Read tshiluba Balumbuluishi 10 Bible Online

Balumbuluishi 10 - tshiluba bible

Balumbuluishi 10

¹Ku nyima kua Abimeleke, Tola, muana wa Puwa, muana wa Dodo, wa mu tshisamba tshia Yisakâ, wakabika, wakasungila Bena Isalele; yeye wakadi mushikame ku Shamî wa ku mikuna ya Efelayima.

²Yeye wakalumbulula Bena Isalele bidimu makumi abidi ne bisatu, wakafua biandi, bakamujika mu Shami.

³Yai, Muena Gilada, wakabika ku nyima kuandi, wakalumbulula Bena Isalele bidimu makumi abidi ne bibidi,

⁴Yeye wakadi ne bana balume makumi asatu bakadi benda ha nyima ha bana ba nyama ya mpunda makumi asatu, bakadi ne misoko makumi asatu idibo babikila ne, Hawota-yai tô ne lelu, idi mu buloba bua Gilada.

⁵Yai wakafua, bakamujika mu Kamona.

⁶Bena Isalele bakenza malu mabi ku mesu kua Yehowa, bakatendelela Babala ne Bashatelota ne nzambi ya Bena Sulia ne nzambi ya Bena Sidona ne nzambi ya Bena Moaba ne nzambi ya Bena Amona ne nzambi ya Bena Peleshete; bakalekela Yehowa, ka bakamuenzela mudimu.

⁷Tshiji tshia Yehowa tshiakadi kudi Bena Isalele, yeye wakabahana mu bianza bia Bena Peleshete ne bia Bena Amona.

⁸Bobo bakatatshisha, bakakengesha Bena Isalele tshidimu atshi. Bakatatshisha Bena Isalele bonso bakadi dishiya dia Yadene mu buloba bua Bena Amole budi mu Gilada bidimu dikumi ne muanda mukulu.

⁹Bena Amona bakasabuka dishiya dia Yadene bua kuluanganabo ne Bena Yuda ne Bena Benyamina ne Bena Efelayima; Bena Isalele bakadi ne ntatu ya bungi.

¹⁰Bena Isalele bakadila kudi Yehowa, bamba ne, Tuetu tuakakuenzela bibi, bualu bua tuetu tuakalekela Nzambi wetu, tuakakuatshila Babâla mudimu.

¹¹Yehowa wakambila Bena Isalele ne, Tshiakanusungila kudi Bena Ejipitu ne kudi Bena Amole ne kudi Bena Amona ne kudi Bena Peleshete, anyi?

¹²Bena Sidona kabidi ne Bena Amaleka ne Bena Maona bakanutatshisha; nuenu nuakadila kundi, nakanusungila mu bianza biabo.

¹³Kadi nuenu nuakandekela, nuakakuatshila nzambi mikuabo mudimu, tshiena nnusungila kabidi.

¹⁴Yai bienu, nudile kudi nzambi inuakasungula; musungile mu ntatu yenu.

¹⁵Bena Isalele bakambila Yehowa ne, Tuakenza bibi, utuenzele bu mûdi musue, kadi anji kutusungila lelu, tudi tukusengelela.

¹⁶Bobo bakumusha nzambi ya bende yakadi munkatshi muabo, bakakuatshila Yehowa mudimu; ne mutshima wandi wakanyingalala bua ntatu ya Bena Isalele.

¹⁷Hashishe Bena Amona bakadisangisha hamue, bakatula tshitudilu tshiabo mu Gilada. Bena Isalele bakadi badisangisha hamue, bakatula tshitudilu tshiabo mu Misepa.

¹⁸Bantu ne bakelenge ba mu Gilada bakakonkangana ne, Muntu kai wahanga nvita bua kuluangana ne Bena Amona? Yeye mene neikale ku mutu kua Bena Gilada bonso.