Read tshiluba 1 Petelo 1 Bible Online

1 Petelo 1 - tshiluba bible

1 Petelo 1

¹Petelo, mupostolo wa Yesu Kilisto, kudi bantu basungudibue kudi Nzambi, badi benyi bena tshimuangi, ba mu Ponto, Galatia, Kapadokia, Asia ne mu Bitunia,

²badi basungudibue bu mudi budianjidi kumanya bua Nzambi Tatu mu kujidibua kua Nyuma Muimpe, bua kuikalabo ne ditumikila ne kumiamina kua mashi a Yesu Kilisto; ngasa kunudi ne ditalala bivulangane.

³Batumbishe Nzambi udi kabidi Tatu wa Mukelenge wetu Yesu Kilisto, nyeye wakatulela tshiakabidi bu mudi luse luandi lunene, bua kutuheye ditekemena didi ne muoyo bua dibika dia Yesu Kilisto dia ku bafue;

⁴bua tuikale ne buhianyi budi kabui bubola, budi kabui bunyanguka, budi kabui bufubidila, buakutekibua mu diulu bua bualu buenu,

⁵nuenu mbadi balamibua ku bukole bua Nzambi bua ditabusha tô ne ku luhandu tulongolola bubuluibua mu tshikondo tshia kunshikidilu.

⁶Bua muanda eu nudi nutamba kusanka, nasha bikalaku bualu bua nuenu kunyingalashibua tshituha tshihi mu mateta a mishindu ya bungi;

⁷bualu bua kuteta kua ditabusha dienu, nasha ditetshibua ne kahia, didi ditamba ngolo udi ujimina mushinga mukole, nekusanganyibue ne butumbi ne dinemekibua ne buneme halua dibuluibua dia Yesu Kilisto.

⁸Yeye, unuakadi kanui batangile ku mesu, nyeye unudi nunanga; kadi nudi numuitabusha, kanui numutangila katataka, ne nudi nusanka bikole ne disanka didi hadi mua kuambibua ne didi diûle tente ne butumbi;

⁹nudi nuangata nshikidilu wa ditabusha dienu, nduhandu lua mioyo yenu.

¹⁰Bua luhandu elu baprofete bakakeba ne bakalukesha bikole, bamba bua ngasa wakadi ha kulua kunudi;

¹¹bakebakeba tshikondo kai ne mushindu kai wa tshikondo tshiakabalesha Nyuma wa Kilisto wakadi munda muabo, hakadianjileye kubambila bua makenga a Kilisto ne bua butumbi buakadi ha kualonda.

¹²Buakabuluibua kudibo, ne kabakadikuatshila, bobo bine, malu â mudimu, kudi bakanakuatshilau nuenu mudimu, malu mene akanumanyishabo katataka kudi bantu bakanuambila lumu luimpe mu Nyuma Muimpe wakanutuminabo mufume mu diulu; malu adi banjelo basue kutangilatangila.

¹³Nunku nuele bimono bia meshi enu mikaya, nuikale talala, nujadike ditekemena dienu tshishiki mu ngasa udibo balua nʼandi kunudi ku dibuluibua dia Yesu Kilisto.

¹⁴Nuikale bana batumikidi, kanudifuanyikishi bu munuakadi mu nkuka yenu ya diambedi, mu buhote buenu;

¹⁵bu mudi yeye wakanubikila udi wa tshijila, nunku nuenu kabidi nulue ba tshijila mu malu onso a muoyo wenu;

¹⁶bualu bua dî didi difundibua ne, Nuenu nenuikale ba tshijila, bualu bua meme ndi wa tshijila.

¹⁷Binuamubikila bu Tatu udi ulumbuluisha muntu yonso bu mudi bienzedi biandi kai ne kansungunsungu, nuhitshishe tshikondo tshia buenyi buenu mu ditshina.

¹⁸Bualu bua nudi bamanye ne, Tuakahikudibua, kenku bintu bidi bijimina, ku argent anyi ku ngolo, mu malu a hatuhu a muoyo wenu akanushilabo kudi batatuʼenu;

¹⁹kadi nuakahikudibua ku mashi a mushinga mukole, bu a muana wa mukoko kai ne tshilema ne kai ne ditoba, ku mashi a Kilisto mene;

²⁰wakadianjila kumanyibua bulelela ku mpala kua tshibangidilu tshia buloba, kadi wakamueneshibua kunshikidilu kua bikondo bua bualu buenu.

²¹Bua bualu buandi nudi bena kuitabusha ba Nzambi wakamubisha ku bafue, wakamuha butumbi; bua ditabusha dienu ne ditekemena dienu bikale mu Nzambi.

²²Bualu bua nuenu nuakulengesha mitshima yenu mu kutumikila kuenu kua malu a bushua bua kuikala ne dinanga dia bana benu ba mu Kilisto didi kadî ne lubombo, nunku nunangangane mu mitshima yenu bikole;

²³bualu bua nuakaledibua tshiakabidi, kenku bintu bidi bijimina, kadi ku bintu bidi kabi bijimina, ku dî dia Nzambi udi ne muoyo ne udiku tshiendelele.

²⁴Bualu bua bakafunda ne, Ba ha buloba bonso badi bu bisosa, Ne butumbi buabo buonso budi bu tshilongo tshia bisosa. Bisosa bidi bifubidila, Ne tshilongo tshidi tshimata hanshi;

²⁵Kadi dî dia Mukelenge didiku tshiendelele. Edi udi dia lumu luimpe diakanuambilabo.