Read tshiluba Galatia 3 Bible Online

Galatia 3 - tshiluba bible

Galatia 3

¹Nuenu Bena Galatia bahote, ku mesu kuenu kuakatekabo Yesu Kilisto mushihibue ku mutshi mutshiamakane hatoke, wakanuhambuisha nganyi?

²Ndi musue kunukonka anu bualu bumue, Nuakangata Nyuma bua kuenza kua mikenshi anyi bua kunvua kua lumu luimpe ne ditabusha?

³Ebu mbuhote buenu, anyi? Nuakuhanga ne Nyuma, mpindiu nudi nushikisha ne malu a mubidi, anyi?

⁴Nuakakenga mu malu a bungi nunku tshianana, anyi? (Binuikala bakenge tshianana bulelela.)

⁵Wakanuha Nyuma ne udi wenza malu a kukema munkatshi muenu, yeye udi wenza nunku bua kuenza kua mikenshi anyi bua kunvua kua lumu luimpe ne ditabusha?

⁶Mbu muakitabusha Abalahama Nzambi, ne bakamubadila ditabusha edi bu buakane.

⁷Numanye bienu ne, Bantu badi ba ditabusha mbobo badi bana ba Abalahama.

⁸Bualu bua Mukanda wa Nzambi wakadianjila kumona ne, Nzambi neabingishe bantu ba bisamba bia bende ku ditabusha, wakadianjila kuambila Abalahama lumu luimpe ne, Bisamba bionso nebivudishibue disanka bua bualu buebe.

⁹Nunku badi ba ditabusha badi bavudishibua disanka ne Abalahama, muena ditabusha.

¹⁰Bonso badi beyemena kuenza kua mikenshi badi munshi mua mulau; bu muakafundabo ne, Muntu yonso udi kai ulonda malu onso adi mafunda mu mukanda wa mikenshi bua kuênza udi ne mulau.

¹¹Nunku bualu ebu budi bumanyibua hatoke ne, Kakuena muntu udi ubingishibua bua mikenshi ku mesu kua Nzambi; bualu bua bakamba ne, Muntu muakane neikale ne muoyo ku ditabusha.

¹²Ne mikenshi kayena ku ditabusha, kadi, Wayenza neikale ne muoyo bua bualu buai.

¹³Kilisto wakatuhikula ku mulau wa mikenshi, wakadivuisha bu mulau bua bualu buetu; bu muakafundabo ne, Muntu yonso udi mukudika ku mutshi udi ne mulau;

¹⁴bua disanka dia Abalahama dilue kudi bisamba bia bende mu Kilisto Yesu; bua tuetu kuangata mulayi wa Nyuma bua ditabusha.

¹⁵Bana betu, ndi ngakula bu mudi bantu bakula. Nasha tshihungidi tshikala anu hankatshi ha bantu, hamanabo kutshijadika, kakuena muntu udi utshivuisha tshia hatuhu, anyi udi utentekesha malu makuabo ha mutu hatshi.

¹⁶Milayi yakalayidibua Abalahama ne kankanunuina kandi; kayakalayidibua tunkanunuma tua bungi, kadi anu muntu umue, kankanunuina kebe, Kilisto mene.

¹⁷Ndi ngamba dî edi ne, Mikenshi, yakalua hakaleha bidimu nkama inai ne makumi asatu, kayena mimanye mua kumusha tshihungidi tshiakadianjila kujadikibua kudi Nzambi bua kuvuishai mulayi ne, Ntshianana.

¹⁸Bikala buhianyi bufume ku mikenshi, kabuena bufuma ku mulayi; kadi Nzambi wakabuha Abalahama bua mulayi.

¹⁹Nunku mikenshi Idi bua tshinyi? Mikenshi yakatentekeshibua ha mutu bualu bua malu mabi a bantu, tô ne hakalua kankanunuina ka Abalahama kakalayidilabo mulayi; wakalongolodibua kudi banjelo ku tshianza tshia mutuanganyi wa tshihungidi.

²⁰Mutuanganyi kena mutuanganyi wa umue; kadi Nzambi udi umue.

²¹Mikenshi idi ifuilangana ne milayi ya Nzambi, anyi? Nasha kakese! Bu Nzambi mutuhe mikenshi yakamanya mua kutuhesha muoyo, bulelela, buakane buakadi kufuma ku mikenshi.

²²Mukanda wa Nzambi wakinshidila malu onso munshi mua bubi, bua kuha bantu badi bitabusha mulayi ku ditabusha dia mu Yesu Kilisto.

²³Diambedi ditabusha kadî dianze kulua, buonso buetu tuakadi balamibue munshi mua mikenshi, tuakadi binshidila ku ditabusha diakadi ha kubuluibua.

²⁴Nunku mikenshi yakalua ndeshi wetu wa kutufikisha kudi Kilisto, bua tuetu tubingishibue ku ditabusha.

²⁵Kadi bualu bua ditabusha diakumana kulua, katuena mu bulombodi bua ndeshi kabidi.

²⁶Bua buonso buetu tudi bana ba Nzambi bua ditabusha dia mu Kilisto Yesu.

²⁷Bualu bua nuenu bonso bakabatijibua mu Kilisto, nuakaluata Kilisto.

²⁸Kakuena Muena Yuda anyi Muena Gelika; kakuena muhika anyi mudishikamine; kakuena mulume anyi mukashi; bualu bua buonso buenu nudi muntu umue mu Kilisto Yesu.

²⁹Binuikala ba Kilisto, nunku nudi tunkanunuina tua Abalahama, nudi bahianyi bandi bu mudi mulayi wamba.