Read Tshiluba Tshibangidilu 24 Bible Online

Tshibangidilu 24 - Tshiluba bible

Tshibangidilu 24

¹Abrahame kukola kukulakaja. Maweja-Nangila uvua anu mumuele lupemba mu malu onsu.

²Dituku dikuabu Abrahame kuambila muena mudimu mukulumpe wa ku bena mudimu bende ne: — Kuata muinshi mua tshibelu[101] tshianyi,

³uditshipe mu dina dia Maweja-Nangila, Mvidi Mukulu wa diulu ne buloba, bualu kuena mua kukebela muananyi Izake mukaji wa mu ditunga dia Kenaane mundi muase emu to.

⁴Kadi uditshipe kundi, uye kukebela muananyi Izake mukaji anu kuetu kundela mu ditunga dietu, mu diku dietu.

⁵Muena mudimu awu kukonka Abrahame ne: — Kadi pikala mukaji awu mubenge bua kumuka mu ditunga diabu bua kusomba kuneku, ndi mua kuya ne muanebe Izake bua aye kusomba kuenu, muaba udi mukaji awu anyi?

⁶Abrahame kuandamuna ne: — Wamanya, kuena mua kuya ne muananyi kuetu to.

⁷Bualu pavua Maweja-Nangila, Mvidi Mukulu wa diulu, mumpatule mu ditunga dietu ne mu diku dia baledi banyi, uvua mundaye bua kupesha ndelanganyi yanyi ditunga edi. Nanku, anu yeye neatume mutumibue wende kumpala kuebe, bua akuleje nsongakaji uudi mua kuselela muananyi Izake.

⁸Pikala nsongakaji awu ubenga mua kumuka mu ditunga diabu, diditshipa diebe kadiena dikuenzela bualu to. Kadi, nansha bia munyi, kuena mua kuya ne muananyi kuaka to.

⁹Muena mudimu kukuata muinshi mua tshibelu tshia mfumuende Abrahame, uditshipa bua kukumbaja bionsu bivua mfumuende mumutume bua kuenza.

¹⁰Muena mudimu awu kuangata tumelu dikumi tua mfumuende ne bionsu bivuaye mumone ne mbilenga. Bavua benda batangile mu tshimenga muvua Nahore musombe mu tshitupa tshia ku mutu kua misulu mu ditunga dia Mezopotamiya.[102]

¹¹Muena mudimu awu kufika pabuipi ne tshiina tshivua ku mpenga kua tshimenga dilolu, diba didi bakaji baya bua kusuna mayi. Kufuishaye tumelu binu panshi.

¹²Kutuadijaye kulomba Mvidi Mukulu wamba ne: — Maweja-Nangila, Mvidi Mukulu wa mfumuanyi Abrahame, lelu ndi nkusengelela ne: ungendeshe diakalenga, ukumbaje biuvua mulaye mfumuanyi Abrahame.

¹³Mpindiewu ndi muimane ku mpokolu wa mayi. Bana ba bakaji ba bantu badi mu tshimenga nebafike bua kusuna mayi.

¹⁴Nsongakaji ungambila ne: “Bu wewe musue tula mulondu panshi, umpeshe mayi a kunua,” pikalaye mua kuitaba bua kumpesha mayi a kunua, ne kunuisha tumelu tuanyi, nemmanye ne nsongakaji awu ke uudi musunguile muntu webe Izake. Kabidi nenjadike ne: malu onsu auvua mulaye mfumuanyi Abrahame akumbanyi.

¹⁵Muena mudimu kayi muanji kujikija ditendelela, Rebeka, muana wa Betuyele, kufika, muambuile mulondu wa mayi pa makaya. Betuyele uvua muana wa Nahore, muanabu ne Abrahame. Mamuende wa Betuyele uvua Milka.

¹⁶Rebeka uvua nsongakaji muimpe, wengelela. Kavua muanji kumanyangana ne balume. Upueka ku tshiina, kusunaye mayi mulondu tente. Mu dipingana diende,

¹⁷muena mudimu wa Abrahame kuya lubilu kumpala kuende, umulomba ne: — Bu wewe musue, mpeshaku mayi a kunua.

¹⁸Nsongakaji kuandamuna ne: — Mukalenga wanyi, nuaku. Kumuinyikilaye lukasa mulondu mu diboku. Muena mudimu kunua.

¹⁹Ujikija kunua, nsongakaji kumuambila kabidi ne: — Ndi nya kusuna makuabu bua kunuisha tumelu tuebe tuonsu.

²⁰Nsongakaji kupongolola lukasa mayi avua mashale mu mulondu mu luuvu. Kuyaye lubilu kusuna mayi makuabu, kuanuisha tumelu tuonsu.

²¹Muena mudimu uvua anu mupuwe umukenketa, udiebeja ne: “Maweja-Nangila mmungendeshe diakalenga anyi?”

²²Nsongakaji mumane kunuisha tumelu tuonsu mayi, muena mudimu kumupa kakanu ka mpawungi kikale ne bujitu bu bua gramme isambombu. Kumupa kabidi bikanu bibidi bia ku maboku, tshikanu tshionsu tshivua ne bujitu bupite pa gramme lukama.

²³Pashishe kukonkaye nsongakaji ne: — Ungambile: udi muana wa nganyi? Tudi mua kupeta muaba wa kulala ku mbelu kuenu ne batudi nabu anyi?

²⁴Nsongakaji kumuandamuna ne: — Meme ndi muana wa Betuyele, kabidi muikulu wa Nahore ne Milka.

²⁵Nsongakaji kumuambila kabidi ne: — Kumbelu kuetu kudi muaba wa nuenu kulala, kudi kabidi bisosa bivule bia kuladika nyama ne bia kuyidisha.

²⁶Muena mudimu kuela Maweja-Nangila tuasakidila, mutue binu panshi,

²⁷wamba ne: — Ndi ngela Maweja-Nangila, Mvidi Mukulu wa mfumuanyi Abrahame, tuasakidila, bualu wakumbaji bionsu bivuaye mulaye mfumuanyi Abrahame. Maweja-Nangila mmungendeshe diakalenga mu njila mujima, mumfikishe anu mu diku dia mfumu wanyi Abrahame.

²⁸Nsongakaji uya lubilu kumbelu kuabu, kulondelaye mamuende malu awu onsu.

²⁹Kadi Rebeka uvua ne muanabu wa balume, dina diende Labane. Labane kuya lukasa bua kusambakena ne muntu uvua ku tshiina tshia mayi.

³⁰Uvua mumone kakanu ne bikanu bivua ku maboku a muanabu wa bakaji, mumvue kabidi nuwuaye ulonda bivua muena mudimu awu mumuambile. Nanku kusanganaye muntu awu ne tumelu tuende ku tshiina tshia mayi.

³¹Labane kuambila muena mudimu wa Abrahame ne: — Luaku, tuye pambelu, lekela kuimana apa. Ndi mumane kukulongoluela muaba wa kulala ne wa kuladika tumelu tuebe. Maweja-Nangila mmumane kukuendesha diakalenga.

³²Kuyabu ne muena mudimu wa Abrahame pambelu. Bafika, kutululabu bintu bionsu bivua tumelu tuambule. Kutulabu kabidi bisosa ne mashinda bua kutudisha. Kutuadilabu muena mudimu, ne bantu bavuaye nabu, mayi a kuowa ku makasa.

³³Kumupeshabu kabidi ne biakudia. Kadi kuandamunaye ne: — Kumpala kua meme kudia, nganji kunuambila bualu bundi muende nabu. Labane kumuandamuna ne: — Ambaku, tudi bakupa matshi.

³⁴Yeye kubambila ne: — Meme ndi muena mudimu wa Abrahame.

³⁵Mfumuanyi Abrahame mmupete diakalenga. Maweja-Nangila mmumunemeshe ne bintu bia bungi: ke mikoku, ngombe, mbuji, tumelu, mpunde, biamu bitoke bia mushinga mukole, biamu bia mpawungi, ne bapika balume ne bakaji.

³⁶Sara, mukaji wa mfumuanyi Abrahame, mmumulelele muana wa balume wa ku bukunda. Bubanji buonsu bua mfumuanyi Abrahame budi anu mu dina dia muanende awu.

³⁷Mfumuanyi Abrahame uvua mungambile bua meme kuditshipa, yeye muteleje, bua tshikebedi muanende Izake mukaji wa mu ditunga dia Kenaane, muaba udi mfumuanyi musombe.

³⁸Ke padi mfumuanyi muntume bua kuselela Izake mukaji anu wa mu tshisamba tshia mfumuanyi, ne wa mu diku diabu mene.

³⁹Ngunwua nanku, meme kumukonka ne: “Kadi pikala nsongakaji awu mubenge bua tuetu kuya nende, ndi mua kuenza tshinyi?”

⁴⁰Mfumuanyi Abrahame kungandamuna ne: “Maweja-Nangila undi mvuluka matuku onsu, neakuendeshe diakalenga. Mutumibue wende neakulombole. Neakuleje nsongakaji wa mu tshisamba tshietu, mu diku dia tatu wanyi, uudi mua kuselela muananyi.

⁴¹Kadi pikala bena dianyi babenga, diditshipa diebe kadiena dikuenzela bualu to, bualu diba adi kadiena dikukuata kabidi to.”

⁴²Lelu mfika ku tshiina tshia mayi, meme kutendelela ne: “Maweja-Nangila, Mvidi Mukulu wa mfumuanyi Abrahame, ndi nkusengelela ne: ungendeshe diakalenga mu luendu elu.

⁴³Mpindiewu ndi muimane ku mpokolu wa mayi. Muana wa bakaji yonsu wafika bua kusuna mayi, pangamulomba ne: ‘Umpeshe mayi a kunua’,

⁴⁴pikalaye muitabe bua kumpesha mayi a meme kunua, ne bua kunuisha tumelu tuanyi, nemmanye ne: yeye ke udi Maweja-Nangila musunguile Izake.”

⁴⁵Tshiyi muanji kujikija ditendelela dianyi, Rebeka kufika muambuile mulondu wa mayi pa makaya, uya ku mpokolu. Yeye mumane kusuna mayi, meme kumulomba ne: “Bu wewe musue, mpeshaku mayi a kunua.”

⁴⁶Nsongakaji kumusha mulondu lukasa pa makaya, ungamba ne: “Nuaku. Pawajikija, nennuishe tumelu tuebe kabidi.” Nanku meme kunua mayi. Kunuishaye ne tumelu tuanyi.

⁴⁷Pashishe meme kumukonka ne: “Wewe udi muana wa nganyi?” Yeye kungandamuna ne: “Ndi muana wa Betuyele, ne kabidi muikulu wa Nahore ne Milka.” Ngunwua nanku, meme kumupesha bikanu bia ku maboku, kumuela ne kakanu ku diulu.

⁴⁸Meme kutua binu panshi bua kuela Maweja-Nangila, Mvidi Mukulu wa mfumuanyi Abrahame, tuasakidila. Bualu uvua mungendeshe diakalenga, tshiyi mupete njiwu. Mmumfikishe ne mu diku dia mfumuanyi. Nanku ndi mua kuya ne nsongakaji ewu kudi muana wa mfumuanyi.

⁴⁹Mpindiewu panuikala bitabe bua kukumbaja dijinga dia mfumuanyi, nansha panuikala babenge, nungambile patoke bua mmone tshindi mua kuenza.

⁵⁰Labane ne Betuyele kumuandamuna ne: — Bualu ebu mbulongolola kudi Maweja-Nangila nkayende. Tuetu katuena ne diyi dia kuamba.

⁵¹Ke Rebeka awu mukutangile. Ndayi nende bua ikale mukaji wa Izake, muana wa mfumuebe, bu mudi Maweja-Nangila mulongolole.

⁵²Muena mudimu wa Abrahame umvua nanku, kutuaye binu panshi, utendelela Maweja-Nangila, umuela tuasakidila.

⁵³Pashishe kukangulaye bibuta biende, kupatulaye bilengejelu bia tshiamu tshitoke tshia mushinga mukole, bia mpawungi, kabidi ne bilamba. Kubipeshaye Rebeka. Kufilaye bintu bia mushinga mukole kudi Labane, ne kudi mamuende wa Rebeka.

⁵⁴Pashishe muena mudimu wa Abrahame ne bonsu bavuaye muende nabu, kudiabu, kunuabu, kulalabu. Butshia dinda kubalayaye ne: “Nkadi mpingana kudi mfumuanyi.”

⁵⁵Mamuende wa Rebeka, ne muanabu ne Rebeka, kuandamunabu ne: — Nsongakaji anji ashale kabidi matuku dikumi. Nenushishe kuya nende.

⁵⁶Muena mudimu wa Abrahame kubandamuna ne: — Maweja-Nangila mmumane kungendesha diakalenga. Kanuena mua kumpitshishila diba to. Mpeshayi mukaji, mpingane kua mfumuanyi.

⁵⁷Bobu kuandamuna ne: — Nanku tubikile nsongakaji, atuambile tshidi ku muoyi wende.

⁵⁸Nsongakaji ufika, kumukonkabu ne: — Udi musue kuya ne udi mukuvuile ewu anyi? Yeye kuandamuna ne: — Eyowa, tuyaya amu nende.

⁵⁹Baledi ba Rebeka kuanyisha bua Rebeka ne ndeji wende, uvua mumukoleshe, baye ne muena mudimu wa Abrahame, kabidi ne bonsu bavuaye muende nabu.

⁶⁰Baledi ba Rebeka kumuela lupemba, bamba ne: “Wewe muanetu wa bakaji, Ulele balume, ulele bakaji ba bungi. Ndelanganyi yebe inyenge bimenga bia bena lukuna bayi!”

⁶¹Pashishe Rebeka ne bena mudimu bende kubanda pa tumelu. Kuyabu pamue ne muena mudimu wa Abrahame.

⁶²Izake uvua musombe mu tshitupa tshia kuinshi tshia ditunga dia Kenaane. Uvua mumane kumuka ku tshiina tshia mayi tshia Lahayi-Royi.[103]

⁶³Dimue dituku dilolu uvua muye kuendakana mu mpata. Ukenzakana, kumonaye tumelu tuye kudiye.

⁶⁴Rebeka kumona Izake, kutuluka pa kamelu.

⁶⁵Kukonkaye muena mudimu wa Abrahame ne: — Muntu udi mutuvuile mu mpata bua kutuakidila nnganyi? Muena mudimu kuandamuna ne: — Ke Izake mfumuanyi. Rebeka kudibuikila tshilamba ku mesu.

⁶⁶Muena mudimu wa Abrahame kulondela Izake bionsu bivuaye muenze mu luendu.

⁶⁷Izake kuangata Rebeka, kuya nende ku ntenta wa mamuende Sara. Rebeka kushala muena kuende. Izake kumunanga bikole. Dibungama divuaye nadi bua lufu lua mamuende Sara kujikadi.