Read Tshiluba Tshibangidilu 29 Bible Online

Tshibangidilu 29 - Tshiluba bible

Tshibangidilu 29

¹Yakobe kutungunuka ne luendu, kuya ku ditunga dia kudi diba dipatukila.

²Mu luendu alu, dituku dikuabu kumonaye tshiina tshia mayi mu mpata, tshibuikila dibue dia bujitu. Mayi awu ke avuabu banuisha mikoku. Bisumbu bia mikoku ne bia mbuji bisatu bivua muaba awu, bikishe.

³Bua kunuisha bimuna mayi, balami ba mikoku bavua bumusha dibue adi, basangisha bimuna bionsu muaba umue, babinuisha mayi. Pashishe bavua babuikila dibue adi kabidi ku tshiina.

⁴Yakobe kukonka balami ba mikoku abu ne: — Bana betu, nudi bafume penyi? Bobu kuandamuna ne: — Tudi bafume ku Arane.

⁵Yakobe kubakonka kabidi ne: — Nudi mua kumanya Labane, muana wa Nahore anyi? Bobu kuitaba ne: — Eyowa, tudi bamumanye.

⁶Yakobe kubakonka kabidi ne: — Labane udi bimpe anyi? Bobu kuandamuna ne: — Ee, udi bimpe. Pashishe kuambilabu Yakobe ne: — Tangila udi uvua ne bimuna wawa, ke muanende wa bakaji Rakele.

⁷Yakobe kubambila kabidi ne: — Diba ditshidiku! Dia kusangisha bimuna muaba umue kadiena dianji kukumbana. Nuishayi bimuna mayi. Nuye kubidisha kabidi mu mpata.

⁸Balami ba mikoku kuandamuna ne: — Katuena mua kunuisha bimuna mayi mpindiewu to, anu patuabisangisha bionsu muaba umue. Diba adi nebumushe dibue didi dibuikila ku tshiina tshia mayi bua kubinuisha.

⁹Patshivua Yakobe uyukila ne balami ba mikoku, Rakele kufika ne bimuna bia tatuende Labane, bualu uvua mulami wabi.

¹⁰Yakobe umona Rakele, muana wa mansebende Labane, ufika ne bimuna, kumushaye dibue divua dibuikila ku tshiina tshia mayi, kunuisha bimuna mayi.

¹¹Pashishe Yakobe kupukila Rakele ne disanka, udila muadi, umuambila ne:

¹²“Ndi mulele webe. Ndi muana wa Rebeka, muanabu ne tatuebe.” Rakele kunyema lubilu bua kuambila tatuende Labane.

¹³Labane mumane kumvua lumu lua difika dia Yakobe, muana wa muanabu wa bakaji, kuyaye lubilu bua kumuakidila. Kumupukilaye, kuya nende ku mbelu. Yakobe kulondela mansebende Labane bionsu bivua bimuenzekele abi.

¹⁴Labane kuambila Yakobe ne: — Wewe udi mulele wanyi, tudi mufu umue. Yakobe kusomba ku mbelu aku ngondu mujima.

¹⁵Dimue dituku Labane kuambila Yakobe ne: — Udi mulele wanyi. Kadi kuena mua kungenzela mudimu, kuyi upeta difutu nansha. Ungambile tshiudi musue bua meme kukufuta?

¹⁶Labane uvua ne bana ba bakaji babidi. Muanabute uvua Leya, muakunyi uvua Rakele.

¹⁷Leya uvua ne mesu bulengu, kadi Rakele uvua ne mpala muimpe, wengelela.

¹⁸Yakobe uvua munange Rakele. Kuambilaye mansebende Labane ne: — Ndi musue kukuenzela mudimu bidimu muanda mutekete, bua meme kusela Rakele muanebe wa mukala.

¹⁹Labane kuandamuna Yakobe ne: — Kabena mua kusela Rakele kudi mulume mukuabu to. Umusele amu wewe. Tusombe nebe muaba umue.

²⁰Yakobe kuenzela Labane mudimu bidimu muanda mutekete bua kusela Rakele. Yakobe uvua ubala bidimu abi anu bu matuku makese, bualu uvua mupite kunanga Rakele.

²¹Pashishe Yakobe kuambila Labane ne: — Matuku auvua mungambile bua kuangata mukajanyi akumbanyi, munseleshaku!

²²Labane kubikidisha bantu bonsu ba muaba awu, kubalongoluela didia dia tshibilu tshia dibaka.

²³Butuku Labane kufila muanende wa bakaji Leya kudi Yakobe. Yakobe kumubuelela mu nzubu.

²⁴Labane kufila kabidi mupika wende Zilpa kudi muanende wa bakaji Leya, bua amuenzele mudimu.

²⁵Butshia dinda, Yakobe umona Leya, kukemaye bikole! Kukonkaye mansebende Labane ne: — Udi mungenzele nanku bua tshinyi? Mvua mukuenzele mudimu bua kusela Rakele. Kadi wandingi bua tshinyi?

²⁶Labane kuandamuna Yakobe ne: — Katuena ne tshibidilu tshia kuselesha muana wa mukala, kabayi banji kusela mukulu wa bantu.

²⁷Nanku anji kushala ne Leya lumingu lujima kaba kamue, nenkupeshe kabidi Rakele, paudi ungenzela kabidi mudimu bidimu bikuabu muanda mutekete.

²⁸Yakobe kuitaba, kushala ne Leya kaba kamue lumingu lujima. Pashishe mansebende Labane kumupesha kabidi Rakele, bua ikale mukajende.

²⁹Labane kufila Bila mupika wende kudi muanende wa bakaji Rakele, bua amuenzele mudimu.

³⁰Yakobe kubuelela Rakele, mu nzubu, kumunanga kupita Leya. Nanku kukuatshilaye kabidi Labane mudimu bidimu muanda mutekete bikuabu.

³¹Maweja-Nangila umona ne: Yakobe mmupite kunanga Rakele, kupeshaye Leya lulelu. Kadi Rakele uvua mushale nkumba.

³²Leya kuimita difu, kulela muana wa balume. Kuinyikaye muana awu ne: Rubene. Kuambaye ne: — Maweja-Nangila uvua mumone dikenga dianyi[126] Mpindiewu bayanyi neanange.

³³Leya kuimita difu dikuabu, kulela muana wa balume. Kuinyikaye muana awu dina ne: Shimeyone. Kuambaye ne: — Maweja-Nangila mmumpeshe kabidi muana ewu, bualu mmumanye[127] ne: bayanyi mmumbenge.

³⁴Leya kuimita difu dikuabu, kulela muana wa balume, kuinyika muana awu dina ne: Levi.[128] Kuambaye ne: — Mpindiewu bayanyi neandamate, bualu mbamuleledi bana ba balume basatu.

³⁵Leya kuimita difu dikuabu, kulela muana wa balume. Kuinyika muana awu dina dia Yuda.[129] Kuambaye ne: — Mpindiewu nentumbishe Maweja-Nangila. Lulelu lua Leya kukoseka.