Read tshiluba Balumbuluishi 18 Bible Online

Balumbuluishi 18 - tshiluba bible

Balumbuluishi 18

¹Mu matuku au kamuakadi mukelenge mu Isalele; mu matuku au ba mu tshisamba tshia Dana bakakeba muaba wa kushikamabo; bualu bua tô ne ku dituku adi bobo kabakadi bangata buhianyi buabo munkatshi mua bisamba bia Isalele.

²Bena Dana bakatuma bantu batanu ba mu meku abo, bena bukitu ba ku Solea ne ba ku Eshataola bua kutentekelabo buloba ne bua kubutangilabo. Bakabambila ne, Yai bienu, nutangile buloba; bakalua ku mikuna ya Efelayima ku nsubu wa Mika, bakalalaku,

³Hakadibo ha buihi ne nsubu wa Mika, bakamanya dî dia nsongalume, Muena Lewi; bakasemena ha buihi, bakamukonka ne, Wakalua nʼebe kunoko nganyi? Udi wenza tshinyi mu muaba eu? Wakadila tshinyi kunoko?

⁴Yeye wakabambila ne, Mika wakangenzela nunku ne nunku, wakambuesha mu mudimu, nakalua muakuidi wandi.

⁵Bobo bakamuambila ne, Tudi tukusengelela ne, Utuebeshile Nzambi bua tuetu tumanye ne tudi ne diakalengele mu nshila wetu utuaya.

⁶Muakuidi wakabambila ne, Yai bienu talalâ, nshila unudi nuya udi ku mpala kua Yehowa.

⁷Hashishe balume aba batanu bakumuka, bakafika ku Layisha, bakatangila bantu bakadimu, bu muakashikamabo mu miaba mikole ne Bena Sidona, kabayi ne bualu; kakuakadi muntu mu buloba abu wakadi ne bukokeshi bua kubadisha bundu mu malu abo; bakadi kule ne Bena Sidona, kabakadi babuelakana ne bantu bakuabo.

⁸Bakahingana kudi bana babo ba ku Solea ne Eshetaola; bana babo bakakonka ne, Nudi nuamba tshinyi?

⁹Bakamba ne, Bikai, tuyai kubaluisha; bualu bua tuakatangila buloba ne budi buimpe; nuenu nenushikame tshianana, anyi? Kanujanguluki bua kuya ne bua kubuelamu ne bua kuhiana buloba.

¹⁰Hanuabuelamu nenusangane bantu badi bashikama mu miaba mikole, ne buloba budi bunene; bualu bua Nzambi wakafila buloba budi kabuyi buhanga bintu mu bianza bienu.

¹¹Balume nkama isambombo ba mu tshisamba tshia Dana, bakadi ne bintu bia nvita bisuika hamʼbidi habo, bakumuka ku Solea ne Eshetaola.

¹²Bakaya, bakatula tshitudilu tshiabo mu Kîyata-yalima mu Yuda; nunku badi babikila muaba au ne, Mahane-dana tô ne lelu; monai, udi ku nyima kua Kîyata-yalima.

¹³Bakumukaku, bakayila ku mikuna ya Efelayima, bakalua ku nsubu wa Mika.

¹⁴Hashishe balume aba bakaya bua kutentekelabo buloba bua Layisha, bakakonka bana babo ne, Nudi bamanye ne efoda ne telafima ne luhingu luakasongabo ne luhingu luakatulabo bidi mu nsubu ei, anyi? Nunku nuelangane meji a bualu bunudi nʼabu mbua kuenza.

¹⁵Bakasesuka, bakaya ku nsubu wa nsongalume, Muena Lewi, ku nsubu wa Mika mene, bakamukonka ne, Udi bimpe, anyi?

¹⁶Bantu aba nkama isambombo ba mu tshisamba tshia Dana bakadi ne bintu biabo bia nvita bisuika hamʼbidi, bakimana ku tshibi tshia musoko.

¹⁷Balume aba batanu bakadi baye kua kutentekelabo buloba, bakaya, bakabuelamu, bakangata luhingu luakasongabo ne efoda ne telafima ne luhingu luakadibo; muakuidi wakadi muimane ku tshibi tshia musoko hehi ne bantu aba nkama isambombo bakadi ne bintu bia nvita bisuika hamʼbidi.

¹⁸Hakaya bantu aba mu nsubu wa Mika, ne hakangatabo luhingu luakasongabo ne efoda ne telafima ne luhingu luakatulabo, muakuidi wakabakonka ne, Nudi nuenza tshinyi?

¹⁹Bakamuambila ne, Huwa biebe, teka tshianza tshiebe ku mishiku yebe, uye nʼetu, wikale kutudi bu tatu ne muakuidi; bidi bimpe bua wewe kuikala muakuidi wa mu nsubu wa muntu umue, anyi muakuidi wa tshisamba tshijima tshia mu Isalele?

²⁰Mutshima wa muakuidi wakasanka, yeye wakangata efoda ne telafima ne luhingu luakasongabo, wakaya munkatshi mua bantu.

²¹Bakumukaku, bakaya, bakateka bana ne bimuna ne bintu biabo ku mpala kuabo.

²²Hakadibo kaba kale ne nsubu wa Mika, bantu bakadi bashikama mu nsubu ya ha buihi ne nsubu wa Mika bakadisangisha hamue, bakihatshila Bena Dana.

²³Bobo bakadila kudi Bena Dana. Bobo bakatshunguluka kudi Mika, bakamukonka ne, Bualu kai buakukutonda bua wewe wakatulonda ne tshisumbu tshinene nunku?

²⁴Yeye wakamba ne, Nuakuangata nzambi yanyi inakuenza, ne muakuidi, nuakuya nʼabi, ndi ne bintu bikuabo kudi kunyi? Munyi munuakunkonka ne, Bualu kai budi bukutonda?

²⁵Bena Dana bakamuambila ne, Dî diebe kadiunvuiki munkatshi muetu, anyi bantu badi ne tshiji nebakukuate, ne wewe neujimishe muoyo webe ne mioyo ya ba mu nsubu webe.

²⁶Bena Dana bakaya mu nshila; ne bakamanya Mika ne, Badi bampite bukole, yeye wakalukila, wakahingana ku nsubu kuandi.

²⁷Bobo bakangata bintu bia Mika biakenzeye ne muakuidi wakadiye nʼandi, bakalua ku Layisha, kudi bantu bakadi talalâ ne kabayi ne bualu, bakabashiha ne miele ya nvita, bakosha musoko ne kahia.

²⁸Kabakadi ne musungula bualu bua musoko wakadi kule ne Sidona, ne bobo kabakabuelakana ne bantu bakuabo; musoko eu wakadi mu tshibanda tshia ha buihi ne Bete-lehoba. Bakasa musoko, bakasanka mamu.

²⁹Bakidika musoko eu dina ne, Dana, ndina dia Dana nkambua wabo, wakaledibua kudi Isalele; kadi dina dia musoko diakadi Layisha diambedi.

³⁰Bena Dana hakadimanyisha luhingu lusonga Yonatana, muana wa Gêshoma, muana wa Mose, yeye ne bana bandi balume, bakadi bakuidi ba mu tshisamba tshia Bena Dana tô ne hakayabo mu buluka.

³¹Bakadimanyikila luhingu lua Mika luakenzeye tô ne matuku onso a hakadi nsubu wa Nzambi mu Shilo.