Read Tshiluba Tshibangidilu 18 Bible Online

Tshibangidilu 18 - Tshiluba bible

Tshibangidilu 18

¹Maweja-Nangila kumuenekela Abrahame ku mitshi ya tshijila ya ku Mambre. Abrahame uvua musombe mu mushiku wa mbelu wa kazubu kende ka ntenta diba dia munda munya.

²Abrahame ukenzakana, kumona bantu balume basatu[72] bimane pabuipi nende. Kujukaye lubilu bua kubakidila. Kuinyikaye mutu panshi.

³Abrahame kuambila umue wa kudibu ne: — Mukalenga wanyi, pangikala mukutokele ku muoyi, kupitshi kumbelu kuanyi to.

⁴Banupeshe mayi, nowe ku makasa, nuikishe kuinshi kua mutshi ewu.

⁵Nennutuadile kantu ka nuenu kudia. Nudie nupete bukole, numone mua kutungunuka ne luendu luenu. Bualu nudi bafike ku mbelu kua muntu wenu. Kuitababu ne: — Mbimpe, enza muwambi amu.

⁶Abrahame kuya lukasa ku ntenta kuvua Sara, umuambila ne: — Kolesha, angata bukula buimpe, usope mikata isatu.

⁷Kunyemenaye kabidi ku tshikumbi tshia ngombe, kusungulaye muana wa ngombe muimpe wa manyi. Kumufila kudi muena mudimu bua amulambe lukasa.

⁸Pashishe, kuangataye manteka, mabela ne munyinyi uvua-bu balamba awu, kubapesha. Pavuabu badia, Abrahame uvua muimane kulu pabuipi nabu, muinshi mua mutshi.

⁹Bantu kukonka Abrahame ne: — Mukajebe Sara udi penyi? Abrahame ne: — Udi mu ntenta muamua.

¹⁰Umue wa kudibu kulaya Abrahame ne: — Tshidimu tshialonda, ngondu wa momumue nempingane kuebe eku. Diba adi mukajebe Sara neikale mumane kulela muana wa balume.[73] Sara uvua musombe mu mushiku wa mbelu wa ntenta, panyima pa bayende. Uvua muteleje bivuabu bamba abi.

¹¹Abrahame ne Sara bakavua bakole bakulakaje, Sara mumane kupita diba dia buledi, katshiyi umona tshijila tshia bakaji.

¹²Sara kudisekela, wamba ne: “Bukole bunkadi ebu, tshiena kabidi ne milowu ya balume bua kulela muana to. Bayanyi[74] ukadi muntu mukulumpe.”

¹³Maweja-Nangila kukonka Abrahame ne: — Mukajebe Sara udi useka tshinyi? Bua tshinyi udi wamba ne: “Bukole bunkadi ebu tshiena mua kulela kabidi to!”

¹⁴Kakuena tshidi mua kukolela Maweja-Nangila to.[75] Tshidimu tshiavua, ngondu wa momumue, nempingane apa. Diba adi mukajebe Sara neikale mumane kulela muana wa balume.

¹⁵Sara kumvuaye buowa, kuyila wamba ne: — Tshiena museke to. Maweja-Nangila kumujadikila ne: — Bulelela uvua useka.[76]

¹⁶Bantu abu kujuka batangile ku Sodome. Abrahame kuya kubashindikija.

¹⁷Maweja-Nangila kuamba mundamunda muende ne: — Tshiena mua kusokoka Abrahame bualu bundi nya kuenza to,

¹⁸bualu ndelanganyi yende neikale tshisamba tshinene ne tshia bukole. Nengele bisamba bionsu bia pa buloba lupemba mu dina diende.[77]

¹⁹Ndi mumusungule bua alongeshe bana bende ne ndelanganyi yende mikenji yanyi, bua babikumbaje bikale bantu bakane. Bobu bakumbaje bionsu ebi, meme Maweja-Nangila nengenzele Abrahame bionsu bindi mumulaye.

²⁰Pashishe Maweja-Nangila kuambila Abrahame ne: — Bantu mbafunde bena Sodome ne Ngomore kundi, bualu buenzayi buabu mbupite.

²¹Ndi musue kuya kudimuena bua kujadika ne batshidi batungunuka ne buenzavi buabu bu mundi mumvue emu.

²²Benyi babidi kutungunuka ne luendu kuya ku Sodome. Kadi Maweja-Nangila kushala muaba uvua Abrahame.[78]

²³Abrahame kusemena kudiye, umukonka ne: — Maweja-Nangila, neubutule muntu muakane pamue ne muena tshibawu anyi?

²⁴Wewe musangane bantu bakane makumi atanu mu musoku awu, udi mua kufuilaku musoku mujima luse, bua kupandisha bantu aba makumi atanu, anyi udi ubutula musoku mujima?

²⁵Wewe kuena mua kuenza nanku, kuena mua kushipa muntu muakane pamue ne muena tshibawu. Abu bualu buyile kule. Bonsu babidi nebamueneke anu bu bena tshibawu. Wewe mukoshi wa nsambu munene wa buloba bujima, kuena mua kukosa nsambu bibi to.

²⁶Maweja-Nangila kuandamuna ne: — Meme musangane bantu bakane makumi atanu mu Sodome, nemfuile musoku mujima luse bualu buabu.

²⁷Abrahame kuamba kabidi ne: — Ndi nkolesha muoyi bua kuakula ne Maweja-Nangila wanyi, nansha bu mundi muikale muntu tshianana, tshintu tshia lupitapita.

²⁸Kadi bu wewe mua kupeta bantu bakane anu makumi anayi ne batanu, batanu bakuabu kabayiku, neubutule tshimenga tshijima bua batanu abu anyi? Mvidi Mukulu kuandamuna ne: — Meme musangane bantu bakane makumi anayi ne batanu, tshiakubutula tshimenga to.

²⁹Abrahame kumukonka kabidi ne: — Misangu mikuabu udi mua kusangana bantu bakane anu makumi anayi, newenze tshinyi? Maweja-Nangila kuandamuna ne: — Meme musangane bantu bakane makumi anayi, nemfuile bantu luse bualu buabu.

³⁰Abrahame kuamba kabidi ne: — Maweja-Nangila kabikutondi, ntshidi anu ntungunuka. Misangu mikuabu neusangane bantu bakane anu makumi asatu, newenze tshinyi? Maweja-Nangila ne: — Meme musangane bantu bakane makumi asatu, tshiakubutula tshimenga.

³¹Abrahame kumukonka ne: — Maweja-Nangila, umfuile luse bua pandi ngakula nebe. Wewe musangane bantu bakane anu makumi abidi, newenze tshinyi? Maweja-Nangila ne: — Meme musangane bantu bakane makumi abidi, tshiakubutula tshimenga.

³²Abrahame ne: — Ndi ngakula musangu wa ndekelu, kufiki munda. Kadi wewe musangane bantu bakane anu dikumi? Maweja-Nangila kuandamuna ne: — Meme musangane bantu bakane anu dikumi, tshiakubutula tshimenga to.

³³Bajikija kuakula, Maweja-Nangila kumuka, Abrahame kupingana kuende.