Read tshiluba Ebelu 7 Bible Online

Ebelu 7 - tshiluba bible

Ebelu 7

¹Bualu bua Melekisedeke eu, mukelenge wa Salema, muakuidi wa Nzambi Mutambe Bunene wa mu diulu, wakasangakana ne Abalahama hakadiye uhingana ku kushiha kuandi kua bakelenge, ne wakamusankisha.

²Kudiye kabidi, Abalahama wakabanyangana nʼandi tshia dikumi tshia bintu bionso (diambedi muikale mukudimuna dina ne, Mukelenge wa buakane; hashishe kabidi, udi biandi Mukelenge wa Salema, kuamba ne, Mukelenge wa ditalala;

³kai tatu, kai mamu, kai bankambua, kai tshibangidilu tshia matuku anyi nshikidilu wa muoyo, kadi muvuishibue bu Muana wa Nzambi) udi muikale muakuidi tshiendelele.

⁴Nuelangane meshi bu muakadi bunene bua muntu eu, wakadi Abalahama, nkambua wetu, muhe tshia dikumi tshia mu bintu bitambe buimpe biakanyengeye mu nvita.

⁵Ne bobo mene ba ku bana ba Lewi badi bangata mudimu wa muakuidi badi ne mukenshi wa kuangatabo bia dikumi kudi bantu bu mudi mikenshi nuambe, kudi bana babo mene, nasha bobo bine bafume ku tshimono tshia Abalahama;

⁶kadi yeye udi kai ne bankambua bandi babadibua kudi Bena Lewi, wakangata tshia dikumi tshia bintu kudi Abalahama, ne wakasankisha udi ne milayi.

⁷Kadi kakuena mpata bua udi utamba bukese udi usankishibua kudi udi umutamba bunene.

⁸Kunoko badi bafua badi bangata bia dikumi, kadi kuakua umue udi ubiangata udibo batuambila ne, Utshidi ne muoyo.

⁹Ne, bua kuamba nunku, Lewi mene udi wangata bia dikumi, wakabifila mu difila dia Abalahama;

¹⁰bualu bua wakatshidi mu tshimono tshia tatu wandi, hakamusangana Melekisedeke.

¹¹Nunku, bu buakane bujalame buikaleku bua buakuidi bua Bena Lewi (bua munshi muabu bantu bakuangata mikenshi) munyi muakadibo kukengela bua muakuidi mukuabo abike wa ku mulongo wa Melekisedeke, ne kabadibu wa ku mulongo wa Alona?

¹²Bualu bua bakakudimuka buakuidi, buakadiku mbua kukudimuna mikenshi kabidi.

¹³Bua yeye muena malu â adibo bamba, udi muena tshisamba tshikuabo, kuditshi kakuakadi muntu wakukuata mudimu wa ku tshioshelu.

¹⁴Bualu budi bumanyishibua ne, Mukelenge wetu wakuledibua mu tshisamba tshia Yuda, tshisamba tshivua Mose kai muambile bua bakuidi.

¹⁵Ne budi butamba kumanyishibua ne, Bikala munga muakuidi ubika mufuanangane ne Melekisedeke,

¹⁶wakavuishabo muakuidi, kembua mikenshi ya bantu ba ha buloba, kadi bua bukole bua muoyo udi kawi ujimina;

¹⁷bualu bua badi bamba ne, Wewe udi muakuidi tshiendelele, Wa ku mulongo wa Melekisedeke.

¹⁸Bualu bua diumusha dia mukenshi wa diambedi didiku bua butekete buau ne bua dihanga diau dia kutukuatshisha,

¹⁹(bua mikenshi kayakavuisha tshintu tshimue tshiakane tshishiki), ne dibueshibua ha muaba wau dia ditekemena ditamba buimpe didiku, ditudi tusemena nʼadi ha buihi ne Nzambi.

²⁰Ne bualu bua buakuidi kabuenaku kabui ne kuditshiha,

²¹bulelela, Bena Lewi bakavuishibua bakuidi kabai ne kuditshiha; kadi Yesu wakavuishibua muakuidi ne kuditshiha kudi Yeye udi wamba bua bualu buandi ne, Mukelenge wakaditshiha, ne kena ukudimuna dî diandi, ne, Wewe udi muakuidi tshiendelele;

²²nunku bua malu â kabidi, Yesu wakulua tshieya tshia dihungila didi ditamba buimpe.

²³Ne bobo mene bakuvuishibua bakuidi ba bungi, bualu bua lufu ludi lubahumbisha bua kushalabo mu mudimu;

²⁴kadi yeye, bualu bua udi ushala tshiendelele, udi ne buakuidi budi kabui bushintuluka.

²⁵Nunku yeye udi ne bukole bua kusungila ne luhandu lujima badi basemena ha buihi ne Nzambi bua bualu buandi, yeye muikale ne muoyo tshiendelele bualu bua kubakuila.

²⁶Bua muakuidi munene wa nunku wakadi mutukumbane, wa tshijila, kai ne bubi, kai mubiha, mutahuluke kudi bantu babi, muvuishibue ha mutu ha mulu;

²⁷udi kai ne bualu, bu muakadi nʼabu bakuidi banene aba, bua kufila milambu ku dituku ne ku dituku, diambedi bua mibi yandi yeye, hashishe bua mibi ya bantu; bua yeye wakenza bualu ebu musangu umue tshiendelele hakadifileye.

²⁸Bua mikenshi idi iteka bantu mu buakuidi bunene, bobo bikale ne butekete; kadi dî dia kuditshiha, diakadi ku nyima kua mikenshi, didi diteka Muana, udi mufuishibue muakane mujalame tshiendelele.