Read tshiluba 1 Tesalonike 4 Bible Online

1 Tesalonike 4 - tshiluba bible

1 Tesalonike 4

¹Nunku bana betu, tshiashadidi mpindiu, tudi tunulomba ne tudi tunusengelela mu Mukelenge Yesu ne, Bu munuakangata diyisha kutudi dinulesha bu munudi ne bua kuenda ne bua kusankisha Nzambi, mbu munudi nuenda kabidi,—bua nuenu mitambe kukumbanakumbana ma malu â.

²Bualu bua nudi bamanye mei â atuakanudimusha nʼau mu Mukelenge Yesu.

³Bua bualu ebu budi disua dia Nzambi, tshijila tshienu mene, bua nuenu nudikande ku masandi;

⁴muntu ne muntu wa munkatshi muenu amanye mua kukubeye mubidi wandi mu tshijila ne mu kunemeka;

⁵kikadi nʼau mu nkuka ya disamina dibi dia mutshima, bu mudi ba bisamba bia bende benza badi kabai bamanye Nzambi.

⁶Ndi ngamba bua muntu kasambuki mikalu ne kenzedi muanʼabo wa mu Kilisto bibi mu bualu ebu; bualu bua Mukelenge udi musombuedi mu malu â onso, bu mutuakadianjila kunudimusha kabidi ne mutuakanumanyisha.

⁷Bualu bua Nzambi kakatubikila bua kuikala ne bukoya bua mutshima, kadi wakatubikidila mu malu a tshijila.

⁸Nunku wahetula kena uhetula muntu kadi udi uhetula Nzambi udi unuha Nyuma Muimpe wandi.

⁹Kadi bualu bua dinangangana dia bana babo ba mu Kilisto, kanuedi ne bualu bua muntu anufundile dî; bualu bua nuenu nudi bayishibue kudi Nzambi bua kunangangana.

¹⁰Bulelela, nudi nuenzela bana benu bonso nunku badi mu buloba buonso bua Makedonia. Kadi tudi tunusengelela, bana betu, bua nuenu mitambe kukumbanakumbana ma malu â;

¹¹ne bua nuenu nukebe bikole bua kuikala talala, ne bua kuenza malu enu nkayau, ne bua kuenza mudimu ne bianza bienu bu mutuakanuambila;

¹²nuenze nunku bua nuenu nuende ne bimuenenu biakane ku mesu kua bantu badi kabai bena ditabusha nʼetu; ne bua kanuikadi ne dikengela dia tshintu.

¹³Bana betu, katuena basue nuenu nuhange kumanya bualu bua badi balala tulu mu lufu, bua nuenu kanunyingalashi mitshima yenu, bu mudi bakuabo benza badi kabai ne ditekemena.

¹⁴Bualu bua bituitabusha ne Yesu wakafua, ne wakabika ku lufu kabidi, muomumue Nzambi nealue ne bantu aba nʼandi kabidi bakalala tulu ma lufu bualu bua Yesu.

¹⁵Bua tudi tunuambila bualu ebu ku dî dia Mukelenge ne, Tuetu, batshidi ne muoyo, ne badibo bashîe tô ne ku dilua dia Mukelenge, katuena tudianjila kuya ku mpala kua badi balala tulu ma lufu.

¹⁶Bualu bua Mukelenge muine neahueke mu diulu wela dî dikole, ne dî dia muanjelo mutambe bakuabo bunene, ne dî dia mpungi wa Nzambi; ne bantu bafue mu Kilisto nebabike diambedi;

¹⁷ne hasnishe tuetu batshidi ne muoyo badibo bashîa netuangatshibue nʼabo hohamue mu matutu, bua kusangila ne Mukelenge mu luhehele; nunku netuikale ne Mukelenge tshiendelele.

¹⁸Bua mianda ei nusambangane ne mei â.