Read tshiluba 2 Timote 1 Bible Online

2 Timote 1 - tshiluba bible

2 Timote 1

¹Paulo, mupostolo wa Kilisto Yesu, bua disua dia Nzambi, bu mudi mulayi wa muoyo wa mu Kilisto Yesu,

²kudi Timote, muanʼanyi munanga: Ngasa, luse, ditalala bia kudi Nzambi Tatu ne kudi Kilisto Yesu Mukelenge wetu.

³Ndi nsakidila Nzambi, undi nkuatshila mudimu mu muoyo-mukese mutoke, bu muakenza bankambua banyi, mundi nkuvuluka tshi ne ndekelu mu kulomba kuanyi, butuku ne munya

⁴njinga kukutangila, nvuluka binsonshi biebe, bua meme kûshibua ne disanka.

⁵Ndi nvuluka ditabusha didi munda muebe didi kadi ne lubombo, diakadianjila kuikala munda mua kaku webe Loi ne mua mamu webe Eunike; ndi ngitabushishibua ne didi munda muebe kabidi.

⁶Bua bualu ebu adi musue kukuvuluisha bua wewe usonsole tshihedi tshia Nzambi, tshidi munda muebe bua kukutentekesha kua bianza bianyi.

⁷Bua Nzambi kakatuha nyuma wa buowa; kadi wakatuha nyuma wa bukole ne wa dinanga ne wa kudikanda.

⁸Nunku kufuishibu bundu ku mesu bua bumanyishi bua Mukelenge wetu, anyi bua bualu buanyi, meme muena lukanu wandi; kadi ukenge nʼanyi bua lumu luimpe bu mudi bukole bua Nzambi;

⁹wakatusungila, wakatubikila ne dibikila dia tshijila, kembu mudi midimu yetu mimpe, kadi bu mudi disungula diandi mene ne ngasa, wakatuheye mu Kilisto Yesu diambedi bikondo bia tshiendelele kabi bianze kuikalaku.

¹⁰Kadi katataka wakamueneshibua bualu bua dimueneka dia Musungidi wetu Kilisto Yesu, wakajimisha lufu, wakamuenesha muoyo wa tshiendelele ne udi kawi mua kunyanguka mu munya, bualu bua lumu luimpe,

¹¹luakantekabo musambi ne mupostolo ne muyishi bualu bualu.

¹²Bua muanda eu ndi nkenga makenga â kabidi, kadi bundu kabuena bunkuata ku mesu; bua ndi mumumanye yeye unakuitabusha, ne nakuitabushishibua ne yeye udi ne bukole bua kulama tshintu tshianyi tshiteka tô ne dituku diadia.

¹³Ulamate tshidikishilu tshia mei malenge awakuamua kundi mu ditabusha ne mu dinanga dia mu Kilisto Yesu.

¹⁴Tshiotshi tshimpe tshîakatekibua utshilame bimpe ne dikuatshisha dia Nyuma Muimpe udi muikale munda muetu.

¹⁵Udi mumanye bualu ebu ne, Bantu bonso ba mu Asia bakumuka kundi; Fugelo ne Hêmogene badi munkatshi muabo.

¹⁶Mukelenge afue ba mu nsubu wa Onesifolo luse, bualu bua yeye wakasangasha muoyo wanyi misangu ya bungi, ne kakafua bundu bua lukanu luanyi;

¹⁷kadi hakadiye mu Lomo, wakankeba ne disuminyina, wakanmona

¹⁸(Mukelenge amuhe mua kuheteye luse kudi Mukelenge dituku diadia); ne bua bungi bua bintu biakankuatshisheye nʼabi ku Efeso, wewe udi mumanye bimpe.