Read tshiluba Dutelonone 6 Bible Online

Dutelonone 6 - tshiluba bible

Dutelonone 6

¹Ei mmikenji ne â mmei ne â mmalu wakangambila Yehowa bua kunumanyisha, bua nuenu nubienze mu buloba bunudi nuhiana:

²bua nuenu nutshine Yehowa, Nzambi wenu, bua kutumikila mei andi onso ne mikenji yandi, binakanuambila, ne wewe ne muanʼebe mulume, ne muana wa muanʼebe mulume, matuku onso a muoyo wenu; bua wewe uvudishe matuku ebe.

³Unvuai, Isalele, nubienze; bua nuenu nukume dikasa dimpe, ne bua nuenu nukumbane ba bungi, bu muakanulaya Yehowa, Nzambi wa batatuʼenu, mu buloba budi bûle tente ne mabele ne buitshi.

⁴Unvuai Isalele, Yehowa, Nzambi wetu, udi biandi Yehowa umue;

⁵sua Yehowa, Nzambi webe, ne mutshima webe wonso, ne muoyo webe wonso, ne bukole buebe buonso.

⁶Mei au anakukuambila lelu eu ikale mu mutshima webe;

⁷wewe newayishe bana bebe, wewe neusombelele nʼabo bua mei au, hawashikama mu nsubu webe, ne hawenda mu nshila, ne hawalala, ne hawabika.

⁸Wewe newasuike bu tshimanyinu ku tshianza tshiebe, ne hankatshi ha makiki.

⁹Newafunde ha minoko ya bibi bia nsubu webe, ne ha bibi bia mishiku ya luhangu luebe.

¹⁰Hashishe halua Yehowa, Nzambi wenu, nʼenu mu buloba buakalayeye batatu benu, Abalahama ne Isaka ne Yakoba, bua kunuhabu, misoko minene ne miakane mudi kanuyi bibake,

¹¹ne nsubu miule tente ne bintu bimpe mudi kanuyi bûshe, ne mena a mai akumbulabo, anudi kanuyi bumbule, ne madimi a tumuma tukese ne mitshi ya olive, binudi kanuyi bakune; nuenu nenudie, nenukute mafu tente;

¹²hashishe nudimukai, bua kanuhu muoyo bua Yehowa wakanuhatula mu buloba bua Ejipitu ne mu nsubu wa buluka.

¹³Nutshine Yehowa, Nzambi wenu, numuenzele yeye nkayandi mudimu, nuditshihe kudi dina diandi.

¹⁴Kanulondi nzambi mikuabo ya bantu badi ha buihi nʼenu;

¹⁵bualu bua Yehowa, Nzambi wenu, udi munkatshi muenu, udi Nzambi wa mukau, bua tshiji tshia Yehowa, Nzambi wenu, katshikadi kunudi, ne bua yeye kanujimishi ha mutu ha buloba.

¹⁶Kanutetshi Yehowa, Nzambi wenu, munda bu munuakamuteta mu Masa.

¹⁷Nutumikile mikenji ya Yehowa, Nzambi wenu, ne mei akanuambileye ne malu andi akanumanyisheye.

¹⁸Nuenze anu malu adi makane ne mimpe ku mesu kua Yehowa; bua nuenu nukume dikasa dimpe, ne bua nuenu nubuele ne nuhiane buloba buimpe buakalaya Yehowa batatu benu,

¹⁹bua kunuihatshila bantu bonso badi nʼenu lukuna ku mpala kuenu, bu muakamba Yehowa.

²⁰Hakukonkabo kudi muanʼebe mulume ne, Mei au ne mikenji ne malu biakanuambila Yehowa, Nzambi wenu, bidi tshinyi?

²¹Hashishe newambile muanʼebe mulume ne, Tuakadi bahika ba Palo mu Ejipitu, ne Yehowa wakatuhatula mu Ejipitu ne tshianza tshikole;

²²ne Yehowa wakatulesha bimanyinu ne malu a kukema a bungi ne makole mu Ejipitu ne kudi Palô ne ba mu nsubu muandi, ku mesu kuetu;

²³yeye wakatuhatulamu, bualu bua kulua nʼetu ne bua kutuha buloba buakalayeye batatu betu.

²⁴Yehowa wakatuela mikenji ei, bua tuetu tutshine Yehowa, Nzambi wetu, bua yeye atuenzele bimpe matuku onso, bua tuetu tuikale ne muoyo utudi nʼau lelu eu.

²⁵Bituenza mikenji ei ku mesu kua Yehowa, Nzambi wetu, bu muakabambileye, netubadibue ne mbakane.