Read Tshiluba Tshibangidilu 14 Bible Online

Tshibangidilu 14 - Tshiluba bible

Tshibangidilu 14

¹Mu tshikondu atshi, bakalenga banayi, Amrafele, mukalenga wabena Babilone, Ariyoke, mukalenga wa bena Elazare, Kedorlayomere, mukalenga wa bena Elame, ne Tidale, mukalenga wa bena Ngoyime,

²kuluishabu bakalenga bakuabu batanu: ke Bera, mukalenga wa bena Sodome, Birsha, mukalenga wa bena Ngomore, Shinabe, mukalenga wa bena Adma, Shemebere, mukalenga wa bena Siboyime ne mukalenga wa bena Bela (badibu babikila ne bena Soware).

³Bakalenga batanu aba kudisangisha mu tshibandabanda tshia Sidime (mmumue ne muaba udi lelu Mayi manene a luepu). Kumvuanganabu bua kuluangana mvita.

⁴Bidimu dikumi ne bibidi, bavua anu ku bukokeshi bua Kedorlayomere too ne pakatombokabu mu tshidimu tshia dikumi ne tshisatu.

⁵Mu tshidimu tshia dikumi ne tshinayi, Kedorlayomere ne bakalenga bavuaye mudie nabu bulunda, kuluisha bena Refayime mu Ashetarote-Kamayime, bena Zuzime mu Ame, ne bena Emi mu mpata ya Kiriyatayime, kupitabu bakalenga bonsu abu bukole.

⁶Kuluishabu kabidi bena Ori bavua ku mukuna wa Seyire, kubipata too ne ku Ele-Parane pabuipi ne tshipela.

⁷Pashishe kupinganabu kabidi ne mvita mu Ene-Mishepate (mmumue ne Kadeshe). Kunyangabu ditunga dijima ne bintu bionsu bia bena Amaleke too ne bia bena Amore bavua basombe mu Ashashone-Tamare.

⁸Nanku, bakalenga ba bena Sodome ne ba bena Ngomore, ba bena Adma, ba bena Seboyime ne ba bena Bela (badibu babikila kabidi ne bena Soware), kudilongolola bua kuluangana mvita mu tshibandabanda tshia Sidime.

⁹Bavua baluisha Kedorlayomere, mukalenga wa bena Elame, Tidale, mukalenga wa bena Ngoyime, Amrafele, mukalenga wa bena Babilone, ne Ariyoke, mukalenga wa bena Elazare. Bakalenga aba bavua baluishangane banayi kua batanu.

¹⁰Mu tshibandabanda tshia Sidime, bavua bumbulemu bina bia bungi bia kabudimbu. Nanku bakalenga babidi, wa Sodome ne wa Ngomore, kudishinda mu bina abi pavuabu banyema mvita. Basatu bavua bashale kunyema batangila ku mukuna.

¹¹Bilobu binayi bivua bitshimuna, kupawulabi bintu bionsu bia bena Sodome ne bena Ngomore, too ne biakudia biabu, kunyemabu nabi.

¹²Bu muvua Lote, muana wa muanabu ne Abrame, musombe mu Sodome, kumukuatabu pende ne bintu biende bionsu.

¹³Muntu uvua munyeme mu mvita ayi, kuya kumanyisha Abrame, muena Ebrewu lumu alu. Abrame uvua muase pabuipi ne mitshi ya tshijila ya Mambre, muena Amore. Mambre ne bana babu Eshekole ne Anere bavua batue ndondu ne Abrame.

¹⁴Abrame umvua ne: mbakuate Lote, muana wa muanetu, kubikilaye biende bilobu nkama isatu dikumi ne muanda mukulu, bia mu diku diende. Kuipatshilabu bakalenga banayi abu too ne ku Dane.

¹⁵Bafika ku Dane, Abrame kuabanya bantu bende mu bisumbu. Kuluanganabu ne baluishi babu butuku, kubapita bukole. Kubipatabu too ne ku Oba, luseke lua ku mutu kua Damase.

¹⁶Abrame kunyenga bintu bionsu bivuabu banyema nabi. Kunyengaye kabidi ne Lote, muana wa muanabu ne bintu biende bionsu, pamue ne bakaji ne bena diende bonsu ba wabu bakuate.

¹⁷Mukalenga wa bena Sodome kuya mu tshibandabanda tshia Shawe (mmumue ne tshia Mukalenga), bua kuakidila Abrame pawaye upingana ku mvita, mumane kutshimuna Kedorlayomere ne bamfumu bonsu bavuaye nabu.

¹⁸Nanku Melkisedeke uvua mukalenga wa bena Saleme, muikale kabidi mutuangaji wa bantu ne Mvidi Mukulu muena kulu. Kutuadilaye Abrame mampa ne maluvu.[55]

¹⁹Kumuelaye lupemba, wamba ne: — Mvidi Mukulu muena kulu, mufuki wa diulu ne buloba atumbe. Akuele wewe Abrame lupemba.

²⁰Mvidi Mukulu muena kulu uvua mukuambuluishe bua wewe kutshimuna baluishi bebe atumbe! Abrame kulambula Melkisedeke tshia dikumi tshia bintu biende bionsu bivuaye munyenge mu mvita.

²¹Mukalenga wa bena Sodome kuambila Abrame ne: — Mpingajila meme bantu banyi, wewe ushale ne bintu.

²²Abrame kuandamuna ne: — Ndi nditshipa kumpala kua Maweja-Nangila Mvidi Mukulu muena kulu, mufuki wa diulu ne buloba ne:

²³Tshiena mua kulenga kantu ka ku bianza biebe, nansha buanda, nansha nshinga wa bisabata, bualu udi mua kuamba ne: “Meme ke udi munemeshe Abrame.”

²⁴Meme tshiena ngangata tshintu nansha tshimue pa kumusha biakudia bivua bantu banyi badie. Kabidi bantu bonsu batuvua nabu mu mvita bangambuluisha abu: Anere, Eshekole ne Mambre, bobu nkayabu nebadiangatshile tshiabu tshitupa tshia bintu.