Read tshiluba Bienzedi 4 Bible Online

Bienzedi 4 - tshiluba bible

Bienzedi 4

¹Hakadibo bambila bantu dî edi, bakuidi banene ne kahita ka ntempelo ne Basadoke bakahia kudibo;

²bakadi ne tshishi bualu bua bakadi bayisha bantu, bakadi bamba bua dibika dia ku lufu bualu bua Yesu wakabika.

³Bakabakuata, bakababuesha mu nsubu wa lukanu tô ne hakatshiabu, bualu bua diba diakamba kubuela.

⁴Kadi ba bungi bakunvua dî bakitabusha; bungi bua balume buakakumbana bu binunu bitanu.

⁵Hakatshiabu, bakokeshi babo ne bakulu ne bafundi bakadisangisha mu Yelushalema;

⁶Ana, muakuidi munene wakadika, ne Kayafa, ne Yone, ne Alesandelo, ne ba mu tshiota tshionso tshia muakuidi munene.

⁷Hakimanyikabo Petelo ne Yone munkatshi muabo, bakabakonka ne, Nuakuenza bualu ebu ne bukole kai, anyi mu dina dia nganyi?

⁸Petelo mûle tente ne Nyuma Muimpe, wakabambila ne, Nuenu bakokeshi ba bantu, ne bakulu,

⁹biatulumbuluishabo lelu bua bualu buimpe biakuenzelabo muntu wa mubidi mutekete mudiye mukoleshibue;

¹⁰buonso buenu ne Bena Isalele bonso numanye ne, Mu dina dia Yesu Kilisto wa ku Nazaleta, unuakashiha ku mutshi mutshiamakane, wakabisha Nzambi ku lufu, mu dina edi mene mudi muntu eu, udi muimane ku mpala kuenu, mukoleshibue.

¹¹Yesu udi dibue diakahidiabo kunudi nuenu bibaki ba nsubu, kadi diakatekabo ku mutu kua ditumba.

¹²Mu munga muntu yonso kamuena luhandu, bualu bua kakuena dinga dina munshi mua diulu, diba bantu, didi dimanye mua kutusungila.

¹³Hakamonabo dikima dia Petelo ne Yone, hakamanyabo ne, Kabena bamanye mikanda, badi bantu hatuhu, bakakema; bakabamanya ne, Mbakadi ne Yesu.

¹⁴Hakamonabo muntu mukoleshibue muimane nʼabo, kabakamanya mua kuamba dî.

¹⁵Hakabambilabo ne, Umukai ba tshilumbuluidi, bakadi bebeshangana ne,

¹⁶Netuenzele bantu aba tshinyi? Bulelela, bonso badi bashikama mu Yelushalema badi bamanye ne, Bantu aba bakuenza tshimanyinu tshidi tshimanyibua; katuena bamanye mua kutshivila.

¹⁷Kadi bua bualu ebu kabutangadiki munkatshi mua bantu, tubakanyinai ne, Kanuambidi muntu bualu mu dina edi kabidi tshiendelele.

¹⁸Bakababikila, bakabambila bikole ne, Kanuambidi bantu bualu mu dina dia Yesu, kanubayishi.

¹⁹Kadi Petelo ne Yone bakabakudimuna ne, Nusungule budi buakane ku mesu kua Nzambi, kutumikila di dienu anyi dî dia Nzambi;

²⁰bualu bua katuena bamanye mua kuenza bualu bukuabo, anu kuambila bantu malu atuakumona ne atuakunvua.

²¹Hakabakanyinabo kabidi bikole, bakababela, kabakamona bualu bua kubakengesha, bakatshina bantu; bualu bua bantu bonso bakadi batumbisha Nzambi bua muanda wakenjibua.

²²Muntu wakenzelabo tshimanyinu etshi tshia kuondahibua wakadi bidimu makumi anai bisambuke.

²³Hakabalekelabo, bakahingana kudi bana babo, bakabamanyisha malu onso akabambila bakuidi banene ne bakulu.

²⁴Hakunvuabo dî edi, bakatumbisha Nzambi ne mutshima umue, bakamba ne, Mukelenge wetu, wewe wakafuka diulu ne buloba ne mai manene ne bintu bionso bidimu;

²⁵wewe wakamba kudi Nyuma Muimpe mukana mua tatu wetu Davidi, muntu webe ne, Bisamba bia bende biakufunyina bulobo tshinyi? Bantu bakuelela meshi a malu a hatuhu tshinyi?

²⁶Bakelenge ba ha buloba bakutantamana bua kuluangana, Banfumu bakudisangisha bua Kuelela Mukelenge ne Kilisto wandi tshifufu.

²⁷Bulelela, mu musoko eu, Helode ne Pontio Pilato ne bisamba bia bende ne Bena Isalele bakadisangisha bua kuelela Muana webe wa tshijila Yesu, uwakela manyi ha mutu, tshifufu,

²⁸ne bua kuenza malu onso akasungula tshianza tshiebe ne mutshima webe diambedi ne, Alue.

²⁹Mukelenge, bua malu a mpindiu, utangile dikanyina diabo; uhe bantu bebe mitshima ya kuamba dî diebe ne dikima dikole,

³⁰hautshidi wolola tshianza tshiebe bua kuondaha bantu; bimanyinu ne malu a kukema Menjibue mu dina dia Muana webe wa tshijila Yesu.

³¹Hakatendelelabo Nzambi nunku, muaba wakadibo badisangisha wakakankishibua; buonso buabo bakadi bûle tente ne Nyuma Muimpe, bakamba dî dia Nzambi ne dikima.

³²Tshisumbu tshia bakadi bitabusha tshiakadi ne mutshima ne musûke umue; kakuakadi muntu umue wakamba ne, Bintu bindi nʼabi mbianyi nkayanyi; kadi bakasangisha bintu bionso hohamue.

³³Bapostolo bakadi bamba ne bukole bua bungi bua dibika dia Mukelenge Yesu ku lufu, ngasa wa bungi wakadi nʼabo bonso.

³⁴Munkatshi muabo kamuakadi muntu wakadi ukengela tshintu; bualu bua bakadi ne madimi anyi nsubu, bakabihana, bakadi balua ne mushinga wa biakahanabo,

³⁵bakadi bauteka ku makasa a bapostolo; bakadi babanyangana muntu ne muntu bu muakadiye nʼatshi bualu.

³⁶Muntu wakadiku, dina diandi Yosefe, bapostolo bakamuidika dinga dina ne, Bânaba (kukudimuna kua muaku ne, Muana wa Busambi), Muena Lewi, mulela ku Kupulio;

³⁷wakadi ne budimi, wakabuhana, wakalua ne mushinga, wakauteka ku makasa a bapostolo.