Read tshiluba Efeso 6 Bible Online

Efeso 6 - tshiluba bible

Efeso 6

¹Bana, tumikilai baledi benu mu Mukelenge; bua bualu ebu budi buakane.

²Unemeke tatu webe ne mamu webe (eu udi mukenshi wa kumudilu udi ne mulayi),

³bua wewe wikale ne dikasa dimpe ne wikale ne muoyo musangu mule ha buloba.

⁴Ne nuenu batatu, kanufuishi bana benu balela tshishi; nubadiundishe bimpe ne dihela ne didimusha bia Mukelenge.

⁵Nuenu bahika, tumikilai dî dia badi banfumu benu ba mu malu a ha buloba ne kutshina ne kuzakala ne mutshima umue, bu munudi nutumikila Kilisto.

⁶Kanuenji mudimu bu bahika ba mesu, badi bu basankishi ba bantu; kadi bu bahika ba Kilisto, nuenze bu mudi disua dia Nzambi ne mitshima yenu;

⁷nuenze mudimu ne disanka bu munudi nuenzela Mukelenge mudimu, kembu munudi nuenzela bantu.

⁸Nudi bamanye bienu ne, Bualu buonso buimpe budi muntu ne muntu wenza, buobuo mene mbudiye wangata kabidi kudi Mukelenge, bikaleye muhika anyi mudishikamine.

⁹Ne nuenu banfumu, nubenzele muomumue, nuhidie kubakanyina; mimanye ne, Mukelenge wabo ne wenu kabidi udi mu diulu, ne kakuena kansungunsungu kudiye.

¹⁰Ku ndekelu, nudikoleshe mu Mukelenge ne mu bukole buandi bunene.

¹¹Luatai bintu bionso bia nvita bia Nzambi, bua nuenu numanye mua kuimana bakandamana ku mpala kua mateyi a diabolo.

¹²Bualu bua diluangana dietu dia bibula kadiena dia kufuilangana ne munyinyi ne mashi, kadi ndia kufuilangana ne makelenge ne makokeshi ne banfumu ba midima ba buloba ebu, ne bisumbu bia nyuma mibi bidi mu miaba ya mu diulu.

¹³Bua muanda eu angatai bintu bionso bia nvita bia Nzambi, bua nuenu numanye mua kudimanyika bimpe halua dituku dibi, ne, hanuashikisha kuenza malu onso, nudi mua kuimana.

¹⁴Nunku imanai bienu, bamane kusuika bulelela mu bifuka bienu bu mukaba, bamane kuteka buakane bu tshibuikilu tshia ha tshiadi;

¹⁵bamane kubuesha makasa enu mu bisabata bia kudilongolola kua lumu luimpe lua ditalala.

¹⁶Ha mutu ha bintu bionso nuambule ngabu wa ditabusha, unudi mua kuehela nʼandi miketa yonso ya Satana idi ne kahia kasuikaku.

¹⁷Nuangate tshifulu tshia luhandu, ne muele wa Nyuma udi dî dia Nzambi;

¹⁸nutendelele Nzambi misangu yonso ne kulomba kuonso ne disengelela dionso mu Nyuma Mumpe; nuikale batabale mu dinanukila dionso ne disengelela bua basanto bonso,

¹⁹ne bua bualu buanyi kabidi, bua meme kuheshibua mua kuakula hanabulula mukana muanyi ne bua meme kumanyisha bantu ne dikima bualu bua lumu luimpe busokoka.

²⁰Bua bualu ebu ndi muloho wa Nzambi mu nkanu, bua meme kuambila bantu bualu ne dikima bu mundi nʼabu bua kubambila.

²¹Bua nuenu kabidi numanye malu andi nʼau ne mundi ngenza, Tukiko, muanʼetu munanga wa mu Kilisto, muena mudimu wa lulamatu mu Mukelenge, nennumanyishe malu onso;

²²unakanutumina bua muanda eu mene, bua nuenu numanye bu mutudi emu, ne bua kusambeye mitshima yenu.

²³Ditalala dikale kudi bana betu ba mu Kilisto, ne dinanga disangisha ne ditabusha bia kudi Nzambi Tatu ne kudi Mukelenge Yesu Kilisto.

²⁴Ngasa ikale ne bantu bonso badi bananga Mukelenge wetu Yesu Kilisto ne dinanga didi kadi mua kuhanga.