Read Tshiluba Tshibangidilu 17 Bible Online

Tshibangidilu 17 - Tshiluba bible

Tshibangidilu 17

¹Abrame mumane kukumbaja bidimu makumi tshitema ne tshitema, Maweja-Nangila kumumuenekela, umuambila ne: — Ndi Mvidi Mukulu wa bukole buonsu. Witabe diyi dianyi, wikale muntu muakane.

²Ndi ntua nebe ndondu. Nemvudije ndelanganyi yebe.

³Abrame kudiela mutu panshi. Mvidi Mukulu kumuambila ne:

⁴— Ndondu undi ntua nebe udi nunku: Newikale nkambua wa bisamba bia bungi.

⁵Dina diebe kadiakuikala kabidi Abrame to. Nedikale Abrahame, bualu nenkuvuije nkambua wa bisamba[66] bia bungi.

⁶Nemvudije ndelanganyi yebe. Ku ndelanganyi aku nekupatuke bisamba bia bungi, nekupatuke kabidi bakalenga banene.

⁷Ndi ntua ndondu ewu nebe kashidi, kabidi ne ndelanganyi yebe yonsu. Meme nennulame mu bikondu bionsu. Nengikale Mvidi Mukulu webe kabidi ne wa ndelanganyi yebe yonsu.[67]

⁸Ditunga edi dijima dia Kenaane diudi upitshila mpindiewu bu muenyi, nenkupeshadi kashidi. Nedishale bupianyi buebe ne bua ndelanganyi yebe. Meme nengikale Mvidi Mukulu wenu.[68]

⁹Mvidi Mukulu kuambila Abrahame kabidi ne: — Wewe ne ndelanganyi yebe yonsu nulame ndondu ewu.

¹⁰Ke mikenji yanyi inudi ne bua kulama: Bantu balume bonsu ba ku ndelanganyi yebe, nubateke panshi.[69]

¹¹Etshi ke tshimanyinu tshia kashidi tshia pambidi penu, tshidi tshijadika ndondu udi pankatshi panyi nenu.

¹²Bana benu ba balume bamane kukumbaja matuku muanda mukulu, badi ne bua kubateka panshi, nansha bapika badibu balelela muebe, nansha bapika benyi baudi musumbe, badi kabayi ba mu diku diebe.

¹³Nanku mupika udibu balelela ku nzubu kuebe, nansha udibu basumba, babateke bonsu panshi, bua ndondu wanyi amueneke kashidi mu mubidi wenu.

¹⁴Kadi muntu mulume udibu kabayi bateke panshi, nebamuipate munkatshi mua bantu banyi, bualu kena munemeka ndondu wanyi to.

¹⁵Mvidi Mukulu kuambila Abrahame ne: — Kubikidi kabidi mukajebe ne Sarayi to. Umubikile ne: Sara.[70]

¹⁶Ndi mmuela lupemba. Neakulelele muana wa balume. Neikale mamuende wa bisamba bia bungi. Bakalenga ba bisamba bishilangane nebapatukile ku ndelanganyi yende.

¹⁷Abrahame kudiela mutu panshi, useka wamba ne: “Muntu mukulumpe wa bidimu lukama, udi mua kulela muana bishi? Kabidi Sara udi ne bidimu makumi tshitema, neapete muana mushindu kaayi?”

¹⁸Abrahame kuambila Mvidi Mukulu ne: — Ismayele wanyi ewu udi anu mukumbane. Ashale ne muoyi. Umukumbajile biudi mulaye.

¹⁹Mvidi Mukulu kumuandamuna ne: — Nansha! Mukajebe Sara nealele muana wa balume. Neumuinyike ne Izake.[71] Meme nentue nende ndondu wa kashidi kabidi ne ndelanganyi yende yonsu.

²⁰Kadi ndi ngitaba biudi ulomba bua Ismayele. Ndi mmuela lupemba, neatante, avulangane, nealele bakalenga dikumi ne babidi, neikale nkambua wa tshisamba tshinene.

²¹Kadi nentue ndondu ne Izake, muana walelabu kudi mukajebe Sara tshidimu tshidi kumpala etshi.

²²Mvidi Mukulu ujikija kuakula ne Abrahame, kulayanganabu.

²³Anu dituku adi, Abrahame kuteka muanende Ismayele panshi, kabidi ne bana ba balume bonsu bavua mu diku diende, too ne bapika bavuabu balele mu nzubu muende, ne bonsu bavuaye musumbe, bu muvua Mvidi Mukulu mumuambile.

²⁴Abrahame mumane kukumbaja bidimu makumi tshitema ne tshitema, kumutekabu pende panshi.

²⁵Tshikondu atshi, Ismayele uvua ne bidimu dikumi ne bisatu.

²⁶Abrahame ne muanende wa balume Ismayele kubatekabu panshi dituku dimue.

²⁷Kutekabu bantu balume bonsu panshi, ne bapika bavuabu balelela mu nzubu muende, ne bavuaye musumbe ku matunga makuabu.