Read tshiluba Galatia 2 Bible Online

Galatia 2 - tshiluba bible

Galatia 2

¹Hakashika bidimu dikumi ne binai, nakaya ku Yelushalema tshiakabidi ne Bânaba; tuakaya ne Tito kabidi.

²Nakabandaku bianyi bua bualu buakabuluibua kundi; nakalondela bakadi ne butumbi munkatshi mua bapostolo lumu luimpe lundi ngambila ba mu bisamba bia bende; kadi nakabalondelalu mu musokoko, bua meme tshikadi bu muntu utshidi welekesha lubilu, anyi wakadi welekesha lubilu hatuhu.

³Tito wakadi nʼanyi, yeye muena Gelika mene, kadi kabakamuenzesha bua kutengudibueye.

⁴Kadi bualu bua bakuabo bakadivuisha bu bana betu, bakadibuesha munkatshi muetu mu musokoko bua kutentekela budishikaminyi butudi nʼabu mu Kilisto Yesu; bakasua kutuvuisha bahika.

⁵Kadi katuakabakokela nasha tshituha tshimue tshia diba; bualu bua bushua bua lumu luimpe buikale nʼenu.

⁶Kadi bantu aba bakadi ne butumbi munkatshi muabo (ne bakadi banganyi diambedi kembualu kundi; Nzambi kena ubala mpala wa muntu) ndi ngamba ne, Bantu aba bakadi ne butumbi kabakanyisha bualu.

⁷Kadi hakamanyabo ne nakahebua lumu luimpe lua kudi badi kabai batengula, bu muakahebua Petelo lua kudi badi batengula;

⁸(bualu bua yeye nguakenzesha Petelo mu mudimu wa bupostolo bua batengula, nguakangenzesha kabidi mu mudimu wa bupostolo kudi bisamba bia bende);

⁹ne hakamonabo ngasa wakumpabo kudi Nzambi, Yakobo ne Kefa ne Yone bakadi bu makunshi mu ekelesia, bakatuha meme ne Bânaba tshianza tshia, bukole tshia buobumue buetu mu Kilisto, bua tuetu tuye kudi bisamba bia bende, ne bua bobo baye kudi batengula.

¹⁰Kadi bakasua kabidi tuetu tuvuluke bahele; bualu mene bunakadi ne disuminyina dia kuenza.

¹¹Kadi hakalua Kefa ku Antiokia, nakabengangana nʼandi ku mei ku mesu kuandi bualu bua yeye wakadihishisha.

¹²Bualu bua diambedi bantu bakuabo kabai banze kulua, bafume kudi Yakobo, wakadi udia ne bantu ba mu bisamba bia bende; kadi hakaluabo, wakumuka kudibo, wakadilamununa kudibo; bualu bua wakatshina bakadi ba batengula.

¹³Ne Bena Yuda bakuabo bonso bakumuka nʼandi mu lubombo; ne Bânaba mene wakahambuishibua ku lubombo luabo.

¹⁴Kadi hanakatangila ne kabakenda bajalama bu mudi lumu luimpe lua bushua luamba, nakambila Kefa ku mesu kua buonso buabo ne, Wewe, Muena Yuda, biwenza bu mudi bantu ba mu bisamba bia bende benza, kui wenza bu mudi Bena Yuda benza, munyi mûdi musue kuenzesha bantu ba mu bisamba bia bende bua bobo benza bu mudi Bena Yuda benza?

¹⁵Tuetu tuakaledibua Bena Yuda, katui bu bantu babi ba mu bisamba bia bende;

¹⁶kadi ludi bamanye ne kakuena muntu wabingishibua bua kuenza kua mikenshi kadi anu ku ditabusha dia mu Yesu Kilisto; tuetu kabidi tuakitabusha Kilisto Yesu bua kubingishibua ku ditabusha dia mu Kilisto, kenku kuenza kua mikenshi, bualu bua kakuena muntu wabingishibua ku kuenza kua mikenshi.

¹⁷Kadi bikalabo batusangane bu bantu babi hatuakadi tukeba mua kubingishibua mu Kilisto, Kilisto udi muena mudimu wa bubi, anyi? Nasha kakese!

¹⁸Bua bingibaka bintu tshiakabidi binakasasula diambedi, ndi ndijadika bu mushihi wa mikenshi.

¹⁹Bualu bua mikenshi nakamana kufua ku mikenshi, bua meme ngikale ne muoyo kudi Nzambi.

²⁰Nakashihibua ku mutshi mutshiamakane ne Kilisto; nunku kememe kabidi udi ne muoyo, kadi Kilisto ngudi muoyo munda muanyi; ne muoyo undi nʼau mu mubidi katataka ndi nʼau mu ditabusha dia mu Muana wa Nzambi, wakannanga, wakadifila bua bualu buanyi.

²¹Tshiena nvuisha ngasa wa Nzambi ne, Ntshianana; bualu bua bialua buakane ku kutumikila kua mikenshi, nunku Kilisto wakafua tshianana.