Read Tshiluba Tshibangidilu 16 Bible Online

Tshibangidilu 16 - Tshiluba bible

Tshibangidilu 16

¹Sarayi, mukaji wa Abrame, kavua mulele muana to. Kadi uvua ne mupika wende, nsongakaji wa bena Ejipitu, dina diende Agare.

²Sarayi kuambila Abrame ne: — Udi mumone ne Maweja-Nangila kena mumpeshe bana. Nanku angata mupika wanyi ewu, ikale mukajebe.[63] Misangu mikuabu udi mua kundelela muana wa balume. Abrame kuitaba bivua Sarayi mumulombe.

³Abrame mumane kusomba mu ditunga dia Kenaane bidimu dikumi, Sarayi kumupesha Agare bua ikale mukajende.

⁴Abrame kumubuelela mu nzubu. Agare kuimita difu. Pavua Agare mujadike ne: ndi ne difu, kutekelaye Sarayi kapeja.

⁵Ke Sarayi kuambila Abrame ne: — Badi bampenda bipendu bionsu ebi bualu buebe. Meme kukupesha mupika wanyi bua ikale muena kuebe. Kadi katshia wimita difu, kena unnemeka kabidi to. Maweja-Nangila nkayende akose tshilumbu tshidi pankatshi petu nebe.

⁶Abrame kuandamuna Sarayi ne: — Angata mupika webe, wenze nende muudi musue. Sarayi kukengesha Agare bikole too ne padinyemenaye kuya mu tshipela.

⁷Agare ufika mu tshipela, pabuipi ne mpokolu wa mayi uvua mu njila wa ku Shure, kusambakenaye ne mutumibue wa Maweja-Nangila.

⁸Awu kumukonka ne: — Agare, mupika wa Sarayi, udi ufuma penyi? Uyaya kuepi? Agare kuandamuna ne: — Ndi nnyema Sarayi, mfumuanyi wa mudimu.

⁹Mutumibue wa Maweja-Nangila kumubela wamba ne: — Pingana anu kudi Sarayi, mfumuebe wa mudimu. Witabe bionsu bidiye ukuambila.

¹⁰Maweja-Nangila neavudije ndelanganyi yebe bungi budi muntu kayi mua kubala.

¹¹Mpindiewu udi ne difu. Neulele muana wa balume. Umuinyike Ismayele. Bualu Maweja-Nangila mmumane kumvua[64] muadi wa dikenga diebe.

¹²Muanebe awu neikale bu nyama wa mpunde wa muitu! Nealuishe muntu yonsu. Muntu yonsu kabidi neamuluishe. Kakusomba pamue ne bana babu to. Neasombe amu pa nkayende.

¹³Agare kudikonka ne: “Ndi mumone Udi mummone anyi?” Kuinyikaye Maweja-Nangila uvua umuakuisha dina ne: “Wewe udi Ele-Royi, mmumue ne: Mvidi Mukulu udi mummone.”

¹⁴Ke padibu babikila tshina tshia mayi tshidi pankatshi pa Kadeshe ne Berede ne: Lahayi-Royi, mmumue ne: tshina tshia Udi ne muoyi uvua mummone.

¹⁵Agare kulela muana wa balume. Abrame kumuinyika Ismayele.[65]

¹⁶Tshidimu tshivua Agare mulela muana, Abrame uvua ne bidimu makumi muanda mukulu ne bisambombu.