Read Tshiluba Tshibangidilu 13 Bible Online

Tshibangidilu 13 - Tshiluba bible

Tshibangidilu 13

¹Abrame kumuka mu Ejipitu, kupingana kabidi mu ditunga dia Kenaane mu tshitupa tshia kuinshi. Uvua ne mukajende Sarayi ne Lote muana wa muanabu ne bintu biende bionsu.

²Abrame uvua mubanji. Uvua ne mikoku, mbuji, ngombe, biamu bia mpawungi, ne biamu bitoke bia mushinga mukole kabidi.

³Abrame kumuka mu tshitupa tshia kuinshi mu ditunga dia Kenaane, wenda wikisha too ne ku Betele, too ne ku muaba uvuaye mumane kuikisha matuku makese kale, pankatshi pa Betele ne Ayi,

⁴muaba uvuaye muase tshilambuilu. Kutendelelaye Mvidi Mukulu, utela dina dia Maweja-Nangila.

⁵Lote uvuabu nende, uvua pende ne mikoku, mbuji ne ngombe. Uvua kabidi ne bena diku diende ne bena mudimu bende.

⁶Bua bungi bua bimuna bivuabu nabi, mpata awu kavua mukumbane bua Abrame ne Lote kusomba kaba kamue to.

⁷Ke matandu kujuka pankatshi pa balami ba bimuna bia Abrame ne balami ba bia Lote. (Tshikondu atshi, bena Kenaane ne bena Perizi batshivua mu ditunga adi.)

⁸Abrame kuambila Lote ne: — Katuena mua kutandangana nebe to. Bena mudimu bebe ne banyi kabena mua kutandangana to, bualu tudi bantu bamue.

⁹Buloba mbunene, tuabulukangane. Sungula luseke luudi musue. Paudi uya ku mutu kua ditunga, meme nenye kuinshi kuadi. Paudi uya kuinshi kua ditunga, meme nenye ku mutu kuadi.

¹⁰Lote ukenzakana, kumona muvua mpata ya Yardene mimpe mitambe, bualu ivua ne mayi. Maweja-Nangila kavua muanji kubutula Sodome ne Ngomore to. Nanku mpata ayi too ne ku Soware ivua bu lupangu lua Paradizu,[53] mifuanangane ne tshibanda tshia Nile.

¹¹Lote kusungula mpata ayi, kuya luseke ludi diba dipatukila. Kupandulukabu ne Abrame.

¹²Abrame kushala mu ditunga dia Kenaane. Lote kuya kuasa mitanda yende mu bimenga bia mu mpata wa Yardene, wendakana ne bimuna biende too ne ku Sodome.

¹³Kadi bena Sodome bavua bena buenzayi, babenga meyi a Maweja-Nangila.

¹⁴Lote mumane kushiyangana ne Abrame, Maweja-Nangila kuambila Abrame ne: — Kenzakana, tangila ku mutu kua ditunga ne kuinshi kuadi, kudi diba dipatukila ne kudidi dibuelela.

¹⁵Buloba ebu buonsu nenkupeshabu kashidi ne ndelanganyi yebe.[54]

¹⁶Nemvudije ndelanganyi yebe bungi budi muntu kayi mua kuyibala. Bu mudi muntu kayi mua kubala lusenga ludi pa buloba, ke mudibu kabayi mua kubala ndelanganyi yebe.

¹⁷Juka, endakana mu ditunga, uditangile mu bule ne mu butshiama buadi, bualu nenkupadi.

¹⁸Abrame kuasa mitanda yende muinshi mua mitshi ya tshijila ya Mambre pabuipi ne tshimenga tshia Ebrone. Muaba awu kuashilaye Maweja-Nangila tshilambuilu.