Read tshiluba Yoshua 18 Bible Online

Yoshua 18 - tshiluba bible

Yoshua 18

¹Bena Isalele bonso bakadisangisha ku Shilo, bakashimikaku ntenta wa kusambakena; buloba buonso buakadi talalâ ku mpala kuabo.

²Bisamba bia Bena Isalele muanda mutekete biakadi bishala, kabiyi bianze kuangata buhianyi buabo.

³Yoshua wakambila Bena Isalele ne, Nuenu nenutshimbakane musangu bule munyi bua kuya bua kuangata buloba buakanuha Yehowa, Nzambi wa bankambua benu?

⁴Sungulai bantu basatu ku tshisamba ne ku tshisamba; nembatume, bobo nebabike, nebendakane ku buloba buonso, ne bobo nebatangile buloba bu mudi buhianyi buabo; nebalue kundi kabidi.

⁵Bobo nebabutahulule bituha muanda mutekete; Bena Yuda nebashikame mu tshituha tshiabo ku sude, ne Bena Yosefe nebashikame mu tshituha tshiabo ku nôde.

⁶Nuenu nenutahulule buloba bituha bituha muanda mutekete, nenungambile bu munuakenza; meme nennuelele nshobo ku mesu kua Yehowa, Nzambi wetu.

⁷Bualu bua Bena Lewi kabena ne buhianyi munkatshi muenu: bualu bua buakuidi bua Yehowa budi buhianyi buabo. Bena Gada ne Bena Lubena ne tshituha tshia tshisamba tshia Manashe bakamana kuangata buhianyi buabo dishiya dia muamua dia Yadene ku esete, buakabahabo kudi Mose, muntu wa Yehowa.

⁸Bantu aba bakabika, bakaya; Yoshua wakadimusha bantu bakadi baya kutangila buloba ne, Yai bienu, nuendakane ku buloba, nuhingane kabidi kundi, nungambile bu munuamona; ne meme nennuelele nshobo kunoko ku mesu kua Yehowa mu Shilo.

⁹Bantu aba bakaya, bakendakana mu buloba buonso, bakafunda misoko mu mukanda, bakayitahulula mu bituha muanda mutekete; bakahingana kudi Yoshua ku tshitudilu tshia ku Shilo.

¹⁰Yoshua wakabelela nshobo mu Shilo ku mesu kua Yehowa, ne Yoshua wakatahulula Bena Isalele buloba bu muakadi ditahulula diabo.

¹¹Tshisamba tshia Benyamina tshiakangata buhianyi buatshi ku meku atshi; mukalu wabo wakahatuka hankatshi ha Bena Yuda ne Bena Yosefe.

¹²Mukalu wabo wa ku nôde wakadi ku Yadene: mukalu wakabanda ku nôde ku Yeleko, ne ku mikuna ya ku wesete; wakahatuka ku tshihela tshia Bete-awena.

¹³Mukalu wakayila ku Luze (eu udi Betele kabidi) ku luseke lua Luze lua ku sude; mukalu wakahueka ku Atalota-adala, ku mukuna udi ku luseke lua sude lua Bete-holona wa ku tshibanda.

¹⁴Mukalu wakayila nunku ku wesete ne wa kunyunguluka ku sude ku mukuna udi ku mpala kua Bete-holona ku sude; wakahatuka ku Kîyata-bâla (eu udi Kîyata-yalima), musoko wa Bena Yuda: eu mmukalu wa ku wesete.

¹⁵Mukalu wa ku Sude wakadi kunfundilu kua Kîyata-yalima; mukalu wa ku wesete wakayila tô ne ku mishimi ya mai a Nefetoa;

¹⁶mukalu wakahueka tô ne kunfudilu kua mukuna udi ku mpala kua tshibanda tshia muana mulume wa Hinoma, mu tshibanda tshia Bena Lefa ku nôde; wakahueka ku tshibanda tshia Hinoma ku luseke lua Bena Yebuse ku Sude, wakahueka kabidi tô ne ku Ene-logela;

¹⁷wakayila ku nôde, wakahatuka ku Ene-shemeshe ne ku Gelilota ku mpala kua mukuna wa Adumima; wakahueka ku dibue dia Bohana, muana wa Lubena;

¹⁸wakaya ku luseke ludi buludiludi ne Alabâ ku nôde, wakahueka ku Alabâ mene;

¹⁹wakayila ku luseke lua ku nôde ku Bete-hogola; wakahatuka ku tshinkonya tshia ku nôde tshia Dishiba dia Luehu kuinshi kua Yadene ku sude: eu mmukalu wa ku sude.

²⁰Yadene wakadi mukalu wabu wa ku esete. Ebu mbuhianyi bua Bena Benyamina ku mikalu yabo ku meku abo.

²¹Bimenga bia tshisamba tshia Bena Benyamina ku meku abo biakadi Yeleko ne Bete-hogola ne Emeke-kezizi,

²²ne Bete-alabâ ne Semalayima ne Betele,

²³ne Bena Awa ne Pâla ne Ofela,

²⁴ne Kefâ-amonai ne Ofeni ne Geba; bimenga dikumi ne bibidi ne misoko yabi;

²⁵Gibeona ne Lama ne Belota,

²⁶ne Misepe ne Kefila ne Moza,

²⁷ne Lekema ne Yipele ne Talalâ,

²⁸ne Sela ne Elefe ne musoko wa Bena Yebuse (Yelushalema mene), Gibena ne Kîyata; bimenga dikumi ne binai ne misoko yabi. Ebu mbuhianyi bua Bena Benyamina ku meku abo.