Read tshiluba Yone 9 Bible Online

Yone 9 - tshiluba bible

Yone 9

¹Hakadiye uhita, wakamona muntu mulela mufofo.

²Bayidi bandi bakamukonka ne, Labi, wakuenza bualu bubi nganyi, muntu eu, anyi bamuledi, bua yeye udi muledibue mufofo?

³Yesu wakabandamuna ne, Kabakuenza bualu bubi kudi muntu eu anyi kudi bamuledi; bualu ebu buakulua bua malu adi Nzambi wenza amueneke bualu bua muntu au.

⁴Butudi nʼabu mbua kuenza malu a wakuntuma hatshidi munya; butuku bulualua budi muntu kai mumanye mua kuenza mudimu.

⁵Hantshidi ha buloba, ndi munya wa ba ha buloba.

⁶Hakambeye edi, wakatuila lute hanshi, wakasohakanya nʼalu buloba, wakamulababu ku mesu,

⁷wakamuambila ne, Ya wowe mu tshina tshia mai a kuowa dina diatshi Siloama (kukudimuna kua muaku ne, Mutumibue). Wakaya biandi, wakowa, wakahingana mutabale.

⁸Bena kuabo ne bakamumona diambedi ne, Mulombi, bakakonka ne, Eu kanyeye wakadi ushikama ulomba, anyi?

⁹Bakuabo bakamba ne, Nyeye; bakuabo ne, Nasha, kadi udi mumufuane. Kadi yeye wakamba ne, Ndi yeye mene.

¹⁰Bakamuebesha ne, Mesu ebe adi matabale munyi?

¹¹Yeye wakabakudimuna ne, Muntu udibo babikila ne, Yesu, wakasohakanya buloba, wakabundaba ku mesu, wakangambila ne, Ya ku Siloama, wowe; nunku nakuya, nakuowa, nakutabala.

¹²Bakamukonka ne, Yeye udi hanyi? Wakamba ne, Tshiena mumanye.

¹³Bakalua ne wakadi mufofo kudi Bafalese.

¹⁴Dituku diakasohakanya Yesu buloba, diakabululeye mesu andi diakadi dia Lumingu lua Bayuda.

¹⁵Bafalese kabidi bakamukonka ne, Wakutabala munyi? Wakabambila ne, Yeye wakulaba buloba busohakanya ku mesu anyi, nakuowa, nakashala.

¹⁶Bafalese bakuabo bakamba ne, Muntu eu kena mufume kudi Nzambi, bualu bua yeye katu wajila dituku dia Lumingu. Kadi bakuabo bakakonka ne, Muntu udi mubi udi mumanye mua kuenza bimanyinu ebi munyi? Nunku bakatahuluka munkatshi muabo.

¹⁷Bakakonka muntu wakadi mufofo kabidi ne, Yeye wakutabasha mesu ebe, ahu wewe udi umuamba munyi? Wakabakudimuna ne, Yeye udi muprofete.

¹⁸Bena Yuda kabakitabusha ne yeye wakadi mufofo ne wakutabala, anu hakabikilabo baledi ba wakatabala,

¹⁹bakabakonka ne, Eu udi muana wenu unudi nuamba ne, Mulela mufofo, anyi? Wakutabala katataka munyi?

²⁰Bamuledi bakandamuna ne, Tudi bamanye ne, Eu udi muana wetu, wakadi mulela mufofo;

²¹kadi katuena bamanye muakutabaleye katataka, katuena bamanye wakumutabasha mesu; numukonke; yeye nmuntu mukole; neadiambile.

²²Bamuledi bakamba nunku, bua bakadi batshina Bena Yuda; Bena Yuda bakadi bamane kusangisha dî ne, Wamujukula ne, Kilisto, nebamumushe mu nsunagoga.

²³Ebu mbualu buakamba bamuledi ne, Yeye nmuntu mukole, numukonke yeye.

²⁴Bakabikila wakadi mulela mufofo tshiakabidi, bakamuambila ne, Utumbishe Nzambi; iudi bamanye ne muntu eu udi mubi.

²⁵Yeye wakabakudimuna ne, Ne udi muntu mubi, tshiena mumanye; udi mumanye anu bualu bumue ne, Nakadi mufofo, katataka ndi mona.

²⁶Bakamukonka ne, Yeye wakakuenzela tshinyi? Wakatabasha mesu ebe munyi?

²⁷Wakabakudimuna ne, Nakunuambila katataka, kanuena bunvue; nudi nusuila kunvua tshiakabidi tshinyi? Nudi basue kulua bayidi bandi, anyi?

²⁸Bakamutandisha ne, Wewe udi muyidi wandi, tuetu tudi bayidi ba Mose.

²⁹Tudi bamanye ne, Nzambi wakakula ne Mose, kadi muntu eu, katuena bamanye kuakufumeye.

³⁰Yeye wakabakudimuna ne, Ahu ebu mbualu bua kukema, bua nuenu kanuena bamanye kuakafumeye, yeye wakatabasha mesu anyi.

³¹Tudi bamanye ne, Nzambi kena unvua dî dia bantu babi; watendelela Nzambi, wenza bu mudiye musue, neunvue dî diandi.

³²Ku tshibangidilu tshia buloba tô ne katataka kabena banze kunvua bualu bua muntu utabasha mesu a muntu mulela mufofo.

³³Bu muntu eu kai mufume kudi Nzambi, kakadi kumanya mua kuenza bualu.

³⁴Bakamukudimuna ne, Wakuledibua mu malu mabi bulelela, wewe udi utuyisha tuetu, anyi? Bakamuihata.

³⁵Yesu wakunvua ne, Bakumuihata. Hakamumoneye, wakamukonka ne, Udi witabusha Muana wa Nzambi, anyi?

³⁶Wakamukudimuna ne, Mukelenge, yeye udi nganyi, nmuitabushe?

³⁷Yesu wakamuambila ne, Wewe wakumumona, udi wakula nʼebe nyeye mene.

³⁸Muntu au wakamba ne, Mukelenge, ndi ngitabusha. Wakamukukuila.

³⁹Yesu wakamba ne, Nakuluila ha buloba bua kulumbuluisha bantu, badi kabai bamona bamone, badi bamona balue bafofo.

⁴⁰Bafalese bakuabo bakadi nʼandi, hakunvuabo mei â, bakamukonka ne, Tuetu kabidi, tudi bafofo, anyi?

⁴¹Yesu wakabakudimuna ne, Bu nuenu bikale bafofo, kanuakadi kuikala ne bubi; kadi katataka nudi nudiamba ne, Tudi tumona; bubi buenu budi bushala.