Read tshiluba Dutelonone 30 Bible Online

Dutelonone 30 - tshiluba bible

Dutelonone 30

¹Halua malu au onso kunudi ne disanka ne mulau, binakuteka ku mpala kuenu, ne hanuayuluka malu au munkatshi mua bisamba bidi Yehowa, Nzambi wenu, unutuma munkatshi muabi,

²ne hanuakudimuna mitshima yenu kudi Yehowa, Nzambi wenu, bua kutumikila mei andi ne mitshima yenu yonso ne mioyo yenu yonso, bu munakunuambila lelu, ne nuenu ne bana benu;

³hashishe Yehowa, Nzambi wenu, neakudimune buluka buenu, neanuleshe luse, neahingane kunudi, neanusangishe ba munkatshi mua bantu bonso muakanumuangalasha Yehowa, Nzambi wenu.

⁴Bikala bakuabo bamuangalake tô ne ku ditengu dia diulu, Yehowa, Nzambi wenu, neabasangisheku, neabahingisheku kabidi;

⁵ne Yehowa, Nzambi wenu, nealue nʼenu mu buloba bua batatu benu, ne nuenu nenubuhiane; yeye neanuenzele bimpe, neanuvudishe ha mutu ha hatatu benu.

⁶Yehowa, Nzambi wenu, neanutengule mu mitshima yenu ne ya bana benu, bua nuenu kunanga Yehowa, Nzambi wenu, ne mitshima yenu yonso ne mioyo yenu yonso, bua nuenu kuikala ne muoyo.

⁷Yehowa, Nzambi wenu, neateke milau ei yonso hamʼbidi ha bena lukuna ne badi nʼenu tshiji, bakadi banukengesha.

⁸Nuenu nenuhingane, nenutumikile dî dia Yehowa, nenuenze mikenji yonso inakunuambila lelu.

⁹Yehowa, Nzambi wenu, neanuvudishile disanka mu mudimu wonso unudi nuenza ne bianza, ne mu kukumbasha kua bana ne mu kukumbasha kua bimuna bienu ne mu bintu bionso bidi bidiunda mu buloba; bualu bua Yehowa neikale ne disanka bualu buenu, bu muakasankeye bualu bua batatu benu;

¹⁰binuatumikila dî dia Yehowa, Nzambi wenu, bua kuenza mikenji yandi ne mei andi bidi bifunda mu mukanda eu wa mikenji: binuakudimuka kudi Yehowa, Nzambi wenu, ne mitshima yenu yonso ne mioyo yenu yonso.

¹¹Bualu bua mikenji ei inakunuambila lelu kayena minuhite bukole bua nuenu kuyenza; kayena kule.

¹²Kayena mu diulu bua nuenu nuambe ne, Nganyi neahande mu diulu bua kulua ne mikenji kutudi, ne bua kutunyuisha bua tuetu kuyenza?

¹³Mikenji ei kayena dishiya dia mai manene, bua nuenu nuambe ne, Nganyi watusabukila dishiya dia mai manene bua kulua nʼai kutudi ne bua kutunyuisha bua tuetu kuyenza?

¹⁴Kadi dî edi didi ha buihi nʼenu ne mukana muenu ne mu mitshima yenu, bua nuenu kudienza.

¹⁵Tangilai, nakuteka muoyo ne malu mimpe, ne lufu ne malu mabi ku mpala kuenu lelu;

¹⁶mukenji unakunuelela lelu bua kunanga Yehowa, Nzambi wenu, ne bua kuenda mu nshila yandi ne bua kutumikila mikenji yandi ne mei andi ne mikandu yandi: nunku nenuikale ne muoyo, nenukumbane ba bungi, ne Yehowa, Nzambi wenu, neanuvudishile disanka mu buloba bunuyaya kubuhiana.

¹⁷Kadi bikala mitshima yenu mihambuke, ne binuikala kanuyi nunyua, kadi binuatendelela nzambi mikuabo bua kuyikuatshila mudimu,

¹⁸meme ndi nnuambila lelu ne, Nenujimishibue bulelela; kanuena nuvudisha matuku enu mu buloba bunuyaya dishiya dia Yadene bua kubuhiana.

¹⁹Meme ndi mbikila diulu ne buloba bu bamonyi ba bualu ne, Nakuteka muoyo ne lufu, ne disanka ne mulau ku mpala kuenu lelu: muiku nudisunguile muoyo, nenuikale ne muoyo ne nuenu ne bana benu,

²⁰bua kunanga Yehowa, Nzambi wenu, ne bua kutumikila dî diandi, ne bua kumulamata; bualu bua yeye udi muoyo wenu ne muvudishi wa matuku enu; nunku nenushikame mu buloba buakalaya Yehowa batatu benu, Abalahama ne Isaka ne Yakoba, bua kubahabu.