Read Tshiluba Tshibangidilu 41 Bible Online

Tshibangidilu 41 - Tshiluba bible

Tshibangidilu 41

¹Kupita bidimu bibidi, mukalenga wa bena Ejipitu kulota tshilota: uvua ku muelelu wa musulu wa Nile.

²Kumonaye ngombe muanda mutekete ya mubidi muimpe, ipatuka ku musulu wa Nile, yenda idia bisosa ku muelelu wa mayi.

³Kumonaye kabidi ngombe mikuabu muanda mutekete minyane ipatuka mu musulu awu, imana muaba uvua ngombe ya mubidi muimpe.

⁴Ngombe muanda mutekete ivua minyane, kudia ngombe muanda mutekete ivua ne mubidi muimpe. Diakamue mukalenga kutabuluka ku tulu.

⁵Uteka kabidi mutu panshi, kulota tshilota tshibidi. Kumonaye miepu ya mponda muanda mutekete mimpe, minene, mikale ku lukolakola lumue.

⁶Kumonaye kabidi miepu mikuabu ya mponda muanda mutekete mishawuke, mifubisha kudi lupepela lua mu tshipela.

⁷Miepu ya mponda muanda mutekete ivua mifubisha kudi lupepela ayi, kuminayi miepu ya mponda muanda mutekete ivua ne mubidi muimpe. Ke mukalenga kutabuluka ku tulu, kujadika ne: ndi mulote bilota.

⁸Butshia dinda, mukalenga kupampakana bikole bua bilota abi. Kubikidisha benji ba majimbu bonsu ne bena meji ba mu ditunga diende, ubawila bilota abi. Kadi kakuvua muntu nansha umue uvua mua kumujinguluila[182] bilota abi to.

⁹Diba adi mutangidi wa balongolodi ba maluvu a mukalenga kuambila mukalenga ne: — Mukalenga, lelu ndi ntonda bubi bumvua muenze.

¹⁰Dituku dikuabu uvua mutuele meme ne mutangidi wa balambi ba biakudia biebe mu nzubu wa lukanu, bualu uvua mutufikile munda. Tuvua mu nzubu wa lukanu kua mulombodi wa bena mvita ba mu bukalenga.

¹¹Tuetu babidi tuvua balote bilota bishilangane butuku bumue.

¹²Nsongalume mukuabu mupika, muena Ebrewu, uvua netu mu nzubu wa lukanu amu, wenzela mulombodi wa bena mvita ba mu bukalenga mudimu. Tuetu kumuawila ndota yetu. Yeye kujinguluila muntu yonsu ndota yende.

¹³Nanku malu onsu kukumbana menemene muvuaye mutuambile. Meme kupingana muaba wanyi wa mudimu. Utuvua nende kumowabu.

¹⁴Mukalenga kubikidisha Yozefe. Kumupatulabu lukasa mu nzubu wa lukanu. Yozefe kubeya miedi, kushintulula bilamba, kuya kudileja kudi mukalenga.

¹⁵Mukalenga kuambila Yozefe ne: — Ndi mulote ndota. Kakuena muntu udi mua kuyinjinguluila. Kadi ndi mumvue ne: wewe udi mumanye mua kujingulula ndota.

¹⁶Yozefe kuandamuna ne: — Meme tshiena mua kuenza nanku to. Amu Mvidi Mukulu nkayende ke udi mua kujingulula ndota yebe biakane.

¹⁷Mukalenga wa bena Ejipitu kuawila Yozefe ndota, wamba ne: — Ndi mulote nunku: mvua muimane ku muelelu wa musulu wa Nile.

¹⁸Meme kumona ngombe muanda mutekete ya mubidi muimpe, ipatuka mu musulu wa Nile, yenda idia bisosa ku muelelu wa mayi.

¹⁹Meme kumona kabidi ngombe mikuabu muanda mutekete minyane bikole, ipatuka kabidi mu mayi. — Tshiena muanji kumona ngombe mibi ya mushindu ewu mu ditunga dia Ejipitu to. —

²⁰Ngombe ivua minyane bikole ayi, kumina ngombe muanda mutekete ivua ne mubidi muimpe.

²¹Kadi ngombe ivua minyane bikole mimane kudia ngombe muanda mutekete ya mubidi muimpe ayi, ivua mishale anu bu idi kayiyi midie tshintu. Mubidi wayi kauvua mushintuluke to. Diakamue meme kutabuluka ku tulu.

²²Mpingana kabidi ku tulu, meme kumona miepu ya mponda muanda mutekete mimpe, minene, mikale ku lukolakola lumue.

²³Meme kumona kabidi miepu ya mponda mikuabu muanda mutekete mishawuke, mifubidile ne lupepela lua mu tshipela.

²⁴Miepu ivua mifubidile ayi, kuminayi miepu muanda mutekete ivua ne mubidi muimpe. Nkadi mumane kuawila bena majimbu ndota ayi. Kabena banjinguluila to.

²⁵Yozefe kuambila mukalenga ne: — Bilota biebe bibidi bidi bileja bualu bumue. Mvidi Mukulu udi ukumanyisha malu adiye musue kuenza.

²⁶Ngombe ya mubidi muimpe muanda mutekete ne miepu ya mponda mimpe muanda mutekete bidi bileja bidimu muanda mutekete. Nanku bilota biebe bibidi bidi amu bu tshilota tshimue.

²⁷Ngombe mikuabu minyane muanda mutekete ne miepu ya mponda muanda mutekete ivua mifubishe kudi lupepela, bidi bileja kabidi bidimu muanda mutekete, kadi mbia tshiyole tshia nzala.

²⁸Mukalenga, ndi mumane kukuambila ne: Mvidi Mukulu udi mukuleje malu adiye musue kuenza.

²⁹Bidimu muanda mutekete bidi kumpala eku, mu Ejipitu monsu nemuikale biakudia bia bungi.

³⁰Kadi bidimu bikuabu muanda mutekete bidi bilonda, biakudia bionsu nebijike. Bantu kabakuvuluka kabidi ne: tuvua ne biakudia bivule mu Ejipitu to. Tshiyole tshikole tshia nzala atshi netshibutule ditunga.

³¹Bua bukole bua tshiyole atshi, mu Ejipitu bantu kabakumanya kabidi ne: kuikala ne biakudia bivule nkuikala munyi.

³²Paudi mulote ndota ayi mishindu ibidi ya momumue, umanye ne: Mvidi Mukulu mmumane kujadika bualu ebu, kabidi neabukumbaje lukasa.

³³Mukalenga, mpindiewu mbimpe ukebe muntu udi ne lungenyi ne meji, umupe muanzu wa kutangila bena Ejipitu bonsu.

³⁴Patshidi bantu ne biakudia bia bungi mu bidimu ebi muanda mutekete, usungule balombodi ba bantu bua basangishe tshia bitanu tshimue tshia biakudia bidi bena Ejipitu bonsu banowa.

³⁵Basangishe biakudia ebi mu bidimu ebi muanda mutekete bidi kumpala. Bunguije ntete ya kuenza bukula mu mayeba mu bimenga, bayilamemu, wewe wikale ubatangila.

³⁶Biakudia abi nebiambuluishe bantu badi mu Ejipitu mu bidimu muanda mutekete bia tshiyole. Nzala kayakubutula bantu to.

³⁷Mukalenga wa bena Ejipitu ne balombodi ba mu bukalenga buende, kuitaba bionsu bivua Yozefe mubambile.

³⁸Mukalenga kuambila balombodi ne: — Muntu ewu udi muwule ne Mueyelu wa Mvidi Mukulu. Katuena mua kupeta muntu mukuabu udi mupite Yozefe to.

³⁹Pashishe mukalenga kuambila Yozefe ne: — Bu mudi Mvidi Mukulu mukuleje bintu abi, kakuena muntu mukuabu udi mua kukupua ku lungenyi ne meji to.

⁴⁰Wewe ne wikale mulombodi munene wa mu bukalenga buanyi. Bantu banyi bonsu nebitabe mikenji yebe.[183] Meme nenkupite amu ku bumfumu buanyi.

⁴¹Ndi nkupesha mpindiewu bumfumu bua ditunga dijima dia Ejipitu.

⁴²Ke mukalenga kukopola kakanu kende ka bukalenga, kukela Yozefe ku munu. Ku-muvuadikaye ne tshilamba tshinefuke tshia ndanda. Kumuelaye bilengejilu bia mpawungi mu nshingu.[184]

⁴³Kumubandishaye mu ditempu divuabu babande amu kudi tshindonda tshiende. Bantu bavua banyema badianjidila kumpala kuende, bela mbila, bamba ne: “Mushilayi njila,[185] apite”. Ke muvua Yozefe mupete bumfumu bua ditunga dijima dia bena Ejipitu nanku.

⁴⁴Mukalenga kuambila kabidi Yozefe ne: — Meme ndi nshala mukalenga wa ditunga. Kadi muntu nansha umue kena mua kubulula mukana mu ditunga emu, kayi ne dianyisha diebe.

⁴⁵Kuinyikaye Yozefe dina dia bena Ejipitu dia Safnate-Paneya. Kumuseleshaye ne mukaji, dina diende Asnate, muana wa mutuangaji Potifera wa mu tshimenga tshia One.[186] Kutuadija mu tshikondu atshi, Yozefe uvua mua kuendakana mu ditunga dijima dia Ejipitu.

⁴⁶Pa wabu bamufite kua mukalenga wa bena Ejipitu apu, Yozefe uvua ne bidimu makumi asatu. Ke Yozefe kulayangana ne mukalenga wa bena Ejipitu, kutuadija kuendakana, utangila midimu mu ditunga dijima dia Ejipitu.

⁴⁷Bidimu muanda mutekete bilondangane, ditunga dia Ejipitu divua ne biakudia bipite bungi.

⁴⁸Yozefe kuambuisha biakudia bionsu bivua mu misoku ya ku mpenga, kubisangisha muaba umue, mu mayeba avua mu bimenga bia Ejipitu.

⁴⁹Yozefe uvua musangishe ntete ya kuenza bukula mipite bungi, bu lusenga lua ku muelelu wa mayi, ludi muntu kayi mua kubala to.

⁵⁰Tshiyole tshia nzala katshiyi tshianji kuenzeka, Yozefe kulela bana ba balume babidi ne mukajende Asnate, muana wa Potifera, mutuangaji wa mu tshimenga tshia One.

⁵¹Yozefe kuinyika muanende muanabute ne: Menashe, wamba ne: “Mvidi Mukulu mmumpe tshipua muoyi bua makenga anyi, ne bua dishiyangana dianyi ne bena kuetu.[187]”

⁵²Kuinyikaye muana muibidi ne: Efrayime,[188] wamba ne: “Mvidi Mukulu mmumpe lulelu mu ditunga edi, dimvua musombe mu dikenga dinene.”

⁵³Bidimu muanda mutekete bia biakudia bia bungi kupita.

⁵⁴Bidimu bikuabu muanda mutekete bia tshiyole tshia nzala kutuadija bu muvua Yozefe mumane kuamba. Tshiyole kufika mu matunga makuabu onsu.[189] Kadi biakudia bivua mu Ejipitu.

⁵⁵Diba diabuedi tshiyole tshia nzala mu ditunga dia Ejipitu, bena Ejipitu kulomba biakudia kudi mukalenga wabu. Yeye kubatuma kudi Yozefe, ubandamuna bonsu ne: “Lombayi kudi Yozefe. Nuenze bidiye unuambila.[190]”

⁵⁶Tshiyole tshia nzala atshi kutampakana mu ditunga dijima dia Ejipitu. Nanku Yozefe kunzulula nzubu ya mayeba, bua bantu basumbe biakudia. Kadi tshiyole tshivua tshienda tshipite bukole mu ditunga dia Ejipitu.

⁵⁷Bu muvua tshiyole atshi tshikole, tshibutula buloba bujima, bantu ba matunga onsu kufika kudi Yozefe mu Ejipitu bua kusumba biakudia.