Read Tshiluba Tshibangidilu 4 Bible Online

Tshibangidilu 4 - Tshiluba bible

Tshibangidilu 4

¹Adame kubuelela mukajende Eva mu nzubu. Awu kuimita difu, kulelaye Kayine. Eva kusanka bikole wamba ne: “Ndi mufuke muana wa balume ku bukole bua Maweja-Nangila.[17]”

²Pashishe kulelaye kabidi Ebele muakunyi wa Kayine. Ebele uvua mulami wa mikoku, Kayine uvua tshidime.

³Matuku a kunowa akumbana, Kayine kulambula Maweja-Nangila biakudia bia mu madimi ende.

⁴Ebele pende kumulambula banabute ba mikoku mimpe ya mafuta. Maweja-Nangila kuanyisha milambu ya Ebele,[18]

⁵kubenga ya Kayine. Nanku, Kayine kupeta tshiji tshikole, kufika munda.

⁶Maweja-Nangila kumukonka ne: — Tshiji ntshia tshinyi? Udi mufike munda bua tshinyi?

⁷Bu wewe muenze bimpe, uvua ne bua kuikala ne disanka. Kadi paudi kuyi wenza bimpe, bubi budi bukuimanyine ku tshibi; kadi ukebe mua kubutshimuna.

⁸Kayine umvua nanku, kuambila muanabu Ebele ne: — Tuye kuendakana. Bafika mu budimi, Kayine kukuata muanabu Ebele kumushipa.[19]

⁹Maweja-Nangila kukonka Kayine ne: — Muanenu Ebele udi penyi? Kayine kuandamuna ne: — Tshiena mumanye. Meme ndi mulami wa muanetu anyi?

¹⁰Maweja-Nangila kuebeja ne: — Udi muenze nanku bua tshinyi? Muadi wa mashi a muanenu[20] wafiki kundi ufumina pa buloba.

¹¹Mpindiewu udi ne mulawu pa buloba buvua bumatshile mashi a muanenu uuvua mushipe.

¹²Wewe newikale udima, kadi buloba kubuyi butoloka bintu bia nsongu. Newikale muendakanyi pa buloba, kuyi ne muaba wa kusomba.

¹³Kayine kuambila Maweja-Nangila ne: — Dinyoka diudi mumpe ndipite bukole.

¹⁴Lelu udi ungipata pa buloba. Ndi nya kusomba mutantshi mule nebe. Nenshale muendakanyi. Muntu yonsu ungasangila nende neanshipe.

¹⁵Maweja-Nangila kumuandamuna ne: — Muntu kena ukushipa to. Muntu wakenzela bibi, nebamusombuele misangu muanda mutekete. Maweja-Nangila kuteka tshimanyinu pambidi pa Kayine bua muntu yonsu wasangila nende kamuenzedi bibi to.

¹⁶Kayine kumuka muaba uvua Maweja-Nangila, kuya kusomba mu ditunga dia Node[21] luseke ludi diba dipatukila lua Edene.

¹⁷Kayine kubuelela mukajende mu nzubu. Awu kuimita difu, kulela muana, dina diende Enoke. Kayine kuasa tshimenga, kutshinyika dina dia muanende Enoke.

¹⁸Enoke kulela Irade. Irade kulela Meyuyayele. Meyuyayele kulela Metushayele. Metushayele kulela Lemeke.

¹⁹Lemeke kusela bakaji babidi: dina dia mukalenga muadi divua Ada, dia mutu wa lubanza divua Sila.

²⁰Ada kulela Yabale. Yabale ke nkambua wa badi basomba mu nzubu ya ntenta bikale ne bimuna.

²¹Dina dia muanabu ne Yabale divua Yubale. Uvua nkambua wa bimbi ba bisanji ne bedi ba nshiba.

²²Sila, mukaji muibidi wa Lemeke, uvua mulele Tubale-Kayine. Yeye ke uvua nsenda wa biamu bishilangane bikunze ne bifike.[22] Tubale-Kayine uvua ne muanabu wa bakaji, dina diende Naama.

²³Lemeke kuambila bakaji bende ne: “Ada ne Sila, telejayi diyi dianyi. Bakaji banyi, umvuayi tshindi nnuambila: Eyowa ndi nshipa muntu padiye untapa mputa. Ndi nshipa muana padiye untuuta.

²⁴Eyowa, Kayine nebamusombuele misangu muanda mutekete. Kadi Lemeke nebamusombuele misangu makumi muanda mutekete.”

²⁵Adame ne Eva kulela muana we balume mukuabu. Eva kumuinyika dina dia Shete, wamba ne: — Mvidi Mukulu wakumpesha muana mukuabu pa muaba wa Ebele uvua Kayine mushipe.[23]

²⁶Shete kulela muana wa balume, kumuinyika dina dia Enoshe. Tshikondu atshi ke tshivua bantu batuadija kutendelela Mvidi Mukulu, batela dina dia Maweja-Nangila.