Read tshiluba Balumbuluishi 7 Bible Online

Balumbuluishi 7 - tshiluba bible

Balumbuluishi 7

¹Hashishe Yelubâla, udibo babikila ne, Gideona kabidi, ne bantu bonso bakadi nʼandi, bakabika ne dinda dionso, bakasa tshitudilu tshiabo ku mpokolo wa mai a Haloda; tshitudilu tshia Bena Midiyana tshiakadi ku luseke luabo lua ku node ku mukuna wa Mole tô ne mu tshibanda.

²Yehowa wakambila Gideona ne, Bantu badi nʼebe badi bahita bungi bua meme kufila Bena Midiyana mu bianza biabo; bobo nebadileshe ku mesu kuanyi, badiamba ne, Tuakudisungila ne bianza bietu.

³Wambile bantu bonso ku matshu abo ne, Yonso udi ne dishina ne kuikala, alukile, ahingane biandi ku mukuna wa Gilada. Bantu binunu makumi abidi ne bibidi bakahingana, ne binunu dikumi bia bantu biakashala.

⁴Yehowa wakambila Gideona kabidi ne, Bantu batshidi batamba bungi; uhueke nʼabo ku mai, nenkutetshileboku; hashishe muntu wakuambila ne, Aye nʼebe, neaye biandi nʼebe; ne muntu wakuambila ne, Kayi nʼebe, kayi nʼebe nansha.

⁵Nunku yeye wakalua ne bantu bonso ku mai; Yehowa wakambila Gideona ne, Yonso udi ulaka mai ne ludimi luandi bu mudi mbua ulaka, wewe neumuteke ha buandi; ne muinu yonso udi utua binu hanshi bua kunueye mai, umuteke ha buandi kabidi.

⁶Bungi bua bantu bakalaka, bateke bianza ku mishiku, buakadi balume nkama isatu; kadi bantu bonso bakuabo bakatua binu hanshi bua kunuabo mai.

⁷Yehowa wakambila Gideona ne, Neufile Bena Midiyana mu tshianza tshiebe, nenkusungile kudi bantu aba nkama isatu bakalaka mai; bantu aba bonso bakuabo baye, muntu ku muaba wandi muntu ku muaba wandi.

⁸Nunku bantu bakangata bia kudia ne mpungi mu bianza biabo; yeye wakatuma Bena Isalele bakuabo muntu ku ntenta wandi muntu ku ntenta wandi; wakashala anu ne bantu aba nkama isatu; tshitudilu tshia Midiyana tshiakadi kuinshi kuandi mu tshibanda.

⁹Butuku abu mene Yehowa wakamuambila ne, Bika biebe, hueka ku tshitudilu tshiabo, bualu bua nakabifila mu bianza biebe.

¹⁰Kadi biwatshina mua kuya nkayebe, uye ku tshitudilu ne Pula, muena mudimu webe;

¹¹wewe neunvue mei adibo bambilangana; hashishe bianza biebe nebikoleshibue bua kuhueka mu tshitudilu. Hashishe yeye wakahueka ne Pula, muena mudimu wandi, tô ne kunfudilu kua bena nvita bakadi mu tshitudilu.

¹²Bena Midiyana ne Bena Amaleka ne bantu bonso ba ku esete bakadi balale mu tshibanda bu mikumbi bua bungi buaho. Kabakamanya mua kubala tumelo tuabo, bungi bualu buakadi bu nsenga ya ku muelelu wa mai manene.

¹³Hakafika Gideona kudibo, wakasangana muntu wakadi wawila mukuabo tshilota tshiandi; yeye wakamuambila ne, Nakalota tshilota, nakatangila mutanda wa bidia bia orge[2] wenda ubunguluka mu tshitudilu tshia Midiyana, wakadikuma ku ntenta, ntenta wakuhuka, wakatua mutu muinshi, wakabataha.

¹⁴Muena kuabo wakamuambila ne, Ebu kambualu bukuabo, anu muele wa nvita wa Gideona, muana wa Yoasha, Muena Isalele; Nzambi wakamana kufila Midiyana ne musumba wandi wonso mu tshianza tshiandi.

¹⁵Kakunyua Gideona kuaula kua tshilota ne kukudimuna kuatshi, hashishe yeye wakatendelela, wakahingana ku tshitudilu tshia Bena Isalele, wakamba ne, Bikai, bualu bua Yehowa wakafila musumba wa Bena Midiyana mu bianza bienu.

¹⁶Yeye wakatahulula bantu nkama isatu bisumbu bisatu, wakabaha mpungi mu bianza biabo bonso ne milondo munda mutuhu ne bimunyi mu milondo.

¹⁷Yeye wakabambila ne, Nuntangile meme, nuenze bu mungenza; ne monai, hanalua ku butshika bua tshitudilu, hashishe nenuenze bu mungenza.

¹⁸Hangela bianyi mpungi, meme ne bonso badi nʼanyi, hashishe nuenu kabidi nuele mpungi ku matshika onso a tshitudilu, nuambe ne, Bualu bua Yehowa ne bua Gideona.

¹⁹Nunku Gideona ne lukama lua bantu bakadi nʼandi, bakalua ku butshika bua tshitudilu mundankulu hakatekabo bansentedi bahia-bahia anu musangu muihi; bakela mpungi, bakashiha milondo yakadi mu bianza biabo.

²⁰Bantu ba mu bisumbu bisatu bakela mpungi, bakashiha milondo, bakakuata bimunyi mu bianza biabo bia bakashi ne mpungi mu bianza bia balume bua kuyela; bakela mbila ne, Muele wa nvita wa Yehowa ne wa Gideona.

²¹Bakimana muntu ha muaha wandi muntu ha muaba wandi, banyunguluke tshitudilu; musumba wonso wakanyema; bakela mbila, bakabihata.

²²Bantu aba nkama isatu bakela mpungi; Yehowa wakabaluishisha muntu ne mukuandi nvita, ne musumba wonso; musumba wonso wakanyema tô ne ku Bete-shita ku luseke lua Zelala tô ne ku butshika bua Abele-mehola hehi ne Tabata.

²³Bena Isalele ba mu Nafatale ne Ashe ne Manashe bakadisangisha, bakalonda Bena Midiyana.

²⁴Gideona wakatuma ba-messager kudi Bena Efelayima ba ku mikuna ne, Luai kuluisha Bena Midiyana, nunyenge mai adi ku mpala kuabo tô ne ku Bete-bala ne ku Yadene. Nunku Bena Efelayima bakadisangisha hamue, bakanyenga mai onso tô ne ku Bete-bala ne ku Yadene.

²⁵Bakakuata bana ba mukelenge wa Midiyana babidi, Oleba ne Zêbe; bakashiha Oleba ku dibue dia Oleba ne bakashiha Zêbe ku tshikaminu tshia Zêbe; bakihata Bena Midiyana. Bakalua ne mutu wa Oleba ne wa Zêbe kudi Gideona dishiya dia Yadene.