Read tshiluba Yoshua 7 Bible Online

Yoshua 7 - tshiluba bible

Yoshua 7

¹Kadi Bena Isalele bakenza bualu bubi ne tshintu tshia tshijila; bualu bua Akana, muana wa Kâmi, muana wa Zabedi, muana wa Zela wa mu tshisamba tshia Yuda, wakadiangatshila tshintu tshia tshijila; ne tshiji tshiakakuata Yehowa bualu bua Bena Isalele.

²Yoshua wakatuma bantu ku Ai bumuke ku Yeleko, udi hehi ne Bete-awena ku esete kua Betele, wakabambila ne, Yai bienu bua kutentekela buloba. Bantu aba bakaya, bakatentekela Ai.

³Bobo bakahingana kudi Yoshua, bakamuambila ne, Kambualu bua bantu bonso kuya nansha, kadi anu balume binunu bibidi anyi bisatu baye bua kuluisha Bena Ai; kuenzeshi bantu bonso mudimu eu nansha, bualu hua bobo badi bantu banya-banya.

⁴Nunku bantu bu binunu bisatu bakayaku, ne bobo bakanyema ku mpala kua Bena Ai.

⁵Bena Ai bakashiha bantu bu makumi asatu ne basambombo, bakabihata ku tshibi tshia musoko tô ne ku Shebalima: bakabashiha mu tshibanda kabidi; mitshima ya bantu yakatekete-teketê, yakakudimuka bu mai.

⁶Yoshua wakadihanda bilulu biandi, wakadikuma mpala wandi hanshi ku mpala kua mushete wa Yehowa tô ne ku dilolo; yeye ne bakulu ba Bena Isalele bakadiela buloba mu mitu.

⁷Yoshua wakamba ne, Aka! Mukelenge Yehowa, wewe wakulua ne bantu aba dia munemu dia Yadene bua kutufila mu bianza bia Bena Amole ne bua kutufuisha munyi? Biakadi bimpe bua tuetu kushikama dishiya dia Yadene!

⁸Mukelenge, nengambe tshinyi, hela Bena Isalele bena lukuna babo nyima?

⁹Bualu bua Bena Kanâna ne bena buloba bonso nebulue lumu elu, nebatunyunguluke, nebajimishe dina dietu ha buloba; ne wewe newenze tshinyi bua dina diebe dinene?

¹⁰Yehowa wakambila Yoshua ne, Bika biebe, udi mutuile mpala hanshi tshinyi?

¹¹Bena Isalele bakenza bibi; bakashiha tshihungidi tshinakahunga nʼabo, bakadiangatshila tshintu tshia tshijila, bakatshiba kabidi, bakasokoka bubi buabo; bakatshiteka munkatshi mua bintu biabo mene.

¹²Nunku Bena Isalele kabena mua kuimana ku mpala kua bena lukuna babo; bakela bena lukuna babo nyima bualu bua bobo bakadiela mulau; meme tshiena ngikala nʼenu kabidi anu hanûmusha tshintu tshia tshijila munkatshi muenu.

¹³Bika biebe, ujidike bantu, ubambile ne, Nudijidile bua malu a makelela; bualu bua Yehowa, Nzambi wa Isalele, udi Wamba ne, Tshintu tshia tshijila tshidi munkatshi muenu, nuenu Bena Isalele, nunku kanuena mua kuimana ku mpala kua bena lukuna tô ne hanûmusha tshintu tshia tshijila munkatshi muenu.

¹⁴Nunku ne dinda nulue ku tshisamba ku tshisamba: ne hasungula Yehowa tshisamba, bantu nebalue ku meku abo; ne hasungula Yehowa diku, bantu nabalue ku nsubu ne ku nsubu; ne hasungula Yehowa nsubu, bantu nebalue ku muntu ne ku muntu.

¹⁵Biasanganabo mundi ne tshintu tshia tshijila, nebamuoshe mu kahia, ne yeye ne bintu bionso bidiye nʼabi, bualu bua wakashiha tshihungidi tshia Yehowa, Wakenza bualu buhote mu Isalele.

¹⁶Nunku Yoshua wakabika ne dinda dionso, wakasangisha Bena Isalele ku bisamba biabo; bakasungula tshisamba tshia Yuda.

¹⁷Yeye wakalua ha buihi ne meku a Yuda; wakasungula diku dia Bena Zela; wakalua ne diku dia Bena Zela muntu ne muntu; wakasungula Zabedi.

¹⁸Yeye wakalua ne ba mu nsubu wa Zabedi ku muntu ku muntu, wakasungula Akana, muana wa Kâmi, muana wa Zabedi, muana wa Zela wa mu tshisamba tshia Yuda.

¹⁹Yoshua wakambila Akana ne, Muanʼanyi, ndi nkusengelela ne, Utumbishe Yehowa, Nzambi wa Isalele, umutondele bubi buebe; ungambile buwakuenza, kubusokoki kundi nansha.

²⁰Akana wakambila Yoshua ne, Bulelela, nakenzela Yehowa, Nzambi wa Isalele, bubi; bualu bunakuenza budi nunku:

²¹hanakatangila tshilulu tshimpe tshia Bena Babulona ne nshekele[5] nkama ibidi ya argent ne tshiamu tshia or tshia mushinga wa nshekele makumi atanu munkatshi mua bintu, lukuka luakangata, nakabiangata; mona, bidi bisokoka mu buloba munkatshi mua ntenta wanyi, ne tshiamu tshia argent tshidi muinshi muabi.

²²Yoshua wakatuma ba-messager, ne bobo bakaya lubilu ku ntenta; monai, biakadi bisokoka mu ntenta wandi, ne tshiamu tshia argent muinshi muabi.

²³Bakabiangata munda mua ntenta, bakalua nʼabi kudi Yoshua ne Bena Isalele bonso; bakahueka hanshi ku mpala kua Yehowa.

²⁴Yoshua ne Bena Isalele bonso bakangata Akana, muana wa Zela, ne tshiamu tshia argent ne tshilulu ne tshiamu tshia or ne bana bandi balume ne bana bandi bakashi ne ngombe yandi ne mpunda yandi ne mikoko yandi ne ntenta wandi ne bionso biakadiye nʼabi: bakalua nʼabi mu tshibanda tshia Akola.

²⁵Yoshua wakamba ne, Wewe wakatukengesha bualu kai? Yehowa neakukengeshe lelu. Bena Isalele bonso bakamukuma ne mabue yeye ne bintu biandi bionso kabidi, bakabiosha ne kahia.

²⁶Bakunguisha mushiki munene wa mabue ha mutu handi; udiku tô ne lelu; ne Yehowa wakalekela tshiji tshiandi. Nunku badi babikila muaba au ne, Tshibanda tshia Akola tô ne lelu.