Read tshiluba Yone 19 Bible Online

Yone 19 - tshiluba bible

Yone 19

¹Hashishe Pilato wakangata Yesu, wakamukuma.

²Masalayi akaluka tshifulu tshia bukelenge tshia meba akamubuesha ku mutu, akamuluatshisha tshikowelu tshikunze;

³akalua kudiye, akamuambila ne, Muoyo, Mukelenge wa Bena Yuda. Akamukuma.

⁴Pilato wakaluhuka, wakalua kudibo kabidi, wakabambila ne, Tangilai, nakulua nʼandi kunudi bua nuenu mimanye ne, Tshiena mumusangane ne dihila.

⁵Yesu wakaluhuka muluate tshifulu tshia meba ne tshikowelu tshikunze. Pilato wakabambila ne, Monai, muntu eu kayeu!

⁶Hakamumona bakuidi banene ne tuhalai, bakela mbila ne, Umushihe ku mutshi mutshiamakane, umushihe ku mutshi mutshiamakane. Pilato wakabambila ne, Nuenu nudiangatshileye, numushihe; meme tshiena mumusangane ne dihila.

⁷Bena Yuda bakamukudimuna ne, Tudi ne mukenshi wetu, mbimpe bia yeye afue biandi bu mudi mukenshi wetu, bua yeye wakudivuisha bu Muana wa Nzambi.

⁸Hakunvua Pilato dî edi, wakatamba kutshina;

⁹wakabuela kabidi mu nsubu munene wa mukelenge, wakakonka Yesu ne, Wewe Wakufuma kudi kunyi? Kadi Yesu kakamukudimuna dî.

¹⁰Pilato wakamuambila ne, Kuena ungambila dî? Kuena munmanye ne, Meme ndi ne bukokeshi bua kukulekela, ndi ne bukokeshi kabidi bua kukushiha ku mutshi mutshiamakane?

¹¹Yesu wakamuandamuna ne, Bu bukokeshi kabui bukuhebue kudi wa mu diulu, wewe kuakadi kuikala nʼabu bua kungenzela bualu; bua bualu ebu nunku wakunfila mu bianza biebe ngudi ne bualu butambe bubi.

¹²Ha diba adi Pilato wakakeba mua kumulekela; kadi Bena Yuda bakela mei abo bikole ne, Biwalekela muntu eu, kuena mulunda wa Kaisa; muntu yonso udi udivuisha bu mukelenge udi utombokela Kaisa.

¹³Hakunvua Pilato mei â, wakaluhuka ne Yesu, wakashikama mu nkuasa wa bulumbuludi ha muaba wakadibo babikila ne, Wa Mabue Malongolola Hanshi, kadi mu Buena Yuda ne, Gabata.

¹⁴Dilongolola dia Kuhita kua Yehowa diakafika, diba diakadi bu munda munya. Yeye wakambila Bena Yuda ne, Monai Mukelenge wenu!

¹⁵Bakela mei abo bikole ne, Umumushe, umumushe, umushihe ku mutshi mutshiamakane! Pilato wakabakonka ne, Nshihe Mukelenge wenu, anyi? Bakuidi banene bakamukudimuna ne, Katuena ne mukelenge mukuabo, anu Kaisa.

¹⁶Hashishe yeye wakamufila mu bianza biabo bua kumushihabo ku mutshi mutshiamakane.

¹⁷Bakangata Yesu; yeye wakaluhuka mudituadile mutshi wandi mutshiamakane, wakaya ku muaba udibo babikila ne, Muaba wa Kabalubalu ka Mutu, mu Buena Yuda ne, Gologota.

¹⁸Bakamukuminaku milonda mu bianza ne ku makasa ku mutshi mutshiamakane, bakenzela bakuabo babidi muomumue, mukuabo eku, munga eku, Yesu hankatshi.

¹⁹Pilato wakafunda makanda, wakauteka ku mutshi mutshiamakane. Wakafunda ne: YESU WA MU NAZALETA, MUKELENGE WA BENA YUDA.

²⁰Bena Yuda ba bungi bakabala mukanda eu, bualu bua muaba wakashihabo Yesu wakadi hehi ne musoko; mukanda wakadi mufunda mu muaku wa Bena Yuda ne wa Bena Lomo ne wa Bena Gelika.

²¹Kadi bakuidi banene ba Bena Yuda bakambila Pilato ne, Kufundi ne, Mukelenge wa Bena Yuda; ufunde ne, Yeye wakamba ne, Ndi Mukelenge wa Bena Yuda.

²²Pilato wakabambila ne, Nakuenda munakufunda.

²³Masalayi, hakamukuminau milonda mu bianza ne ku makasa ku mutshi mutshiamakane, akangata bilulu biandi akabanyangana anai, disalayi biadi, disalayi biadi; ne tshikowelu tshiandi kabidi, kadi tshikowelu katshiakadi ne mitelu, tshiakadi tshikuma tshijima kulu tô ne hanshi.

²⁴Bakambilangana ne, Katutshihandi, tutshielele nshobo ne tshikala tshia nganyi; nunku bakashikisha dî diakafundabo mu Mukanda wa Nzambi ne, Bakabanyangana bilulu bianyi, Bakelela tshikowelu tshianyi nshobo. Masalayi akenza nunku.

²⁵Kadi mamu wandi, ne muanʼabo ne mamu wandi mukashi, ne Malia mukashi wa Kelopa, ne Malia wa ku Magadala, bakadi bimane hehi ne mutshi mutshiamakane wa Yesu.

²⁶Hakamona Yesu mamu wandi ne muyidi wakadiye musue muimahe ha buihi, wakambila mamu wandi ne, Mukashi, muanʼebe kayau.

²⁷Wakambila muyidi ne, Mamu webe kayau. Ha diba adi mene muyidi au wakaya ngandi ku nsubu kuandi.

²⁸Hashishe Yesu wakamanya ne, Malu onso akushika; bualu bua kushikisha dî diakadi difunda mu Mukanda wa Nzambi, yeye wakamba biandi ne, Ndi ne nyota.

²⁹Dilonga diakadihu diule tente ne nvinega; bakateka musukulampampa mûsha tente ne nvinega ku mutshi wa hisopa, bakauteka ku mishiku yandi.

³⁰Hakangateye nvinega, wakamba ne, Bualu buakushika; wakinyika mutu, wakahuola muoyo.

³¹Dituku adi diakadi dia Dilongolola; bualu bua bitalu kabishadî ku mitshi mitshiamakane dia Lumingu (Lumingu alu luakadi dituku dinene), Bena Yuda bakalomba Pilato bua kubitshibulabo bibelu ne kubiumusha.

³²Masalayi akalua, akutshibula bibelu bia wa kumudia, ne bia mukuabo wakabashihabo nʼandi ku mutshi mutshiamakane;

³³kadi hakalau kudi Yesu, akamusangana mumane kufua, kâkatshibula bibelu biandi.

³⁴Kadi dinga disalayi diakamutua difuma mu lubadi, mashi ne mai biakahatuka.

³⁵Wakatangila bualu abu nguakabuamba, dî diandi ndelela; udi mumanye biandi, ne, Dî dianyi ndilelela, bua nuenu kabidi nuitabushe.

³⁶Malu â akulua bua kushikisha dî diakafundabo mu Mukanda wa Nzambi ne, Kabena batshibula mukuha wandi.

³⁷Dinga dî didi mu Mukanda wa Nzambi kabidi ne, Nebatangile wakutuabo difuma.

³⁸Hakashika malu â, Yosefe wa ku Alimataya, wakadi muyidi wa Yesu mu musokoko bualu bua wakadi utshina Bena Yuda, wakalomba Pilato bua kuangata tshitalu tshia Yesu; Pilato wakitabusha. Nunku yeye wakalua, wakangata tshitalu tshiandi.

³⁹Nikodemo, nguakalua kudi Yesu butuku diambedi, wakalua ne mula ne alo bisangisha, biakadi ne bujitu bua kilogama bu makumi anai.

⁴⁰Bakangata tshitalu tshia Yesu, bakatshinyengela ne bintu ebi bia muhuya muimpe mu bilulu bia line, bu mudi tshilele tshia Bena Yuda ha kujikabo bantu.

⁴¹Kuakashihelabo Yesu kuakadi muaba wa mitshi ya mamuma; mu muaba au muakadi lukita luhia-luhia, muakadi tshitalu katshi tshianze kujikibuamu diambedi.

⁴²Bualu bua Dilongolola dia Bena Yuda, ne bua lukita luakadi ha buihi, bakajikamu Yesu.