Read Tshiluba Tshibangidilu 34 Bible Online

Tshibangidilu 34 - Tshiluba bible

Tshibangidilu 34

¹Dituku dikuabu Diina, muana wa bakaji uvua Yakobe mulele ne Leya, uvua muye kumonangana ne bakaji nende ba mu ditunga dia Kenaane.

²Shekeme, muana wa Amore, mfumu wa bena Iti[157] umona Diina, kumubuelelaye mu nzubu ku bukole.

³Kadi Shekeme kunanga Diina bikole, kumuambila malu onsu avua munda muende, bua atekeshe muoyi wende.

⁴Shekeme kuambila tatuende Amore ne: — Ungambuluishe bua mmone mua kusela nsongakaji ewu.

⁵Yakobe mumane kumvua ne: Shekeme mmubuelele Diina mu nzubu ku bukole, kushalaye mupuwe, muindile dipingana dia bana bende bavua badisha bimuna mu mpata.

⁶Amore, tatuende wa Shekeme, kuya kuyukila ne Yakobe.

⁷Bana ba Yakobe balume mu mpata, kubambilabu bionsu bivua bienzeka abi. Bavua bumvue bibi, bafike kabidi munda bikole, bualu Shekeme uvua muenze bualu bubi bua dikamakama, mubuelele muana wa bende wa Yakobe mu nzubu ku bukole. Tshilema tshia mushindu ewu katshiena ne bua kuenzeka mu Izrayele to.

⁸Kadi Amore kuambila Yakobe ne bana bende ne: — Bu mudi muananyi Shekeme munange muanenu wa bakaji ne muoyi mujima, anyishayi amusele.

⁹Tumvuangane, tuikale tuselelangana. Tuetu tusele bana benu, nuenu nusele betu.

¹⁰Nenuase pabuipi netu. Ditunga edi nedikale dienu kabidi. Asayi muaba onsu unudi basue, nuende mushinga, nusumbe miaba ya nuenu kusomba kashidi.

¹¹Shekeme kuambila tatuende muenu, ne ba bukonde buende, ne: — Numfuile luse, nundombe tshionsu tshinudi basue.

¹²Nundombe biuma bungi buonsu bunudi basue, ne bintu bikuabu bidi mua kunusankisha. Nemfile bionsu bua ngangate anu nsongakaji ewu, ikale mukajanyi.

¹³Kadi bu muvua Shekeme mubuelele Diina mu nzubu ku bukole, bana ba Yakobe kuandamuna Shekeme ne tatuende Amore, ne budimu ne:

¹⁴— Katuena mua kuitaba bua muntu udibu kabayi bateke panshi asele muanetu wa bakaji, bualu bidi bituenza bundu.

¹⁵Kadi panuikala basue kusela muanetu wa bakaji, bateke balume bonsu ba muenu panshi. Nuikale bu mutudi emu.

¹⁶Nanku netumvuangane tuselelangane, tusombe nenu mu ditunga emu, tushale bantu bamue.

¹⁷Kadi panuabenga mutudi tuamba, tuetu netuangate muanetu wa bakaji, tuye nende.

¹⁸Amore ne muanende Shekeme kuitaba ne: “Munuambi amu mmomu.”

¹⁹Nanku bu muvua Shekeme munange Diina ne muoyi wende mujima, kuyaye lukasa bua kukumbaja bivua baku bende bambe. Bavua bamumvuile kabidi bikole kudi bena diku diabu.

²⁰Amore ne muanende Shekeme kuya ku tshibuelelu tshia tshimenga, muaba wa tshisombelu, kubikila bena ditunga, babambila ne:

²¹— Benyi betu aba badi ne muoyi muimpe. Tusombe nabu mu ditunga dietu, bualu ndialabale. Bende mushinga. Tuselelangane kabidi nabu.

²²Bantu benyi aba nebanyishe bua kuasa mu ditunga dietu, kabidi bua kushala netu bantu bamue, kadi anu padibu bateka bantu balume bonsu panshi bu mudibu bobu.

²³Tuetu benze nanku, nebasombe mu ditunga dietu. Nanku bimuna ne bintu bionsu bidibu nabi nebishale bietu.

²⁴Bena ditunga bonsu bavua muaba awu kuitaba bivua Amore ne muanende Shekeme bambe. Kutekabu bantu balume bonsu ba mu tshimenga atshi panshi.

²⁵Kadi kupita matuku asatu, patshivua balume bonsu basama mputa ya butengu, Shimeyone ne muanabu Levi, bakulu ba Diina, kuangata muela wa mvita, kubuela mu tshimenga, kakuyi udi ubenzela bualu, kushipamu bantu balume bonsu.

²⁶Kushipabu kabidi ne Amore ne muanende Shekeme, kuangata muanabu wa bakaji Dina uvua kudi Shekeme, kuya nende!

²⁷Bana bakuabu ba Yakobe, kupawulabu bintu bionsu bivua pa bitalu nansha mu tshimenga! Bualu nsongalume wa mu tshimenga atshi uvua mubafuishe bundu, mubuelele muanabu wa bakaji mu nzubu ku bukole.

²⁸Kunyengabu mikoku, mbuji, ngombe, mpunde. Mu tshikosu kuangatabu bionsu bivua mu tshimenga ne mu mpata.

²⁹Kuyabu ne biuma bionsu abi. Kukuatabu kabidi bakaji ne bana bonsu, kuya nabu. Bavua baye kabidi ne bionsu bivuabu basangane mu nzubu ya tshimenga.

³⁰Ke Yakobe kuambila bana bende Shimeyone ne Levi ne: — Nuangenzedi bibi, nuamfuishi bundu kudi bena Kenaane ne kudi bena Perizi.[158] Tuetu tudi bakese, bobu badi ba bungi. Badi mua kudisanga, kumbutala ne bianyi bionsu bindi nabi.

³¹Bana babidi aba kuandamuna tatuabu ne: — Mulumiana ewu kavua mua kuangata muanetu wa bakaji ku bukole, bu mukaji mudisombele to.