Read tshiluba 1 Samuele 6 Bible Online

1 Samuele 6 - tshiluba bible

1 Samuele 6

¹Mushete wa Yehowa wakadi mu buloba bua Bena Peleshete ngondo muanda mutekete.

²Bena Peleshete bakabikila babuki ne batempi ba mbuku, bakabakonka ne, Netuenze tshinyi ne mushete wa Yehowa? Nutumanyishe mua kûtuma ku muaha wau.

³Bakamba ne, Binuatuma mushete wa Nzambi wa Isalele, kanûtumi hatuhu, kadi numutekelehu mulambu wa kubuikila nʼau mibi; nenuondahibue, nenumanye bu mudi tshianza tshiandi katshiyi tshiumuke kunudi.

⁴Bakabakonka ne, Netumutekelehu mulambu kai? Bakabakudimuna ne, Bifuanyikishi bia or bitanu bia masungu ne bifuanyikishi bia or bitanu bia mpuku bu bungi bua hakelenge ba Bena Peleshete, bualu bua dikenga diodimue diakanukuata ne bakelenge benu.

⁵Nunku nudifuanyikishile bifuanyikishi bia masungu enu ne bifuanyikishi bia mpuku yenu idi misusule buloba buenu: nenuambike Nzambi wa Isalele butumbi bitabusheye bua kuhehesha tshianza tshiandi kunudi ne kudi nzambi yenu ne ku buloba buenu.

⁶Nudi nukoleshe mitshima yenu bu muakakolesha Bena Ejipitu ne Palô mitshima yabo bualu kai? Hakenzeye malu a kukema munkatshi muabo kabakalekela bantu ne baye, anyi?

⁷Nunku nuangate dikalu dihia-dihia, nudilongolole bimpe, nuangate ngombe ibidi idi ne mabele, idi kayiyi mianze kumanya mutshi wa tshikokedi; nusuike ngombe ku dikalu, nuhingishe bana bai mu nsubu wai;

⁸nuangate mushete wa Yehowa, nuteke ha dikalu, nuteke bintu bia or binudi numuhingishila bu mulambu mu mushete mukuabo, nûsuike ku mpenge; nutume mushete, uye.

⁹Tangilai, ne biayau malulame mu nshila wa ku mukalu wau wa ku Bete-shemeshe, nemmanye ne Nzambi wakatuenzela bualu ebu bubi; kadi biayau mu nshila mukuabo, nemmanye ne tshianza tshiandi katshiakatushiha, kadi bualu buakatukuata ku mpukahuka.

¹⁰Bakenza nunku: bakangata ngombe ibidi yakadi ne mabele, bakayisuika ku dikalu, bakinshidila bana bai mu nsubu wai;

¹¹bakateka mushete wa Yehowa ha dikalu, ne mushete mukuabo wakadi ne bifuanyikishi bia or bia mpuku ne bia masungu.

¹²Ngombe yakaya mu nshila mululame wa ku Bete-shemeshe: yakaya anu mu nshila munene, yenda idila muadi, kayakasesuka ku tshianza tshia balume anyi ku tshianza tshia bakashi; bakelenge ba Bena Peleshete bakayilonda tô ne ku mukalu wa Bete-shemeshe.

¹³Bena Bete-shemeshe bakadi banowa blé yabo mu tshibanda, bakabanduluka, bakamona mushete wa Nzambi, bakasanka bua kûmona.

¹⁴Dikalu diakalua mu budimi bua Yoshua, Muena Bete-shemeshe, diakimana ku dibue dinene; bobo bakahanda mabaya a dikalu, bakafila ngombe kudi Yehowa bu mulambu wa kuosha ha kahia.

¹⁵Bena Lewi bakangata mushete wa Yehowa ne mushete mukuabo wakadi hehi nʼau wakadi ne bintu bia or, bakayiteka ha mutu ha dibue dinene; Bena Bete-shemeshe bakafila milambu ya kuosha ha kahia ne milambu mikuabo kudi Yehowa dituku adi.

¹⁶Hakatangila bakelenge batanu ba Bena Peleshete bualu ebu, bakahingana ku Ekelona dituku adi.

¹⁷Ebi mbifuanyikishi bia or bia masungu biakahingishila Bena Peleshete Yehowa bu milambu ya kubuikidila nʼai mibi; ku Ashedodo tshimue, ku Gaza tshimue, ku Ashekelona tshimue, ku Gata tshimue, ku Ekelona tshimue;

¹⁸ne bifuanyikishi bia or bia mpuku bu bungi bua misoko yonso ya Bena Peleshete yakadi ku nyima kua bakelenge aba batanu, ne misoko yakadi ne ngumbu ne yakadi hatuhu tô ne ku dibue adi dinene diakatekabo mushete wa Yehowa, didi mu budimi bua Yoshua, Muena Bete-shemeshe, tô ne lelu.

¹⁹Nzambi wakabutula Bena Bete-shemeshe bualu bua bobo bakatangila munda mua mushete wa Yehowa, wakashiha bantu binunu makumi atanu ne makumi muanda mutekete: bena musoko bakadila muadi bualu bua Yehowa wakashiha bantu ba bungi ne kushiha kukole.

²⁰Bena Bete-shemeshe bakakonkangana ne, Nganyi udi mumanye mua kuimana ku mesu kua Yehowa, Nzambi wa tshijila? Humukeye kutudi, neaye kudi banganyi?

²¹Bakatuma miloho kudi Bena Kîyata-yalima bambila ne, Bena Peleshete bakahingisha mushete wa Yehowa; luai bienu, nuye nʼau kuenu.