna wa Hêmona;

⁹(Bena Sidona badi babikila Hêmona ne, Sileona, ne Bena Amole badi babikila Hêmona ne, Senî;)

¹⁰misoko yonso ya mu mpata, ne misoko yonso ya mu Gilada, ne ya mu Bashana tô ne ku Saleka ne Edelei, misoko ya bukelenge bua Oga mu Bashana.

¹¹(Anu Oga, mukelenge wa Bashana, wakadi mushale wa Bena Lefa; monai, bulalu buandi buakadi bua biamu; budi mu Laba wa Bena Amona: bule buabu buakadi coudées[1] tshitema ne butshiama buabu buakadi coudées mai.)

¹²Tuakanyenga buloba ebu ku tshikondo atshi, ku Aloê mu tshibanda tshia Ânona, ne tshituha tshia mikuna ya Gilada ne misoko idimu, nakaha Bena Lubena ne Bena Gada:

¹³ne tshituha tshikuabo tshia Gilada ne misoko ya bukelenge bua Oga wa mu Bashana nakaha tshituha tshia tshisamba tshia Manashe: luseke luonso lua Âgoba, misoko yonso ya mu Bashana. (Ebu mbuloba bua Bena Lefa.

¹⁴Yai, muana mulume wa Manashe, wakangata luseke luonso lua Âgoba tô ne ku butshika bua Bena Geshû ne Bena Mâka, wakidika buloba bua Bashana bu dina diandi ne, Hawota-yai tô ne ku dituku edi.)

¹⁵Nakaha Maki Gilada.

¹⁶Nakaha Bena Lubena ne Bena Gada buloba buonso ku Gilada tô ne ku hankatshi ha tshibanda tshia Ânona tô ne ku kasulu ka Yaboka ku butshika bua Bena Amona;

¹⁷ne buloba bua Alabâ kabidi ne tshibanda tshia Yadene ku Kinelete tô ne ku dishiha dia Alabâ, Dishiba dia Luehu, kuinshi kua mukuna wa Pisega ku esete.

¹⁸Nakanuambila ku tshikondo atshi ne, Yehowa, Nzambi wenu, wakanuha buloba abu bu buhianyi: bena nvita nebasabuke ne bintu bia nvita ku mpala kua bana benu ba Bena Isalele.

¹⁹Kadi bakashi benu ne bana benu bakese ne bimuna (ndi mumanye ne, Nudi ne bimuna bia bungi) nebishale mu misoko nakanuha,

²⁰tô ne haha Yehowa baha benu dikisha bu nuenu, ne bobo badi bahiana buloba budi Yehowa, Nzambi wenu, ubaha, dishiya dia Yadene; hashishe nenuhingane muntu ne muntu ku buhianyi buandi bunakamuha.

²¹Nakambila Yoshua ku tshikondo atshi ne, Mesu ebe akatangila malu onso akenzela Yehowa, Nzambi wetu, bakelenge aba babidi: Yehowa nênzele makelenge onso nunku a kunudi nuya.

²²Kanubatshinyi, bualu bua Yehowa, Nzambi wenu, udi unuluila nvita.

²³Nakasengelela Yehowa ku tshikondo atshi, nakamba ne,

²⁴Mukelenge Yehowa, wewe wakabanga kulesha muntu webe bunene buebe, ne tshianza tshiebe tshikole: nzambi kai udi mu diulu anyi udi ha buloba udi mua kuenza bu mûdi wenza malu ebe a kukema?

²⁵Witabushe bua meme nsabuke, utangile buloba buimpe budi dishiya dia Yadene, mukuna au muimpe, ne Lebanona.

²⁶Kadi Yehowa wakadi nʼanyi tshiji bua bualu buenu, yeye kena mungunvuile; Yehowa wakangambila ne, Kuakushika, kungambidi bualu ebu kabidi.

²⁷Ubande biebe ku mutu kua Pisega, bandisha mesu ebe ku luseke lua ku wesete ne lua ku nôde ne lua ku Sude ne lua ku esete, tangila ne mesu ebe, bualu bua wewe kuena usabuka Yadene eu.

²⁸Kadi Wambile Yoshua dî, ushindike mutshima wandi, umukoleshe; bualu bua yeye neasabuke ku mpala kua bantu aba, neabahianyishe buloba budi utangila.

²⁹Nunku tuakashikama mu tshibanda tshitangilangane ne Bete-peô.