Read Tshiluba Tshibangidilu 43 Bible Online

Tshibangidilu 43 - Tshiluba bible

Tshibangidilu 43

¹Tshiyole tshia nzala kupita bukole mu Kenaane.

²Ntete ya kuenza bukula, ivua bana ba Yakobe basumbe mu ditunga dia Ejipitu, kujika yonsu. Ke Yakobe kuambila bana bende ne: — Pinganayi kabidi mu ditunga dia Ejipitu bua kutusumbila biakudia bikuabu.

³Yuda kuandamuna tatuende ne: — Mulombodi wa ditunga dia Ejipitu uvua mutudimuja, wamba ne: panuikala kanuyi bafike ne muakunyenu wa mukala awu, kanufiki kabidi kundi to.

⁴Nanku bua tuetu kuya kusumba biakudia, anu tuetu baye ne Binyamine.

⁵Kadi wewe mubenge, katuena tuya mu Ejipitu to. Bualu mulombodi uvua mutuambile ne: “Panuikala kanuyi ne muakunyenu wa mukala awu, kanufiki kabidi kundi to.”

⁶Yakobe kubakonka ne: — Munuvua bamuambile ne: tudi ne muakunyetu wa mukala mbishi? Nudi bangenzele bibi be.

⁷Bana kumuandamuna ne: — Mulombodi awu uvua mutuele amu kutuela nkonku ya bungi, utuebeja ne: “Tatuenu utshidi ne muoyi anyi? Nudi ne muanenu mukuabu wa balume anyi?” Tuvua amu bamuandamune ku nkonku yende yonsu. Katuvua batshinke ne: neatuambile ne: nufike ne muanenu.

⁸Yuda kuambila kabidi tatuende ne: — Tatu, anyisha tuye ne Binyamine. Patudi tuya, ke patudi mua kupanda, nansha wewe, nansha tuetu, nansha kabidi bana betu. Katuena basue kufua to.

⁹Ndi njadika ne: meme nkayanyi nemmulame. Umunkonke amu meme. Pandi tshiyi nkupingajilaye, nengikale muena tshibawu kashidi kumpala kuebe.

¹⁰Bu tuetu katuyi banengakane bikole, tuvua mua kuikala bamane kuya bapingane ne biakudia misangu ibidi.

¹¹Yakobe kuambila bana bende ne: — Padibi nanku, angatayi bintu bia mushinga mukole bia mu ditunga dietu: kamonya, buitshi, ndundu, manananshi, ne bimuma bia amande. Nubiele mu bibombi bienu bua kutuadila muena Ejipitu awu.

¹²Pashishe, nuangate makuta a kusumba biakudia ne makuta avuabu banupingajile mu bibombi bienu awu, bualu badi mua kuikala batupakane.

¹³Nuangate kabidi ne muakunyenu Binyamine, nuye nende kudi muntu awu.

¹⁴Mvidi Mukulu wa bukole buonsu akaje muoyi wa muntu awu, bua anufuile luse, nupingane ne Binyamine, kabidi ne Shimeyone bonsu babidi kuneku. Kadi meme nkadi mumane kufuisha muananyi. Nenshale bu muntu uvua kayi mulele anyi?

¹⁵Bana ba Yakobe kuangata bintu abi, ne makuta a kusumba biakudia, kabidi ne avuabu babapingajile awu. Kuangatabu kabidi ne muakunyabu Binyamine. Kuyabu ne bintu bionsu abi kudi Yozefe mu Ejipitu.

¹⁶Yozefe umona bana babu bafike ne Binyamine, kuambilaye muena mudimu wende ne: — Uye ne benyi banyi kuanyi. Ushipe nyama, ulambe biakudia. Munda munya netudie nabu.

¹⁷Muena mudimu kuya ne benyi abu ku nzubu, bu muvua Yozefe muambe.

¹⁸Benyi abu kubuela mu nzubu wa Yozefe anu ne bowa, bela meji ne: “Tudi bafike muaba ewu bua makuta avuabu bele mu bibombi bietu pa diba dituafiki musangu wa kumpala. Mbatubueje munu bua kutukuata ne kutukengesha. Nebatunyenge mpunde yetu, batukuate mu bupika.”

¹⁹Nanku kusemenabu kudi muena mudimu wa Yozefe uvua mu mushiku wa mbelu, bamuambila ne:

²⁰— Mukalenga, utufuile luse, tuetu aba tuvua bafike munemu musangu wa kumpala bua kusumba biakudia.

²¹Pashishe patudi tupingana kuetu, mu njila, butuku buila, tuetu kulala. Patudi tunzulula bibombi bietu, muntu yonsu wa kutudi udi usangana amu makuta ende, avuaye mutule bua kusumba biakudia, ku mibangubangu ya tshibombi tshiende. Kadi makuta awu tudi nawu muaba ewu mpindiewu.

²²Tudi kabidi ne makuta makuabu a kusumba biakudia. Kadi katuena bamanye uvua mutupingajile makuta mu bibombi to!

²³Muena mudimu awu kubakolesha ku muoyi, wamba ne: — Kanupampakanyi to! Nuikale ne ditalala! Nuvua bampeshe makuta enu, ndi nawu! Kadi Mvidi Mukulu wenu, Mvidi Mukulu wa bankambua benu, ke udi mulongolole makuta mu bibombi bienu. Muena mudimu kupatula kabidi Shimeyone mu lukanu.

²⁴Kubuejaye bana babu bonsu ne Yozefe mu nzubu muende. Kubapeshaye mayi a kuowa ku makasa. Kufilaye kabidi ne bisosa bia kudisha mpunde yabu.

²⁵Bana ba Yakobe bamona nanku, kudianjilabu kulongolola bintu bivuabu batuadile Yozefe. Bualu bavua bumvue ne: neafike mu munya bua kudia netu.

²⁶Yozefe ufika ku nzubu kuende, kudielabu panshi kumpala kuende, kumulambula bintu biabu.

²⁷Yozefe kubakonka ne: — Nudi ne bukole bua mubidi anyi? Tatuenu unuvua bangambile ne: utshidi ne muoyi, udi bimpe anyi? Utshidipu anyi?

²⁸Kumuandamunabu ne: — Tatu, muntu webe, udi anu bimpe. Udi ne muoyi. Kudielabu panshi tshiakabidi.

²⁹Yozefe ubanduluka, kumona Binyamine, muakunyende wa mamuende, uvuaye mushile dibele. Kuebejaye ne: — Ewu ke Binyamine, muakunyenu wa mukala, unuvua bangambile anyi? Kuambilaye Binyamine ne: — Muananyi, Mvidi Mukulu akuele lupemba!

³⁰Yozefe kubuela lukasa mu nzubu wa kulala udila. Bualu uvua ne tshintekateka bua muakunyende uvuaye mumone.

³¹Yozefe ujikija kudila, kuowaye mayi ku mesu, kupatuka mu nzubu, kudikankamika, kulomba biakudia.

³²Kadi Yozefe uvua udiila ku ende mesa pa nkayende, bana babu ku makuabu mesa. Bena Ejipitu bavua Yozefe mubikile, kudia kabidi pa nkayabu. Bualu malongesha abu a pa malu a Mvidi Mukulu avua makandike bena Ejipitu bua kudiila pamue ne bena Ebrewu.

³³Bana ba Yakobe bavua basombe batangilangane ne Yozefe. Kadi bavua bakema bikole bua mushindu uvuabu babasombeshe balondangane ku bidimu, biangatshile ku muanabute too ne ku muanamukala. Bavua batangilangana, bakatshila.

³⁴Yozefe kufikisha kabidi ku mesa kuvua bana babu biakudia bivua ku ende. Kadi bivuaye mufikishe kudi Binyamine bivua bipite bia bana babu misangu itanu. Bonsu kunua maluvu, kukuatshika.