Read tshiluba Yone 1 Bible Online

Yone 1 - tshiluba bible

Yone 1

¹Ku tshibangidilu Dî diakadiku, Dî diakadi ne Nzambi, Dî diakadi Nzambi.

²Diodi diakadi ne Nzambi ku tshibangidilu.

³Bintu bionso biakafukibua kudiye; kakuena tshintu tshiakafukibua kudi mukuabo, anu kudiye.

⁴Munda muandi muakadi muoyo; muoyo au wakadi munya wa bantu.

⁵Munya udi utema mu midima, kadi mîdima kayakautamba bukole.

⁶Muntu wakalua, mutuma kudi Nzambi, dina diandi Yone.

⁷Yeye wakalua bu mumanyi wa bualu bua kumanyisheye bantu bua munya, bua buonso buabo bitabushile bua dî diandi.

⁸Yeye kakadi munya mene, wakaluila anu bua kumanyisha bantu bualu bua munya.

⁹Munya mulelela wakadiku, wakadi ulua ha buloba, utemena bantu bonso.

¹⁰Yeye wakadi ha buloba, buloba buakafukibua kudiye, kadi ba ha buloba kabakamumanya.

¹¹Wakalua kudi bintu biandi, kadi bantu bandi mene kabakamuitabusha.

¹²Yeye wakaha bonso bakamuitabusha bukole bua kuluabo bana ba Nzambi, bobo mene badi bitabusha dina diandi;

¹³bakadi kabai baledibue kudi mashi, anyi kudi disua dia mubidi, anyi kudi disungula dia muntu, kadi bakaledibua kudi Nzambi.

¹⁴Dî diakakudimuka muntu, diakuikala munkatshi muetu tshituha, diakadi diule tente ne ngasa ne bulelela; tuakumona butumbi buandi, buakadi bu bua muana umuehele udi mulela kudi Tatu wandi.

¹⁵Yone wakambila bantu bualu buandi, wakela dî bikole ne, Kayeu unakuamba ne, Ulualua ku nyima kuanyi udi muntambe, bua yeye wakadiku ku mpala kuanyi.

¹⁶Buonso buetu tuakuangata tshiuwidi tshiandi, ne ngasa ha mutu ha ngasa.

¹⁷Mose wakatuha mikenshi, kadi ngasa ne bulelela biakafuma kudi Yesu Kilisto.

¹⁸Kakuena muntu wakuanza kutangila Nzambi; Muana umuehele mulela udi mu tshiadi tshia Tatu, yeye wakamuamba.

¹⁹Edi ndî dia Yone hakatuma Bena Yuda ba mu Yelushalema bakuidi ba Nzambi ne Bena Lewi kudiye bua kumuebesha ne, Wewe nganyi?

²⁰Wakitabusha, kakavila, wakitabusha ne, Meme tshiena Kilisto.

²¹Bakamukonka ne, Ahu udi nganyi? Wewe udi Eliya, anyi? Wakamba ne, Tshiena yeye. Bakamukonka kabidi ne, Wewe mmuprofete au, anyi? Wakamba ne, Nasha.

²²Bakamukonka ne, Wewe nganyi, bua tuhingashe di kudi bakututuma? Wewe udi udiamba nganyi?

²³Wakamba ne, Ndi bianyi di dia muntu udi wela lubila mu tshihela ne, Nululamishe nshila wa Mukelenge, bu muakamba muprofete Yeshaya.

²⁴Bakatumibua kudi Bafalese.

²⁵Bakamuebesha ne, Biwikala kui Kilisto, kui Eliya, kui muprofete au, tshiudi ubatijila bantu ntshinyi?

²⁶Yone wakabakudimuna di ne, Ndi mbatiza bantu mu[1] mai; munkatshi muenu mudi muimane unudi kanui bamanye,

²⁷yeye mene ulualua ku nyima kuanyi, tshiena ne buakane bua kusulula mionshi ya bisabata biandi.

²⁸Malu â akadi enjibua mu Betania dishia dia Yadene, muakadi Yone ubatiza.

²⁹Hakatshiabu, yeye wakamona Yesu ulua kudiye, wakamba ne, Tangilai, Muanʼa mukoko wa Nzambi, udi umusha bubi bua ba ha buloba!

³⁰Kayeyʼeu unakuamba ne, Ku nyima kuanyi kulualua muntu udi muntambe, bualu bua yeye wakadiku ku mpala kuanyi.

³¹Meme tshiakumumanya; kadi nakuluila mbatiza bantu mu[2] mai bualu bua kumumuenesha kudi Isalele.

³²Yone wakamba ne, Nakumona Nyuma uhueka mu diulu bu nyunyu wa nkutshi, wakumuikila.

³³Tshiakumumanya; kadi wakantuma bua kubatiza bantu mu mai wakungambila ne, Muntu uwatangila Nyuma uhuekela hamʼbidi handi, mumuikile, yeye nguabatiza bantu mu Nyuma Muimpe.

³⁴Nakumona bualu ebu, ne nakumanyisha bantu ne, Eu udi Muana wa Nzambi.

³⁵Hakatshiabu kabidi, Yone wakadi muimane ne bayidi bandi babidi.

³⁶Wakatangila Yesu talala, hakadiye wenda, wakamba ne, Tangilai, Muanʼa mukoko wa Nzambi:

³⁷Bayidi babidi bakunvua dî diakambeye, bakalonda Yesu.

³⁸Yesu wakatshinguluka, wakabamona bamulonda, wakabakonka ne, Nudi nukeba tshinyi? Bakamuebesha ne, Labi (kukudimuna kua muaku ne, Muyishi), wewe udi wikala kudi kunyi?

³⁹Yeye wakabambila ne, Luai numone. Bakaya, bakamona kuakadiye mutule. Bobo bakashala nʼandi difuku adi; diba diakadi bu ha inai.

⁴⁰Babidi bakunvua dî dia Yone, bakalonda Yesu, mukuabo wakadi Andele, muanʼabo ne Simona Petelo.

⁴¹Yeye wakasangana muanʼabo Simona diambedi, wakamuambila ne, Tuakumona Mashiya (kukudimuna kua muaku ne, Kilisto).

⁴²Wakalua nʼandi kudi Yesu. Yesu wakamumona wakamuambila ne, Wewe udi Simona, muana wa Yona; nebakuidike dina ne, Kefa (kukudimuna kua muaku ne, Petelo).

⁴³Hakatshiabu, wakamba kuya mu Galela, wakasangana Filipo. Yesu wakamuambila ne, Undonde.

⁴⁴Filipo wakadi Muena Bete-saiîa, musoko wa Andele ne Petelo.

⁴⁵Filipo wakasangana Natanaele, wakamuambila ne, Tuakumona wakafunda Mose mu mikenshi, ne baprofete, Yesu wa ku Nazaleta, muana wa Yosefe.

⁴⁶Natanaele wakamuebesha ne, Tshintu tshimpe tshidi tshimanye mua kufuma mu Nazaleta, anyi? Filipo wakamuambila ne, Lua umone.

⁴⁷Yesu wakatangila Natanaele ulua kudiye, wakamuamba ne, Tangilai, yeye udi Muena Isalele bulelela, udi kai ne lubombo.

⁴⁸Natanaele wakamukonka ne, Wewe udi munmanye meme kudi kunyi? Yesu wakamuandamuna ne, Diambedi Filipo kai muanze kukubikila, hawakadi munshi mua mutshi wa nfigi, nakukutangila.

⁴⁹Natanaele wakamuandamuna ne, Labi, wewe udi Muana wa Nzambi, wewe udi Mukelenge wa Isalele.

⁵⁰Yesu wakamukonka ne, Wewe udi witabusha bualu bua nakukuambila ne, Nakukutangila munshi mua mutshi wa nfigi, anyi? Neumone malu ahita abu.

⁵¹Wakamuambila ne, Bulelela, bulelela, ndi nuambila ne, Nenumone diulu dibulula ne banjelo babanda bahueka ha Muana wa muntu.