Read tshiluba Efeso 3 Bible Online

Efeso 3 - tshiluba bible

Efeso 3

¹Bua muanda eu, meme Paulo, udi muena lukanu wa Kilisto Yesu bua bualu buenu, nuenu ba mu bisamba bia bende.

²Bumue nuakunvua bua diabanyangana dia ngasa wa Nzambi wakumpabo bua bualu buenu;

³ne bu muakambuluilabo bualu buakadi busokoka, bu munakadianjila kunufundila ne mei makese.

⁴Nunku hanuâbala nudi mua kumanya dijingulula dianyi dia bualu bua Kilisto busokoka;

⁵kabuakadi bumanyishibua bukua bantu mu bikondo bikuabo, kadi katataka buakabuluidibua bapostolo bandi ba tshijila ne baprofete mu Nyuma Muimpe;

⁶bualu ebu busokoka ne, Ba bisamba bia bende badi bahianyi nʼetu, ne badi bituha nʼetu bia mubidi umue, ne badi bangatshi nʼetu ba mulayi mu Kilisto Yesu bualu bua lumu luimpe,

⁷luakunvuishabo muena mudimu walu bua diha dia ngasa wa Nzambi wakueleye bu mu dienzesha dia bukole buandi.

⁸Kundi meme, udi mutambe basanto bonso kuhuekela, bakampa ngasa eu bua meme kuambila ba bisamba bia bende bua bubanshi bua Kilisto budibo kabai bamanye mua kubuidikisha;

⁹ne bua kumuenesha kumesu kua bantu bonso dilonga dia bualu buakadi busokoka tô bikondo bia bungi munda mua Nzambi wakafuka bintu bionso;

¹⁰bua ekelesia amanyishe bakelenge ne bakokeshi badi mu miaba ya mu diulu meshi mavula a Nzambi;

¹¹bu mudi didisunguila diandi dia tshiendelele diakasunguleye mu Kilisto Yesu Mukelenge wetu;

¹²bua bualu buandi tudi ne dikima ne ha kubuelela kudiye ne ditekemena, bua ditabusha ditudi tumuitabushe nʼadi.

¹³Nunku ndi ndomba ne, Mitshima yenu kaiteketshi bua makenga andi nʼau bua bualu buenu, adi butumbi buenu.

¹⁴Bua muanda eu ndi ntua binu hanshi ku mpala kua Tatu,

¹⁵ngudi tshiota tshionso tshia mu diulu ne tshia ba buloba tshidika dina diandi,

¹⁶bua yeye anuhe bu mudi bubanshi bua butumbi buandi mua kukoleshibua munda muenu ne bukole kudi Nyuma wandi;

¹⁷ne bua Kilisto ikale mu mitshima yenu bua ditabusha; bua muanda eu, ne nuenu, bamane kuela miji ne bashibue mu dinanga,

¹⁸nuikale ne bukole bua kumanya nʼabu, hamue ne basanto bonso, mudi butshia ne bule ne bule bua mulu ne ndondo,

¹⁹ne bua kumanya mudi dinanga dia Kilisto didi ditamba lungenyi lua bantu kudimanya, bua nuenu nûla tente ne tshiuwidi tshionso tshia Nzambi.

²⁰Kudi Nzambi, udi ne bukole bua kuenza malu matambe atudi katui bamanye mua kumulomba ne mua kuelangana meshi, bu mudi bukole budi butusonsola munda muetu,

²¹butumbi buikale kudiye mu ekelesia ne mu Kilisto Yesu tô: bikondo ne bikondo tshiendelele. Amen.