Read tshiluba 1 Samuele 8 Bible Online

1 Samuele 8 - tshiluba bible

1 Samuele 8

¹Hakalua Samuele muntu mununu, yeye wakasungula Bena Isalele bana bandi ba balume bu balumbuluishi babo.

²Dina dia muanʼa bute wandi diakadi Yoele, ne dina dia muakunyi wandi diakadi Abiya: bakadi balumbuluishi mu Bê-sheba.

³Bana bandi ba balume kabakamulonda mu makasa andi, kadi bakasesuka bualu bua lukuka lua biuma, ne bakangata bintu bia mbueshilu, bakandamusha kulumbulula kuakane.

⁴Hashishe, bakulu bonso ba Bena Isalele bakadisangisha hamue, bakalua kudi Samuele ku Lama;

⁵bakamuambila ne, Tangila, wewe udi muntu mununu, ne bana bebe ba balume kabalu benda mu makasa ebe, nunku utusungile mukelenge wa kuikaleye utulumbulula bu mudi ba bisamba bionso benza.

⁶Bualu ebu kabuakasankisha mutshima wa Samuele hakambabo ne, Utusungile mukelenge wa kuikaleye utulumbuluila. Samuele wakatendelela Yehowa.

⁷Yehowa wakambila Samuele ne, Unvile mei a bantu mu malu onso adibo bakuambila; bualu bua bobo kabakakuhidia wewe, bakampidia meme bua meme tshikadi mukokeshi wabo.

⁸Bu mudi malu onso akenzabo ku dituku diakumuka nʼabo mu Ejipitu tô ne ku dituku edi, muakandekelabo bua kukuatshilabo nzambi mikuabo mudimu, nunku badi bakenzela wewe kabidi.

⁹Nunku unvuile mei abo; kadi ubadimushe bikole ne ubaleshe mushindu wa mukelenge wabakokesha.

¹⁰Samuele wakambila bantu bakamukonka bua mukelenge mei onso a Yehowa.

¹¹Wakamba ne, Eu newikale mushindu wa mukelenge udi unukokesha: neangate bana benu ba balume, neabateke bu bena makalu andi ne badi benda ha nyima ha nyama yandi ya tubalu; bobo nebalumbile lubilu ku mpala kua dikalu diandi;

¹²yeye neabasunguile tupitene tua bantu tshinunu bantu tshinunu, ne tua bantu makumi atanu makumi atanu; neabueshe bakuabo mu mudimu wa kuihila madimi andi ne wa kunowa bintu biandi, ne wa kumuenzela bintu bia nvita ne bintu bia makalu andi.

¹³Yeye neangate bana benu ba bakashi bua kumusumbilabo manananshi ne bua kumulambilabo bia kudia.

¹⁴Yeye neanunyenge madimi enu ne madimi a nvinyo ne madimi enu a olive, madimi mene adi matambe buimpe, neâfile kudi bahika bandi.

¹⁵Neanunyenge tshia dikumi tshia maminu enu ne tshia tumuma tuenu tua nvinyo, neatshidie kudi tuhita tuandi ne kudi bahika bandi.

¹⁶Yeye neanunyenge bena mudimu benu balume ne bena mudimu benu bakashi ne bansongalume benu badi batamba bulengele ne tubalu tuenu, neabibueshe mu mudimu wandi.

¹⁷Yeye neanunyenge tshia dikumi tshia bimuna bienu; nuenu nenuikale bahika bandi.

¹⁸Mu dituku adi nenudie bua mukelenge unuakadisunguila, kadi Yehowa kena ununvuila mu dituku adi nansha.

¹⁹Kadi bantu bakahidia kunvua dî dia Samuele, bakamba ne, Nansha, tuikale ne mukelenge ku mutu kuetu,

²⁰bua tuetu tuikale bu bisamba bikuabo, ne bua mukelenge wetu ahumbulule, aye ku mpala kuetu, atuluile nvita yetu.

²¹Samuele wakunyua mei onso a bantu, wakâmba mu matshu a Yehowa kabidi.

²²Yehowa wakambila Samuele ne, Unvue mei abo, ubasunguile mukelenge. Samuele wakambila Bena Isalele ne, Yai bienu, muntu ne muntu ku musoko wandi.