Read Tshiluba Tshibangidilu 28 Bible Online

Tshibangidilu 28 - Tshiluba bible

Tshibangidilu 28

¹Izake kubikila Yakobe, kulayangana nende, umuambila ne: — Kuena mua kusela mukaji wa bena Kenaane to.

²Uye ku tshitupa tshia ku mutu kua misulu tshia Mezopotamiya, kumbelu kua kakuebe Betuyele, muledi wa mamuebe. Usele mukaji wa mu ditunga adi, muana wa mansebebe Labane.

³Mvidi Mukulu wa bukole buonsu akuele lupemba mu dibaka diebe. Ulele bana ba bungi, ushale nkambua wa bisamba bivule.

⁴Mvidi Mukulu akuele wewe ne ndelanganyi yebe lupemba, muvuaye muele Abrahame, bua ditunga diudi usomba bu muenyi edi, didi Mvidi Mukulu mupeshe Abrahame, dishale diebe.[121]

⁵Izake kutuma Yakobe ku tshitupa tshia ku mutu kua misulu tshia Mezopotamiya, kua Labane, muana wa Betuyele, muena Arame. Labane uvua muanabu ne Rebeka, mamuende wa Yakobe ne Esawu.

⁶Esawu kumona ne: Izake mmulayangane ne Yakobe, mumutume ku Mezopotamiya bua kusela mukaji, mumukandike bua kasedi mukaji wa bena Kenaane.

⁷Kumonaye kabidi ne: Yakobe mmuitabe diyi dia tatuende ne mamuende, muye ku Mezopotamiya.

⁸Nanku kujadikaye ne: Tatu kena musue bana ba bakaji ba bena Kenaane to.

⁹Ke muvuaye musue kusela Mahalata[122] muana wa Ismayele. Ismayele uvua muana wa Abrahame. Mahalata uvua muanabu ne Nebayote.

¹⁰Yakobe kumuka ku Bersheba, kuya ku Arane.

¹¹Butuku buila, kuangataye dibue divua muaba awu, kudisangika ku mutu bua kulala tulu.

¹²Pawaye mulale, kulotaye tshilota. Kumonaye tshibandilu tshitue mulu tshitue panshi. Batumibue ba Mvidi Mukulu bavua babanda bapueka[123] ku tshibandilu atshi.

¹³Kumonaye kabidi Maweja-Nangila muimane kumpala kuende, umuambila ne: — Yakobe, ndi Maweja-Nangila, Mvidi Mukulu wa kakuebe Abrahame, kabidi Mvidi Mukulu wa Izake. Ndi nkulaya ne: “Nenkupeshe, wewe ne ndelanganyi yebe, buloba buudi mulale ebu.[124]”

¹⁴Ndelanganyi yebe neyivulangane bu lusenga lua pa buloba. Neyimuangalake nseke yonsu inayi ya buloba. Nengele bisamba bionsu bia pa buloba lupemba mu dina diebe[125] ne dia ndelanganyi yebe.

¹⁵Ndi nebe. Nenkulame muaba onsu uudi uya. Nenkupingaje kabidi mu ditunga edi. Nenkumbaje malu onsu andi mukulaye. Tshiena nkulekela to.

¹⁶Yakobe utabuluka ku tulu, kukemaye wamba ne: — Bulelela, tshiena mumanye to! Kadi Maweja-Nangila udi muaba ewu!

¹⁷Bowa kumuenza. Kuambaye kabidi ne: — Mbimpe kunemeka muaba ewu, bualu ke mudi nzubu wa Mvidi Mukulu, ne tshibuelelu tshia mu diulu.

¹⁸Yakobe kubika dinda dionsu, kuimanyika dibue divuaye musangike ku mutu adi, kudifita manyi ku lusongu, bua dikale dia tshijila.

¹⁹Yakobe kuinyika muaba awu ne: Betele, mmumue ne: Nzubu wa Mvidi Mukulu. (Muaba awu bavua baubikila ku kale ne: Luze.)

²⁰Yakobe kulaya Maweja-Nangila ne: — Wewe muikale nanyi, mundame bimpe mu luendu luanyi, mumpeshe biakudia ne bia kuvuala,

²¹mumpingaje bimpe kumbelu kuetu, nanku wewe Maweja-Nangila newikale Mvidi Mukulu wanyi.

²²Dibue dindi muimanyike edi ndia tshijila. Nedikale nzubu wa Mvidi Mukulu. Nenkupingajile tshia dikumi tshimue tshia bintu bionsu biudi mumpeshe.