Read tshiluba 1 Samuele 1 Bible Online

1 Samuele 1 - tshiluba bible

1 Samuele 1

¹Muntu wa mu Lamatayimasofima wa ku mikuna ya Efelayima wakadiku, dina diandi Elekana, muana wa Yelohama, muana wa Elihu, muana wa Tohu, muana wa Sufa, Muena Efelayima,

²wakadi ne bakashi babidi: dina dia muadi diakadi Hana, ne dina dia mulonde muadi diakadi Penina. Penina wakadi ne bana kadi Hana kakadi ne bana nansha.

³Muntu eu wakadi Umuka ku musoko wandi ku tshidimu ku tshidimu bua kutendeleleye ne bua kufileye milambu kudi Yehowa wa misumba ku Shilo. Bana balume babidi ba Eli, bakuidi ba Yehowa, bakadiku mena abo Hofeni ne Pinehasa.

⁴Hakalua dituku dia Elekana kufileye milambu, diambedi yeye wakaha Penina, mukashi wandi, ne bana bandi ba balume bonso ne bana bandi ba bakashi, bintu biabo:

⁵kadi wakaha Hana bintu misangu ibidi: bualu bua yeye wakananga Hana, kadi Yehowa wakamujidika munda muandi.

⁶Mutatshishi wandi wakatamba kumutatshisha ne kumunyingalasha, bualu bua Yehowa wakamujidika munda.

⁷Wakadi umuenzela nunku ku tshidimu ku tshidimu hakayeye ku nsubu wa Yehowa: wakamutatshisha nunku, yeye wakadi anu udila, kakadia biandi.

⁸Hashishe, Elekana bayandi wakamukonka ne, Hana, udi udidila tshinyi? Kuena udia bua tshinyi? Mutshima webe udi unyingala bua tshinyi? Meme tshiena muhite bana ba balume dikumi kudi, anyi?

⁹Hakashikishabo kudia ne kunua mu Shilo, Hana wakabika biandi. Eli muakuidi wakadi ushikama ha nkuasa wandi ku tshilua tshia ku tshibi tshia ntempelo wa Yehowa.

¹⁰Mutshima wa Hana wakatamba kunyingalala, wakadi utendelela Yehowa anu udila.

¹¹Yeye wakaditshiha, wakamba ne, Yehowa, biwatangila kunyingalala kua muntu webe mukashi, biwanvuluka, biwikala kuyi uhua muntu webe mukashi muoyo, kadi biwaha muntu webe mukashi muana mulume, meme nemmufile kudi Yehowa matuku andi onso a muoyo wandi: dihaya kadiena dibeya ku mutu wandi.

¹²Hakananukileye kutendelela ku mpala kua Yehowa, Eli wakatangila mukana muandi.

¹³Hana wakadi wakula anu mu mutshima wandi, anu mishiku yandi yakadi inyunga, dî diandi ka diakadi diunvuika; nunku Eli wakelangana meji ne yeye udi mukuatshike maluvu,

¹⁴Eli wakamukonka ne, Wewe neukuatshike maluvu musangu bule munyi? Umushe maluvu ebe.

¹⁵Hana wakamukudimuna ne, Nansha, mukelenge wanyi, ndi mukashi udi ne mutshima munyingalala; tshiakanua nvinyo anyi maluvu makole; kadi nakuambila Yehowa malu onso adi mu mutshima wanyi.

¹⁶Kubadi muntu webe mukashi bu muntu mubi; nakuamba mei â bualu bua kunyingalala kuanyi ne kutatshishibua kuanyi kuakutamba.

¹⁷Hashishe Eli wakamukudimuna ne, Ya biebe talalâ, Nzambi wa Isalele unvue biandi kulomba kuwakumulomba.

¹⁸Yeye wakamba ne, Witabushe bua muntu webe mukashi asangane luse ku mesu kuebe. Nunku mukashi wakabika, wakaya mu nshila wandi, wakadia bidia; mutshima wandi kawakadi unyingalala kabidi.

¹⁹Bakabika dinda hatshiatshia honso, bakatendelela ku mpala kua Yehowa, bakahingana, bakafika ku nsubu wabo mu Lama: Elekana wakamanya Hana, mukashi wandi, ne Yehowa wakamuvuluka.

²⁰Hana wakimita difu, ne hakakumbana ngondo yandi, wakalela muana wa balume, wakamuidika dina diandi Samuele, wakamba ne, Bualu bua nakumulomba kudi Yehowa.

²¹Muntu eu Elekana ne bonso ba mu nsubu wandi bakaya bua kufilabo milambu ya tshidimu atshi kudi Yehowa, ne bua kuditshiha.

²²Kadi Hana kakaya biandi: yeye wakambila bayandi ne, Tshiena nya tô ne halekela muana mabele; hashishe nenye nʼandi bua kumuenekeye ku mesu kua Yehowa ne bua kushaleyeku tshiendelele.

²³Elekana bayandi, wakamuambila ne, Wenze biebe budi buimpe ku mesu kuebe; ushale tô ne halekeleye mabele: Yehowa nkayandi ajadike dî diandi. Nunku mukashi wakashala, wakamusha muanʼandi mulume mabele tô ne hakalekeleye mabele.

²⁴Hakalekeleye mabele, yeye wakaya nʼandi; wakaya ne bana balume ba ngombe basatu ne épha[1] wa bukula bua blé ne mulondo wa nvinyo; wakalua ne muana ku nsubu wa Yehowa mu Shilo; muana wakatshidi mutekete.

²⁵Bakashiha muana wa ngombe, bakalua ne muana kudi Eli.

²⁶Hana wakamba ne, Mukelenge wanyi, bu mudi mutshima webe ne muoyo, bulelela, mukelenge wanyi, meme ndi mukashi au wakimana hehi nʼebe kunoko, utendelela Yehowa.

²⁷Nakamulomba muana eu, ne Yehowa wakamana kumpa kulomba kuanyi kunakumulomba:

²⁸nunku nakumuhingisha kudi Yehowa; nakumufila kudi Yehowa matuku onso adiye ne muoyo. Yeye wakatendelelaku Yehowa.