Read tshiluba Lomo 15 Bible Online

Lomo 15 - tshiluba bible

Lomo 15

¹Butudi nʼabu, tuetu bantu bakole, mbua kutuala matekete a badi batekete, kembua kudisankisha nkayetu.

²Muntu ne muntu wa munkatshi muetu asankishe muena mutumba nʼandi bua kuvuisha malu mimpe kudiye adi mua kumudiundisha.

³Bua Kilisto kabidi kakadisankisha, kadi bu muakafundabo ne, Bihendu bia bakadi bakuhenda, biakahona hamʼbidi hanyi.

⁴Bua malu onso akafundabo diambedi akafundibua bua kutuyisha, bua tuetu tuikale ne ditekemena bua ditantamana dietu ne bua busambi bua mu Mukanda wa Nzambi.

⁵Nzambi wa ditantamana ne wa busambi anuhe bualu ebu mene,—bua kuikalangana ne meshi amue bu mudi Kilisto Yesu,

⁶bua nuenu nutumbishe Nzambi Tatu ne Mukelenge wetu Yesu Kilisto ne mutshima umue ne dî dimue.

⁷Nunku nuitabushangane bu muakanuitabusha Kilisto bua kuyuisha butumbi kudi Nzambi.

⁸Bualu bua ndi ngamba ne, Kilisto wakavuishibua muena mudimu wa batengula bua bushua bua Nzambi, bua yeye ajadike milayi yakalaya Nzambi bankambua betu,

⁹ne bua ba bisamba bia bende batumbishe Nzambi bua luse luandi, bu muakafundabo ne, Bua bualu ebu nenkuhe butumbi munkatshi mua bisamba bia bende, Nengimbile dina diebe misambu.

¹⁰Udi Wamba kabidi ne, Nuenu, bisamba bia bende, nusanke ne bantu bandi.

¹¹Udi wamba kabidi ne, Nuenu, bisamba bionso bia bende, nutumbishe Mukelenge, Bantu bonso bamutumbishe.

¹²Yeshaya udi wamba kabidi ne, Muji wa Yishai newikaleku, Ne udi ubika bua kukokesha bisamba bia bende neikaleku, Bisamba bia bende nebimutekemene.

¹³Nzambi wa ditekemena anûshe tente ne disanka ne ditalala dia mu ditabusha dienu, bua nuenu nukumbane mu ditekemena mu bukole bua Nyuma Muimpe.

¹⁴Ne meme bianyi kabidi, bana betu, ndi ngitabushishibua ne, Nuenu mene nudi bûle tente ne buimpe, bûshibua tente ne lungenyi luonso, nudi bamanye mua kudimushangana.

¹⁵Kadi mu manga malu ndi nufundila mei anyi ne dikima dihita, bua kunvuluisha tshiakabidi, bualu bua ngasa wakampabo kudi Nzambi,

¹⁶bua meme kuikala mukuatshishi wa mudimu wa Kilisto Yesu mutumibue kudi bisamba bia bende, ngenza mudimu wa muakuidi wa mu lumu luimpe lua Nzambi, bua kufila kuanyi kua bisamba bia bende kuvuishibue mulambu udi Nzambi musue, mujidibue kudi Nyuma Muimpe.

¹⁷Nunku udi ne kundi ntumbila mu Kilisto Yesu mu malu adi a Nzambi.

¹⁸Bua tshiena ne dikamakama dia kuamba bua malu makuabo, anu bua malu akenza nʼanyi Kilisto bua ditumikila dia bisamba bia bende, ku dî ne ku bienzedi,

¹⁹mu bukole bua bimanyinu ne bua malu a kukema ne mu bukole bua Nyuma Muimpe. Nunku nakuvudisha kuamba kuanyi kua lumu luimpe lua Kilisto ku Yelushalema ne ku nseke idi miunyunguluke tô ne ku Iluliko.

²⁰Nunku ma buala ebu ndi ntshinta bua kuamba lumu luimpe ku nseke kudi dina dia Kilisto kadi dianze kutedibua, bua meme tshiashi ha bishimikidi biakatekabo kudi munga muntu.

²¹Mbu muakafundabo ne, Nebamone kudi kakui lumu luandi kulua kudibo, Ne badi kabai banze kunyua nebajingulule.

²²Bua bualu ebu kabidi nakahumbishibua kudi malu a bungi bua kulua kunudi.

²³Kadi katataka, bualu bua tshiena ne muaba mu nseke ei, ne bualu bua bidimu ebi bia bungi nakajinga bua kulua kunudi,

²⁴hanaya ku Esepanya, bualu bua ndi ntekemena bua kuntangila mu luendu luanyi, ne bua nuenu mufile ku mpala mu nshila wanyi, binasankishibua nʼenu tshituha diambedi.

²⁵Kadi katataka nyaya ku Yelushalema bua kukuatshisha basanto.

²⁶Bua Bena Makedonia ne Bena Akaya bakasanka bua kusangisha bintu bikuabo bua kukuatshisha nʼabi bahele ba munkatshi mua basanto ba mu Yelushalema.

²⁷Bushua bakadi ne disanka, ne bakadi bena dibanza diabo. Bualu bua bikala bisamba bia bende bangatshi nʼabo ba malu a Nyuma, badi ne bualu bua kubakuatshisha kabidi ne bintu bidi mubidi ukengela.

²⁸Nunku hanakamana kushikisha bualu ebu, ne hanakamana kufila kudibo dimuma edi, nempitshile munkatshi muenu tô ne ku Esepanya.

²⁹Ndi mumanye ne, Hanalua kunudi, nendue mu tshiuwidi tshia disanka dia Kilisto.

³⁰Bana betu, ndi nusengelela bua Mukelenge Yesu Kilisto ne bua dinanga dia Nyuma Muimpe, ne, Nudienzeshe nʼanyi bikole mu dilomba dienu dia bualu buanyi kudi Nzambi,

³¹bua meme mpanduke mu bianza bia bena tshitshu ba mu Yudaya, ne bua dikuatshisha dinyana nʼadi mu Yelushalema dikale bu mudi basanto basue,

³²ne bua meme nfike kunudi ne disanka bua disua dia Nzambi, ne bua kusangana nʼenu dikisha.

³³Nzambi wa ditalala ikale ne buonso buenu. Amen.