Read tshiluba 1 Petelo 5 Bible Online

1 Petelo 5 - tshiluba bible

1 Petelo 5

¹Nunku ndi nsengelela bakulu badi munkatshi muenu, ndi bianyi mukulu nʼabo, ne mumanyi wa makenga a Kilisto, ne muangatshi wa butumbi budi buamba kubuluibua, ne,

²Nulame tshisumbu tshia mikoko ya Nzambi tshidi munkatshi muenu, nubalame, kanui benzeshibue ku bukole, kadi ne mitshima ya disanka bu mu disua dia Nzambi; kambualu bua kukeba biuma, kadi nuikale ne mutshima mulongolola bimpe;

³kanuikadi bu bakokeshi ba badi ku nyima kuenu, kadi nudivuishe bifuanyikishi bimpe kudi mikoko.

⁴Ne hamueneshibue Mulami Munene, nenuangate tshifulu tshia butumbi tshidi katshi tshifubidila.

⁵Muomumue, nuenu bansongalume, nukokele bakulumpe. E, buonso buenu nudiluatshishe ne buhuekele, bua kukuatshishangana; bualu bua Nzambi udi uhidia badi badisue, kadi udi uha badi badihuekesha ngasa.

⁶Nunku nudihuekeshe kunshi kua tshianza tshikole tshia Nzambi, bua yeye anubandishe mu tshikondo tshiasunguleye;

⁷nuteke ntatu yenu yonso kudiye, bualu bua yeye udi unulubulula.

⁸Nuikale bahote, nutabale; umena lukuna wenu, diabolo mene, udi wendakana bu nyama wa ntambue udi ukungula, ukeba bantu ba kudieye;

⁹numutantamene bajalame mu ditabusha dienu; bualu bua nudi bamanye ne makenga momumue adi makumbashibue mu bana benu ba mu Kilisto badi ha buloba ebu.

¹⁰Ne Nzambi wa ngasa yonso, wakanubikila mu butumbi buandi bua tshiendelele bua mu Kilisto, hanuamana kukenga musangu muihi, yeye muine neanuakashe tshishiki, neanujadike, neanukoleshe.

¹¹Bukokeshi buikale kudiye tô ne ku bikondo bia bikondo. Amen.

¹²Nakunufundila mei makese mu bianza bia Siluano, undi mbala bu muanʼetu wa mu Kilisto udi mua kueyemenyibua, bua kunusengelela ne bua kunumanyisha ne, Eu udi ngasa mulelela wa Nzambi; nujalamemu bikole.

¹³Wa mu Babulona, musungula nʼenu, udi unuela muoyo, ne muanʼanyi Mâko udi unuela muoyo kabidi.

¹⁴Nuelangane muoyo ne kutuangana kua mishiku kua dinanga. Ditalala dikale kudi buonso buena badi mu Kilisto.