Read tshiluba 1 Samuele 20 Bible Online

1 Samuele 20 - tshiluba bible

1 Samuele 20

¹Davidi wakanyema ku Nayota hehi ne Lama, wakaya kudi Yonatana, wakamukonka ne, Nakuenza tshinyi? Dihanga dianyi didi tshinyi? Nakuenza bualu bubi kai ku mesu kua tatu webe bua yeye udi ukeba muoyo wanyi?

²Yonatana wakamuambila ne, Bualu ehu kabuikadiku, wewe kuena ufua; tatu wanyi katu wenza bualu bunene anyi bukese diambedi yeye kayi muanze kungambila; tatu wanyi neansokoke bualu ebu bishi? Bualu ebu kabuena bulelela.

³Davidi wakaditshiha ne, Tatu webe udi mumanye ne, Meme nakasangana luse ku mesu kuebe ne yeye udi wamba ne, Yonatana kimanyi bualu ebu, anyi yeye neanyingalashe mutshima wandi; kadi bu mudi Yehowa ne muoyo ne bu mudi mutshima webe ne muoyo anu katuha kihi kadi kashala hankatshi hanyi ne lufu.

⁴Yonatana wakambila Davidi ne, Tshionso tshidi mutshima webe musue, nenkuenzele tshi.

⁵Davidi wakambila Yonatana ne, Mona, makelela ngondo udi ubala, ne bundi nʼabu mbua kudia bidia ku mesa a mukelenge; kadi witabushe bua meme kuya kubulama mu budimi tô ne hahita matuku asatu.

⁶Biangebesha tatu webe, hashishe wewe umuambile ne, Davidi wakunsengelela bua kuyeye ku Beteleheme, musoko wandi, bualu bua tshidimu etshi ntshidimu tshia kushihela Nzambi nyama kudi bonso ba mu diku diandi.

⁷Biambeye ne, Mbimpe, hashishe muntu webe neikale talalâ, kadi biakuateye tshiji, Umanye biebe ne yeye wakahangidisha bua kungenzela bibi.

⁸Nunku ufuile muntu webe luse, bualu bua wewe wakamana kuhunga nʼanyi tshihungidi mu dina dia Yehowa; bikala bualu bubi munda muanyi, unshihe nkayebe; udi musue kulua nʼanyi ku mesu kua tatu webe bishi?

⁹Yonatana wakamuambila ne, Bualu ebu kabuikadi kûdi. Binamanya ne tatu wanyi ndi musue kukuenzela bualu bubi, tshiena nkumanyisha, anyi?

¹⁰Davidi wakakonka Yonatana ne, Biakuambila tatu webe mei makole, wakambila nganyi?

¹¹Yonatana wakambila Davidi ne. Lua, tuye bietu mu budimi. Bubidi buabo bakaya mu budimi.

¹²Yonatana wakambila Davidi ne, Yehowa, Nzambi wa Isalele, ikale bu mumanyi wa bualu: banabuela tatu wanyi munda bua bualu ebu ha diba edi nansha makelela nansha dia ha nyima; mona, biambeye bualu buimpe bua Davidi, tshiena nkutumina dî bua kukumanyisha bualu ebu, anyi?

¹³Yehowa atambe kuenzela Yonatana bibi biamba tatu wanyi kukuenzela wewe bibi ne meme tshiyi nkuambila, tshiyi nkutuma ha bula bua wewe uye ne ditalala; Yehowa ikale nʼebe bu muakadiye ne tatu wanyi.

¹⁴Wewe kabidi, kuhanga kundesha kalolo ka Yehowa hantshidi ne muoyo, bua meme tshihi nansha;

¹⁵ne wewe kumushi luse luebe ku nsubu wanyi tshiendelele nansha habutula Yehowa bena lukuna bonso ba Davidi ha buloba.

¹⁶Nunku Yonatana wakahunga tshihungidi ne ba mu nsubu wa Davidi, Wamba ne, Yehowa neatshimone ku bianza bia bena lukuna ba Davidi.

¹⁷Yonatana wakatshihisha Davidi tshiakabidi bualu bua dinanga diakadiye nʼadi kudiye; bualu bua yeye wakamunanga bu muakanangeye mutshima wandi mene.

¹⁸Yonatana wakamuambila ne, Ngondo udi ubala makelela, nebamanye ne wewe kuenaku bualu bua nkuasa webe neikale hatuhu.

¹⁹Hawalalaku matuku asatu, hashishe uye biebe lubilu ku muaba kuwakasokoma didiku dikuabo, ushaleku hehi ne dibue dia Ezele.

²⁰Nengele mikete isatu ku mpenge kuadi bu mundi ngela muludikile tshintu.

²¹Nunku nentume nsongalume, nemmuambile ne, Ya biebe, ukebe mikete. Bingambila nsongalume ne, Tangila, mikete idi luseke lûdi, uyangate, ulue nʼai; bu mudi Yehowa ne muoyo ditalala didi kûdi, kakuena bualu bubi.

²²Kadi bingambila nsongalume ne, Mona, mikete idi ku mpala kuebe, hashishe ya mu nshila webe, bualu bua Yehowa wakakumina kule.

²³Bua bualu ebu bunakukuambila, Mona, Yehowa udi hankatshi hetu nʼebe tshiendelele.

²⁴Nunku Davidi wakasokoma mu budimi; bakabala ngondo mukelenge wakashikama bua kudieye bia kudia.

²⁵Mukelenge wakashikama mu nkuasa wandi hehi ne tshimanu tshia nsubu bu muakenzeye matuku makuabo; Yonatana wakimana ha muaba wandi, ne Abinê wakashikama ku luseke lua Shaula; kadi nkuasa wa Davidi wakadi mushale hatuhu.

²⁶Shaula kakamba bualu dituku edi, wakelangana meji munda ne, Bualu buakukuata Davidi, yeye kena muakane bua kudieye; bulelela, kena muakane.

²⁷Hakatshiabu, hakahita dituku diakabala ngondo, nkuasa wa Davidi wakadi mushale anu hatuhu; Shaula wakambila Yonatana, muanʼandi, ne, Muana wa Yishai kakuena nʼetu lelu ne makelela bua tshinyi?

²⁸Yonatana wakakudimuna Shaula ne, Davidi wakunsengelela bikole bua kuyeye ku Beteleheme;

²⁹yeye wakungambila ne, Witabushe bua meme kuya, bualu bua badi mu tshiota tshietu badi bashihela Yehowa nyama mu musoko; muanʼetu wakumbikilaku: binasangana luse ku mesu kuebe, witabushe bua meme kuya kutangila bana betu. Nunku yeye kena mulue ku mesa a mukelenge.

³⁰Hashishe tshiji tshia Shaula tshiakatema kudi Yonatana, wakamuambila ne, Wewe udi muana wa mukashi mubi, muena mampaka, meme tshiena mumanye ne, Wewe wakasungula muana wa Yishai bua kufuisheye wewe ne mamuʼebe wakakula bundu, anyi?

³¹Bualu bua batshidi muana wa Yishai ne muoyo ha buloba, wewe ne bukelenge buebe kabiena bijadikibue. Nunku utume bantu, balue nʼandi kundi, bualu bua yeye neafue biandi bulelela.

³²Yonatana wakebesha tatuʼandi Shaula ne, Neumushihe bualu kai? Yeye Wakenza tshinyi?

³³Shaula wakamuela difuma bua kumushiheye; nunku Yonatana wakamanya ne tatu wandi wakamana kusungula bua kushiheye Davidi.

³⁴Nunku Yonatana wakabika ku mesa ne tshiji tshikole, yeye kakadia bia kudia dituku dibidi dia ngondo au; mutshima wandi wakatamba kunyingalala bua Davidi bualu bua tatu wandi wakamuenzela bibi.

³⁵Hakatshiabu Yonatana wakaya ne nsongalume mu budimi ha muaba wakambileye Davidi.

³⁶Yeye wakambila nsongalume ne, Ya biebe lubilu, ukebe mikete indi ngela. Hakadi nsongalume uya, yeye wakela mukete ku mpala kuandi.

³⁷Hakafika nsongalume ku muaba wakadi mukete wakela Yonatana, wakela nsongalume dî ne, Mukete kawena ku mpala kuebe, anyi?

³⁸Yonatana wakela nsongalume dî ne, Endesha, ya biebe lubilu, kujanguluki. Nsongalume wa Yonatana wakambila mikete, wakahingana kudi mukelenge wandi.

³⁹Kadi nsongalume kakadi mumanye bualu, anu Yonatana ne Davidi bakadi bamanye bualu.

⁴⁰Yonatana wakahesha nsongalume bintu biandi, wakamuambila ne, Uye nʼabi ku musoko.

⁴¹Hakaya nsongalume, Davidi wakajuka ku muaba wandi wa ku luseke lua Sude, wakakuma mpala wandi hanshi, wakakukuila Yonatana misangu isatu, bakasangana mishiku, bakadilangana tô ne hakahita Davidi.

⁴²Yonatana wakambila Davidi ne, Waya biebe talalâ bualu bua tuetu tuakahungakasha mei ne, Yehowa neikale hankatshi hetu nʼebe ne hankatshi ha bana bebe ne bana banyi tshiendelele. Yeye wakabika, wakaya; Yonatana wakahingana ku musoko.