Read tshiluba 1 Yone 3 Bible Online

1 Yone 3 - tshiluba bible

1 Yone 3

¹Tangilai mushindu wa dinanga diakamba Tatu bua tuetu tubikidibue ne Bana ba Nzambi; ne tud nunku. Bua bualu ebu ba ha buloba kabena batumanye, bualu bua kabakamumanya.

²Bananga, katataka tudi bana ba Nzambi; kadi kabuena buanze kumanyibua mutuikala. Tudi bamanye ne, Biamueneshibueye, netuikale bafuanangane nʼandi; bualu bua netumumone bu mudiye.

³Muntu yonso udi ne ditekemena edi kudiye udi udilengesha bu mudiye mulengele.

⁴Muntu yonso udi wenza bubi udi ushiha mikenshi kabidi, bualu bua bubi budi kushiha kua mikenshi.

⁵Nudi bamanye ne, Yeye wakamueneshibua bua kumusheye mibi; ne kamuena bubi munda muandi.

⁶Muntu yonso utu wikala munda muandi katu wenza bibi; muntu yonso utu wenza bibi kena muanze kumumona, kena mumumanye.

⁷Bana bakese, muntu kanuhambuishi; muntu utu wenza malu makane udi muakane bu mudiye Yeye muakane;

⁸yeye utu wenza bibi udi wa diabolo; bualu bua diabolo udi muenze bibi ku tshibangidilu. Bua bualu ebu Muana wa Nzambi wakamueneshibua bua kubutuleye midimu ya diabolo.

⁹Muntu yonso udi muledibue kudi Nzambi, katu wenza bibi, bualu bua diminu diandi dia muoyo ditu dikala munda muandi; yeye kena mumanye mua kuenzenza bibi bualu bua yeye udi muledibue kudi Nzambi.

¹⁰Mu muanda eu bana ba Nzambi ne bana ba diabolo badi bajinguluka; muntu yonso udi kai wenza malu makane kena wa Nzambi; ne yeye udi kai unanga muanʼabo kabidi.

¹¹Bua edi ndi dinuakunvua ku tshibangidilu bua tuetu tunangangane;

¹²kembua kuikala bu Kana, wakadi wa mubi, wakashiha muanʼabo. Ne yeye wakamushihela tshinyi? Bualu bua midimu yandi yakadi mibi ne ya muanʼabo yakadi miakane.

¹³Bana betu, kanukemi bikala ba ha buloba nʼenu lukuna.

¹⁴Tudi bamanye ne, Tuakumuka ku lufu, tuakubuela mu muoyo, bualu bua tudi tunanga bana betu. Yeye udi kai ne dinanga udi muikale mu lufu.

¹⁵Muntu yonso udi ne muanʼabo lukuna udi mushihianganyi; ne nudi bamanye ne, Kakuena mushihianganyi udi ne muoyo wa tshiendelele muikale munda muandi.

¹⁶Mu muanda eu tudi bamanye dinanga, bualu bua Yesu wakateka muoyo wandi hanshi bua bualu buetu; ne tuetu tudi ne bualu bua kuteka mioyo yetu hanshi bualu bua bana betu.

¹⁷Kadi bikala muntu ne bintu bia ha buloba, ne yeye udi utangila muanʼabo ubikengela, ne yeye udi ukanda luse luandi kudiye, munyi mudi mua kuikala dinanga dia Nzambi munda muandi?

¹⁸Bana bakese, katunanganganyi ku mei anyi ku ndimi; kadi tunangangane mu bienzedi ne mu bulelela.

¹⁹Mu muanda eu netumanye ne, Tudi ba bulelela, netuholeshe mitshima yetu ku mesu kuandi;

²⁰bua hikala mitshima yetu ituhisha, Nzambi udi uhita mitshima yetu bunene, ne udi mumanye malu onso.

²¹Bananga, hikala mitshima yetu kayi ituhisha, tudi ne dikima ku mesu kua Nzambi;

²²ne bintu bionso bitudi tumulomba, tudi tshiangata kudiye, bualu bua tudi tulama mikenshi yandi, tudi tuenza malu adi avuisha disanka ku mesu kuandi.

²³Eu mukenshi wandi bua tuetu tuitabushe dina dia Muana wandi Yesu Kilisto, ne bua tuetu tunangaʼngane, bu muakatuheye mukenshi.

²⁴Yeye udi ulama mikenshi yandi, utu wikala munda muandi, ne Yeye kabidi utu wikala munda muandi. Ne mu muanda eu tudi bamanye ne, Yeye utu wikala munda muetu, bua Nyuma wakatuheye.