Read tshiluba Filipoi 3 Bible Online

Filipoi 3 - tshiluba bible

Filipoi 3

¹Tshiashadidi mpindiu, bana betu, nusanke mu Mukelenge. Kunufundila malu momumue kakuena kuntonda, kadi kudi kunukuatshisha nuenu.

²Nudimuke kudi mbua, nudimuke kudi benji babi ba mudimu, nudimuke kudi baditahi ba mubidi.

³Bualu bua tuetu tudi batengula badi batendelela ku Nyuma wa Nzambi ne badi batumbila mu Kilisto Yesu, ne badi kabai ne dieyemena dia malu a mubidi,

⁴nasha meme nkayanyi ngeyemena malu mene a mubidi. Bikala muntu mukuabo wela meshi bua kuikala ne dieyemena dia malu a mubidi, meme ndi mua kumutamba kuikala nʼadi.

⁵Bakantengula dituta dia muanda mukulu; nakadi Muena Isalele, wa tshisamba tshia Benyamina, Muena Ebelu wa Bena Ebelu; mu bualu bua mikenshi nakadi Mufalese;

⁶mu bualu bua lukunukunu nakadi nkengesha bena ekelesia; ne mu bualu bua buakane bua mu mikenshi, nakalua muntu udi kai ne bualu.

⁷Kadi malu akadi a mushinga muimpe kundi, nguou au nakabala bu tshintu tshijimina bua Kilisto.

⁸E, bulelela mene, ndi mbala bintu bionso bu tshintu tshijimina bualu bua bulengele butambe bua kumanya kua Kilisto Yesu, Mukelenge wanyi; unakajimishila bintu bionso bua bualu buandi, ne ndi mbibala bu bintu bia kuela ku diala bua meme mpete Kilisto,

⁹ne bua kunsanganabo munda muandi, tshi ne buakane buanyi budi bufume ku mikenshi, kadi ngikale ne buobu abu budi bua ditabusha dia mu Kilisto, buakane mene budi bufuma kudi Nzambi hangitabusha.

¹⁰Mbua meme kumumanya yeye, ne bukole bua dibika diandi ku lufu, ne buobumue nʼandi mu makenga andi, muikale mufuanyikishibue nʼandi mu lufu luandi;

¹¹binamanya mua kufika ku dibika dia munkatshi mua bafue.

¹²Kembua nakamana kuheta buala ebu, anyi bua nakumana kuakashibua; kadi ndi ntshinta bikole, binamanya mua kukuata bualu buakunkuatshilabo kabidi kudi Kilisto Yesu bualu buabu.

¹³Bana betu, tshiena ndibala bu muntu wakamana kubukuata; kadi ndi ngenza bualu bumue: Handi mpua muoyo bua malu a ku nyima, handi ndobelela ku malu adi ku mpala,

¹⁴ndi ntshinta bua kufika ku ndekelu wa nshila bua kuangata bukenshi bua dibikila dia mulu dia Nzambi mu Kilisto Yesu.

¹⁵Nunku buonso buetu bakamana kukola mu bualu bua Nzambi tuikale ne meshi momumue; ne binuikala ne meshi makuabo mu bualu bukuabo, Nzambi neanubuluile bualu ebu kabidi;

¹⁶kadi kutuakamana kufika, tuende bietu mu nshila muomumue.

¹⁷Bana betu, nulue bienu bangidikishi banyi hohamue; nutangile bantu badi benda nunku bu munudi nʼetu bu tshidikishilu.

¹⁸Bualu bua ba bungi badi benda, banakanuambila malu abo misangu ya bungi, ne bandi nuambila katataka ne binsonshi ku mesu ne, Badi bena lukuna lua mutshi mutshiamakane wa Kilisto;

¹⁹kunshikidilu kuabo didi dibutuka, nzambi wabo ndifu diabo, butumbi buabo budi mu bundu buabo; badi belangana meshi a malu a ha buloba.

²⁰Bualu bua kuetu mene kudi mu diulu, kutudi tuindila kabidi Musungidi, Mukelenge Yesu Kilisto;

²¹yeye neakudimune mibidi ya buhuekele buetu bua kufuananganai ne mubidi wandi wa butumbi, bu mudi kuenza kuandi kudiye mumanye mua kuvuisha nʼaku bintu bionso ku nyima kuandi.