Read Tshiluba Tshibangidilu 20 Bible Online

Tshibangidilu 20 - Tshiluba bible

Tshibangidilu 20

¹Abrahame umbuka ku Mambre, kuyaye kuasa kuinshi, mu ditunga dia Kenaane, pankatshi pa Kadeshe ne Shure. Umuke aku, kuyaye kusomba mu Ngerare.

²Kadi bu muvua Abrahame muambile bantu ne: Sara mmuanetu wa bakaji[87] Abimeleke, mukalenga wa bena Ngerare, kuangata Sara bua ikale mukajende.

³Butuku abu, Mvidi Mukulu kumuenekela Abimeleke mu tshilota, kumutandisha ne: — Wewe udi mudikebele lufu bua mukaji wa bende uudi munyenge ku bukole.

⁴Kadi, bu muvua Abimeleke kayi muanji kumubuelela mu nzubu, kuambaye ne: — Akia! Maweja-Nangila, tshisamba tshianyi ne meme katuena ne bualu to. Udi mua kutubutula anu patupu nanku anyi?

⁵Abrahame wangambidi ne: “Sara mmuanetu wa bakaji.” Kabidi Sara wanjadikidi ne: “Abrahame ntutu”. Ke pamvua musue kuenza bualu ebu, kondu kanyi ka munda kakayi kantuuta, nansha kampisha mene.

⁶Mvidi Mukulu kuambila kabidi Abimeleke mu tshilota atshi ne: — Ndi mumanye ne: udi muenze nanku kuyi mumanye bualu. Ke pandi mukukandike ne kulengi ewu mukaji, nansha ne tshianza mene; tshianana, udi untombokela.

⁷Pingaja mukaji ewu kudi bayende. Umanye ne: bayende mmuambi. Neakuakuile bua kufu to. Kadi wewe mubenge kupingaja mukaji, neufue, kabidi bantu bonsu baudi nabu nebafue.

⁸Abimeleke kubika patshiatshia, kubikila balombodi ba mu bukalenga buende. Kubamanyishaye bionsu bivua bimuenzekele abi. Balombodi kuzakala bikole.

⁹Abimeleke kubikidisha Abrahame, umukonka ne: — Tshiwatuenzedi nenku ntshinyi? Mbualu bubi kaayi bundi mukuenzele bua wewe kutubueja ne bena ditunga dianyi mu tshilumbu bunene nunku! Udi mutuenzele bualu budi muntu kayi mua kuenzela mukuabu to.

¹⁰Uvua muele meji kaayi pa kungenzela nunku?

¹¹Abrahame kuandamuna ne: — Mvua muele meji ne: bantu ba kuneku kabena batshina Mvidi Mukulu. Nanku nebanshipe bua kuangata mukajanyi.

¹²Bulelela, Sara mmuanetu wa bakaji. Mmuanetu wa tatu. Kena wa mamu to. Ke pamvua mumusele nanku.

¹³Mvidi Mukulu mmumane kungumusha mu nzubu mua baledi banyi, meme kuambila mukajanyi Sara ne: “Miaba yonsu itudi tupitshila nebe, ambila bantu ne: Abrahame udi muanetu wa balume, bua kabanshipi bualu buebe.”

¹⁴Abimeleke kupingajila Abrahame mukajende. Kumutentekelapu ne bapika balume ne bakaji, mikoku, mbuji ne ngombe.

¹⁵Abimeleke kuambila Abrahame ne: — Ditunga dianyi ndikulekele, wase muaba uudi musue.

¹⁶Pashishe Abimeleke kuambila Sara ne: — Nempeshe tutuebe nkanu ya tshiamu tshitoke tshia mushinga mukole tshinunu, bua bantu bonsu baudi nabu bajadike ne: wewe kuena muenze tshilema to.[88] Nanku nebakunemeke.

¹⁷Kadi Abrahame kulomba kudi Mvidi Mukulu bua apandishe Abimeleke, apandishe kabidi mukajende ne bakaji bende bapika, bua bamone mua kulela bana tshiakabidi.

¹⁸Bualu Mvidi Mukulu uvua mukandike lulelu lua mukaji wa Abimeleke ne lua bakaji bakuabu ba mu diku dia Abimeleke, bualu bua tshilumbu tshia Sara, mukaji wa Abrahame.