Read tshiluba Yone 11 Bible Online

Yone 11 - tshiluba bible

Yone 11

¹Muntu wakadiku, wakadi usama, dina diandi Lazalo wa mu Betania, musoko wa Malia ne muanʼabo Mâta.

²Au Malia wakela Mukelenge mananashi, wakamukuhula makasa andi ne nsuki, muanʼabo Lazalo nguakadi usama.

³Bana babo ba bakashi bakatumina Yesu dî ne, Mukelenge, ûdi musue udi usama.

⁴Hakunvua Yesu dî edi, wakamba ne, Edi kadiena disama dia lufu, kadi didi bualu bua butumbi bua Nzambi ne bua Muana wa Nzambi kutumbishibueye.

⁵Yesu wakasua Mâta, ne muanʼabo wa bakashi, ne Lazalo.

⁶Hakunvueye bualu bua disama diandi, wakashikama kuakadiye matuku abidi.

⁷Hashishe wakambila bayidi bandi ne, Tuyai mu Yudaya kabidi.

⁸Bayidi bakamuambila ne, Labi, Bena Yuda bakadi bakeba kukukuma mabue anu katataka, wewe uyayaku kabidi, anyi?

⁹Yesu wakabakudimuna ne, Munya mujima kawena ne bituha bia diba dikumi ne bibidi, anyi? Biendakana muntu mu munya, yeye kena ulenduka, bua yeye udi utangila munya wa buloba ebu.

¹⁰Kadi biendakana muntu mu butuku, udi ulenduka, bua munya kawena munda muandi.

¹¹Hakambeye malu â, wakabambila ne, Mulunda wetu Lazalo udi mulale tulu; kadi ndi nya kumubisha mu tulu.

¹²Bayidi bakamuambila ne, Mukelenge, bikaleye mulale tulu, neasangale.

¹³Yesu wakadi wamba bua lufu luandi; kadi bobo bakadi bela meshi ne, Budiye wamba anu bua tulu.

¹⁴Hashishe Yesu wakabajukuila ne, Lazalo udi mufue;

¹⁵ne ndi nsanka bua bualu buenu bualu bua tshiakadiku, bua nuenu kungitabusha; tuyai kudiye.

¹⁶Toma, udibo babikila ne, Didumo, wakambila bayidi nʼandi ne, Tuyai kabidi, bua tuetu tufue nʼandi.

¹⁷Hakalua Yesu, wakamusangana mumane kulala mu lukita matuku anai.

¹⁸Betania wakadi hehi ne Yelushalema, ntanta bu ya kilometa isatu;

¹⁹Bena Yuda ba bungi bakadi balue kudi Mâta ne Malia bua kubasamba bua muanʼabo.

²⁰Hakunvua Mâta ne, Yesu ulualua, wakaya kumuakidila; kadi Malia wakashala mushikame mu nsubu.

²¹Mâta wakambila Yesu ne, Mukelenge, bu wewe muikale kunoko, muanʼetu kakadi kufua.

²²Ne katataka mene ndi mumanye ne, Tshionso tshiwalomba Nzambi, Nzambi neakuhetshi.

²³Yesu wakamuambila ne, Muanʼenu neabike kabidi.

²⁴Mâta wakamuambila ne, Ndi mumanye ne, Yeye neabike dituku dia kunshikidilu diabika bantu bonso kabidi.

²⁵Yesu wakamuambila ne, Meme ndi bianyi dibisha, ndi bianyi muoyo; udi ungitabusha, nasha biafueye, neikale ne muoyo kabidi;

²⁶muntu yonso udi ne muoyo, udi ungitabusha, kena ufua tshiendelele. Wewe udi witabusha dî edi, anyi?

²⁷Yeye wakamuambila ne, Bulelela, Mukelenge, nakuitabusha ne, Wewe udi Kilisto, Muana wa Nzambi, nyeye ulualua ha buloba.

²⁸Hakambeye nunku, wakaya, wakabikila muanʼabo Malia mu busokoko, wakamuambila ne, Muyishi wakulua, udi ukubikila.

²⁹Hakunvueye dî edi, wakabika lubilu, wakaya kudiye.

³⁰Yesu kakanza kulua mu musoko, wakatshidi kuakasangila ngandi Mâta.

³¹Bena Yuda bakadi nʼandi mu nsubu bamusamba, hakamonabo Malia ubika lubilu uluhuka, bakamulonda bamanye ne, Yeye Uyaya ku lukita bua kudilaku.

³²Hakalua Malia kudi Yesu, hakamumoneye, wakahonena ku makasa andi, wakamuambila ne, Mukelenge, bu wewe muikale kunoko, muanʼetu kakadi kufua.

³³Hakamutangila Yesu udila ne Bena Yuda bakalua nʼandi badila, tshishi tshiakûla munda muandi tente, mubidi wandi wakakanka,

³⁴wakakonka ne, Nuakumujika kudi kunyi? Bakamuambila ne, Mukelenge, lua umone.

³⁵Yesu wakashikunka.

³⁶Bena Yuda bakamba ne, Tangilai muakumusueye.

³⁷Kadi bakuabo bakamba ne, Muntu eu wakatabasha mesu a wakadi mufofo, kakamanya mua kusungila muntu eu, kafu biandi, munyi?

³⁸Yesu wakalua ku lukita ne tshishi tshiule munda muandi tente kabidi. Luakadi lua lubuebue, dibue diakadi dibuikilaku.

³⁹Yesu wakamba ne, Umushai dibue. Kadi Mâta, muanʼabo ne mufue wakamuambila ne, Mukelenge, yeye ukadi ununka katataka, ukadimu matuku anai.

⁴⁰Yesu wakamukonka ne, Tshiakukuambila ne, Biwitabusha, neumone butumbi bua Nzambi, anyi?

⁴¹Bakumusha dibue. Yesu wakabandisha mesu mulu, wakamba ne, Tatu, ndi nkusakidila bua wewe wakunvua dî dianyi.

⁴²Nakumanya ne, Wewe udi unvua mei anyi matuku onso; kadi nakuamba dî edi bualu bua bantu badi bimane banyunguluke bitabushe ne, Wewe udi muntume.

⁴³Hakambeye nunku, wakela dî diandi bikole ne, Lazalo, luhuka.

⁴⁴Wakadi mufue wakaluhuka, munyengela bilulu ku bianza ne ku makasa. Ku mpala kuandi kuakadi kunyengela tshitambala. Yesu wakabambila ne, Numujingulule, aye biandi.

⁴⁵Bena Yuda ba bungi, bakadi balue kudi Malia, bakamuitabusha, hakamonabo bualu buakenzeye.

⁴⁶Kadi bakuabo bakaya kudi Bafalese, bakabambila malu akenza Yesu.

⁴⁷Nunku bakuidi banene ne Bafalese bakadisangisha mu tshifufu, bakakonkangana ne, Muntu eu udi wenza bimanyinu bia bungi, neluenze tshinyi?

⁴⁸Bituamulekela hatuhu, bantu bonso nebamuitabushe; Bena Lomo nebalue, nebanyenge muaba wetu ne tshisamba tshietu.

⁴⁹Kadi umue wabo, dina diandi Kayafa, wakadi ha mutu ha bakuabo tshidimu atshi, wakabambila ne, Nuenu kanuena bamanye bualu,

⁵⁰kanuena nuela meshi ne, Mbualu buakane kunudi bua muntu umue afuile bantu, ne tshisamba tshionso katshifu.

⁵¹Yeye kakadiambila dî edi; kadi bualu bua yeye wakadi ha mutu ha bakuidi tshidimu atshi, wakamba bualu buakadi kabui buanze kulua ne, Yesu neafuile tshisamba tshietu;

⁵²yeye kakafuila anu tshisamba tshimue, kadi wakafuila bua kusangisha mu tshisumbu tshimue bana ba Nzambi bakadi batangadike.

⁵³Ku dituku adi tô bakadi basangisha dî diabo bua kumushiha.

⁵⁴Bua bualu ebu Yesu kakendakana munkatshi mua Bena Yuda kabidi; wakumukaku, wakaya mu luseke luakadi hehi ne tshihela, ku musoko dina diau Efelayima; wakalalaku ne bayidi.

⁵⁵Disanka dia Kuhita kua Yehowa dia Bena Yuda diakadi ha buihi; ba bungi bakumuka mu nseke yabo, bakaya ku Yelushalema diambedi Kuhita kua Yehowa kakui buanze kufika, bua kudiuvuabo.

⁵⁶Bakadi bakeba Yesu; hakadibo bimane mu ntempelo, bakakonkangana ne, Nudi nuelangana meshi munyi? Kena ulua ku disanka edi, anyi?

⁵⁷Bakuidi banene ne Bafalese bakamana kuela mukenshi ne, Hamanya muntu kudiye, aleshe kudiye, bamukuate.