Read tshiluba Yone 2 Bible Online

Yone 2 - tshiluba bible

Yone 2

¹Hakahita matuku asatu, dibaka diakadi mu Kana wa Galela; mamu wa Yesu wakadiku;

²bakabikila Yesu ne bayidi bandi ku dibanji.

³Hakashika nyinyo, mamu wa Yesu wakamuambila ne, Kabena ne nvinyo.

⁴Yesu wakamuambila ne, Mukashi, ndi nʼebe bualu kai? Diba dianyi kadiena dianze kulua.

⁵Mamu wandi wakambila bena mudimu ne, Enzai muanuambileye.

⁶Milondo isambombo ya mai misonga ya mabue yakadi nutekela bua mai a kuowa bu mudi tshilele tshia Bena Yuda, mulondo lita makumi tshitema, mulondo lita makumi tshitema.

⁷Yesu wakabambila ne, Nûshe milondo tente ne mai. Bakayûsha tô ne ku mibangu yai.

⁸Yeye wakabambila ne, Nutunte, nuye nʼandi kudi udi ha mutu ha dibanji. Bakaya nʼandi.

⁹Hakalabula wakadi ha mutu ha dibanji mai akukudimuka nvinyo, hakadiye kai mumanye kuakufumeye (kadi bena mudimu bakatuma mai bakamanya), wakadi ha mutu ha dibanji wakabikila mubaki wa mukashi,

¹⁰wakamuambila ne, Bantu bonso batu bafila nvinyo muimpe diambedi; hanuabo wa bungi, nebafile udi kai muimpe ku nyima; kadi wewe wakuteka nvinyo muimpe tô ne katataka.

¹¹Bualu ebu buakenza Yesu mu Kana wa Galela buakadi bua kumudilu bua bimanyinu biandi, wakalesha bantu butumbi buandi; bayidi bandi bakamuitabusha.

¹²Hakashika malu â, wakaya ne mamuʼandi, ne bana babo, ne bayidi bandi ku Kapênuma; kabakashalamu matuku a bungi.

¹³Disanka dia Kuhita kua Yehowa dia Bena Yuda diakadi ha buihi, Yesu wakabanda ku Yelushalema.

¹⁴Wakasangana mu ntempelo bahanyi ba ngombe ne mikoko ne nyunyu ya nkutshi, ne bashintakashi ba mpalata[3] bashikame;

¹⁵yeye wakasuikakasha muonshi ne tuonshi tukese wakîhata buonso buai mu ntempelo ne mikoko ne ngombe, wakitshikisha mpalata ya bashintakashi, wakatokola mesa abo;

¹⁶wakambila bahanyi ba nyunyu ya nkutshi ne, Umushai bintu ebi; kanuvuishi nsubu wa Tatu wanyi bu wa bendi ba mushinga.

¹⁷Bayidi bandi bakavuluka dî didi difunda mu Mukanda wa Nzambi ne, Lukunukuna lua ku nsubu webe nelundie.

¹⁸Bena Yuda bakamuebesha ne, Bualu bua wewe udi wenza nunku, udi utulesha tshimanyinu kai?

¹⁹Yesu wakabakudimuna dî ne, Bumbulai ntempelo eu, nemubishe kabidi matuku asatu.

²⁰Bena Yuda bakamba ne, Bakibaka ntempelo eu bidimu makumi anai ne bisambombo, wewe neumuibake kabidi matuku asatu, anyi?

²¹Kadi yeye wakadi wamba bua ntempelo wa mubidi wandi.

²²Hakabikeye ku lufu, bayidi bandi bakavuluka dî edi diakambeye, bakitabusha malu akadi mafunda ma Mukanda wa Nzambi ne dî diakamba Yesu.

²³Hakadiye mu Yelushalema ku Kuhita kua Yehowa, mu matuku a disanka, bantu ba bungi bakitabusha dina diandi, hakamonabo bimanyinu biandi biakenzeye.

²⁴Kadi Yesu kakaditeka mu bianza biabo, bualu bua yeye wakamanya bantu bonso,

²⁵ne bua yeye kakadi ne bualu bua muntu amuambile malu a bantu; yeye mene wakadi mumanye malu a munda mua bantu.