Read tshiluba 1 Samuele 19 Bible Online

1 Samuele 19 - tshiluba bible

1 Samuele 19

¹Shaula wakambila Yonatana, muanʼandi mulume, ne bahika bandi bonso bua kushihabo Davidi. Kadi Yonatana, muana mulume wa Shaula, wakatamba kusanka bua Davidi.

²Yonatana wakambila Davidi ne, Tatu wanyi Shaula udi ukeba kukushiha; nunku ndi nkusengelela ne, Udimuke biebe ne dinda, wikale ha muaba musokome, mubutame;

³ne meme nenye kuimana ha buihi ne tatu wanyi mu budimi bûdi; meme nenyikile ne tatu wanyi bualu buebe; binamona bualu nenkuambile.

⁴Yonatana wakatumbisha Davidi kudi tatu wandi Shaula, wakamuambila ne, Mukelenge kenzedi muntu wandi Davidi bualu bubi, bualu bua yeye kena muanze kukuenzela wewe bibi, ne bualu bua malu onso akakuenzeleye adi matambe buimpe;

⁵bualu bua yeye wakateka muoyo wandi mu tshianza tshiandi hakashiheye Muena Peleshete, ne Yehowa wakaha Bena Isalele luhandu lunene: wewe wakatangila bualu ebu, wakasanka; wewe udi musue kumatshisha mashi a muntu muakane bua kushiha Davidi udi kayi ne bualu tshinyi?

⁶Shaula wakunyua dî dia Yonatana; Shaula wakaditshiha ne, Bu mudi Yehowa ne muoyo, kabena bamushiha.

⁷Yonatana wakabikila Davidi, wakamuambila malu â onso. Yonatana wakalua ne Davidi kudi Shaula, yeye wakadi ku mesu kuandi bu muakadiye diambedi.

⁸Nvita yakadiku kabidi; Davidi wakaluhuka, wakaluangana ne Bena Peleshete, wakabashiha ba bungi: bakanyema ku mesu kuandi.

⁹Nyuma mubi mutume kudi Yehowa wakadi kudi Shaula hakashikameye mu nsubu muandi ne difuma mu tshianza tshiandi; Davidi wakadi wimba tshisanji ne tshianza tshiandi.

¹⁰Shaula wakakeba kuasa Davidi difuma dimusompoke dikuate mu tshimanu tshia nsubu; kadi Davidi wakehela, wakumuka ku mesu kua Shaula, difuma diakakuata mu tshimanu tshia nsubu; Davidi wakanyema, wakahanduka butuku ebu.

¹¹Shaula wakatuma bantu ku nsubu wa Davidi bua kumutentekelabo ne bua kumushihabo dinda; Mîkala, mukashi wa Davidi, wakamuambila ne, Biwahidia kusungila muoyo webe butuku ebu, hatshiabu nebakushihe.

¹²Nunku Mikala wakahuekeshila Davidi ku disoso dia nsubu; wakanyema biandi, wakahanduka.

¹³Mikata wakangata luhingu, wakajadika mu bulalu, wakateka musamu wa miosa ya mbushi ku mutu kualu, wakalubuikila bilulu.

¹⁴Hakatuma Shaula ba-messager bua kukuatabo Davidi, yeye wakamba ne, Udi usama.

¹⁵Shaula wakatuma bantu bakuabo bua kutangilabo Davidi, wamba ne, Luanʼandi kundi mu bulalu bua meme kumushiha.

¹⁶Hakabuela bamessager mu nsubu, bakatangila luhingu mu bulalu ne musamu wa miosa ya mbushi ku mutu kualu.

¹⁷Shaula wakakonka Mikala ne, Bualu kai wakundinga nunku, wakulekela muena lukuna wanyi ne yeye wakuhanduka? Mikala wakakudimuna Shaula dî ne, Yeye wakungambila ne, Undekele, nenkushihe wewe bua tshinyi?

¹⁸Davidi wakanyema, wakahanduka, wakaya kudi Samuele mu Lama, wakamuambila malu onso akamuenzela Shaula. Yeye ne Samuele bakaya, bakashikama mu Nayota.

¹⁹Bakambila Shaula ne, Mona, Davidi udi mu Nayota hehi ne Lama.

²⁰Shaula wakatuma ba-messager bua kukuatabo Davidi; kadi hakatangilabo tshisumbu tshia baprofete bamba dî dia Nzambi ne Samuele muimane ku mutu kuabo, Nyuma wa Nzambi wakatulukila ba-messager ba Shaula, bobo bakamba dî dia Nzambi kabidi.

²¹Hakambilabo Shaula bualu ebu, yeye wakatuma ba-messager bakuabo, bobo bakamba dî dia Nzambi kabidi. Wakatuma ba-messager tshiakasatu, ne bobo bakamba dî dia Nzambi kabidi.

²²Hashishe yeye nkayandi wakaya ku Lama, wakafika ku dina dinene dia mai didi mu Seku, wakakonka bantu ne, Samuele ne Davidi badi banyi? Muntu mukuabo wakamuambila ne, Badi mu Nayota hehi ne Lama.

²³Yeye wakaya ku Nayota hehi ne Lama; ne Nyuma wa Nzambi wakamutulukila kabidi, yeye wakenda wamba dî dia Nzambi tô ne hakafikeye ku Nayota hehi ne Lama.

²⁴Yeye wakavula bilulu biandi bionso, wakamba dî dia Nzambi ku mesu kua Samuele, wakalala hanshi butaka munya mujima ne butuku bujima. Nunku bakakonkangana ne, Shaula kabidi udi munkatshi mua baprofete, anyi?