Read Tshiluba Tshibangidilu 1 Bible Online

Tshibangidilu 1 - Tshiluba bible

Tshibangidilu 1

¹Dituku dia kumpala Mvidi Mukulu kufuka diulu ne buloba.[1]

²Pa buloba pavua tshianana kapayi tshintu, anu midima miaba yonsu. Mueyelu wa Mvidi Mukulu[2] ke uvua unyunguluka pa mayi.

³Mvidi Mukulu kuamba ne: “Butoke buenzeke!” Butoke kuenzekabu.[3]

⁴Mvidi Mukulu kumona ne butoke budi buimpe, kupandukaye butoke ne midima.

⁵Kuinyikaye butoke ne: “Mmunya,” midima ne: “Mbutuku.”

⁶Dituku dibidi Mvidi Mukulu kuamba ne: “Tshibuashibuashi tshienzeke munkatshi mua mayi, bua kupandulula mayi adi muinshi ne adi mulu!”

⁷Mvidi Mukulu kufuka tshibuashibuashi bua kupandulula mayi adi muinshi ne adi mulu. Kuenzekabi nanku.

⁸Kuinyikaye tshibuashibuashi ne: “Ndiulu”.

⁹Dituku disatu Mvidi Mukulu kuamba ne: “Mayi onsu adi muinshi mua tshibuashibuashi adisange muaba umue, buloba bume bumueneke.” Kuenzekabi nanku.

¹⁰Mvidi Mukulu kuinyika muaba mume ne: “Mbuloba,” mayi avua madisange ne: “Mmayi manene.” Mvidi Mukulu kumona ne bionsu bidi bimpe.

¹¹Mvidi Mukulu kuamba ne: “Bikunyibua bitoloke pa buloba, bisosa bidi biela nzeba ne mitshi idi ikuama bimuma bia mishindu yonsu.”

¹²Pa buloba kutoloka bisosa bidi biela nzeba ne mitshi idi ikuama bimuma bia mishindu yonsu. Kuenzekabi nanku. Mvidi Mukulu kumona ne bionsu bidi bimpe.

¹⁴Dituku dinayi Mvidi Mukulu kuamba ne: “Mulu muikale bimunyi bua kuleja dishilangana dia munya ne butuku. Bimunyi abi bikale bimanyinu bia matuku, bidimu ne bikondu bia bibilu,

¹⁵bikale kabidi bitokesha pa buloba bujima.” Kuenzabi nanku.

¹⁶Mvidi Mukulu kufuka bimunyi binene bibidi: diba bua kutokesha mu munya, ngondu bua kukenkesha butuku. Kufukaye mitotu kabidi.[4]

¹⁷Mvidi Mukulu kubiteka mu tshibuashibuashi bua bitokeshe pa buloba,

¹⁸diba ditokesha mu munya, ngondu ukenkesha butuku.

¹⁹Kumonaye ne: bionsu bidi bimpe.

²⁰Dituku ditanu Mvidi Mukulu kuamba ne: “Mu mayi muikale minyinyi mishilangane, kabidi nyunyi ibuke mulu mu tshibuashibuashi!”

²¹Mvidi Mukulu kufuka minyinyi minene ne mikese idi yenda mu mayi ya mishindu ne mishindu, ne nyunyi yonsu idi ibuka mulu ya mishindu mishilangane. Kumonaye ne bionsu bidi bimpe.

²²Mvidi Mukulu kubiela lupemba, wamba ne:

²³“Nuluangane, nuwuje mayi manene, nyunyi ivulangane pa buloba bujima.”

²⁴Dituku disambombu Mvidi Mukulu kuamba ne: “Pa buloba pikale nyama ya mishindu yonsu: bilandadi, nyama ya ditu ne bimuna.” Kuenzekabi nanku.

²⁵Mvidi Mukulu kufuka nyama ya pa buloba ya mishindu yonsu, bimuna ne bilandadi bia mishindu mishilangane. Kumonaye ne bionsu bidi bimpe.

²⁶Mvidi Mukulu kuamba ne: “Tufuke muntu mufuanangane netu, bua ikale mfumu wa minyinyi ya mu mayi, nyunyi ya mulu, bimuna, bilandadi ne bintu bionsu bidi pa buloba.”

²⁷Mvidi Mukulu kufuka bantu, bafuane Mvidi Mukulu mene. Kubafukaye mulume ne mukaji.[5]

²⁸Kubelaye lupemba, wamba ne: “Tantayi, nulelangane, nuvulangane buloba bujima. Nubukokeshe, nuikale bamfumu ba minyinyi ya mu mayi, nyunyi ya mulu, bimuna, bilandadi ne bionsu bidi pa buloba.”

²⁹Mvidi Mukulu kubambila ne: “Mbanupeshi midioku yonsu ya pa buloba idi ne ntete, ne mitshi yonsu idi ikuama bimuma, bikale biakudia bienu.

³⁰Kadi nyama yonsu, nyunyi ya mulu ne bilandadi, mbayipeshi bidimenena, bikale biakudia biayi.” Kuenzekabi nanku.

³¹Mvidi Mukulu kukenketa bintu bionsu bivuaye mufuke, kumonaye ne: bidi bimpe bitambe.